Föför 22:28-30

²⁸Ewe sounemenem a üra, “Ngang üa wiliti eman chon Rom ren ai mönätiu chomong moni.” Paulus a pölüeni, “Nge ngang eman chon Rom seni chök ai uputiu.”

²⁹Lon ewe chök otun ekewe mwän repwe atittina Paulus ra timärämär seni. Nge ewe sounemenem a niuokus lupwen a silei pwe Paulus eman chon Rom, nge a fen föti ngeni sein.

³⁰Iwe, ewe sounemenemen sounfiu a wesewesen mochen küttaöchü met ekewe chon Juta ra atipisi Paulus won. Iei mine sorotän ewe rän a apichi ekewe sein Paulus a föfö ngeni, a pwal allük ngeni ekewe souasor mi lap me unusen ewe mwichen soupwüng pwe repwe mwichfengen. Mürin a angei Paulus o aütai me mwer.