Esus Chuibenequidon Naid 4:6-34

⁶Nëidtedi icpanëdash: ancanquid dapa daëd Anasbëdi Caipas icpanëdash. Nëidic aton shubun icquido abipadquido: nëidic Uan, utsibic Adecandedo, aidtedi cho-choash iccuededpanëdash.

⁷Iccuededshumbic Petedobëdta Uan bëmeshun nënantanquio nidtomeshun: —¿Tsutsi chuiquin caputiapimbocquid bëdamio? —capanëdash tsusiobon.

⁸Adoaquien Petedo Nuquin Papan Mayanën comapenen tantiamiac nadpanëdash:

⁹—Caputiapimbocquid tantiaquin bëdamiaid isec ¿mitsipaden nao, quecta mibitedi tabadpe? Ancanquidbëdtabi chuiquid utsibo isadaidbo utsibo mibitedi chiembique. Tantiata.

¹⁰Caputiapimbocquid Esuquidistu Nasaded yacno iccondaidën bëdamiaid niosh. Mimbi unës uacsho Nuquin Papan uincuemiaidën nac nëid caputiapimbocboedi nëbi nidtoash capusho mimbi isec.

¹¹Aid bëdamequid mimbi tantienquio yaid Nuquin Papa yacno yuedanquidquio nec.

¹²Nuquin Papa yacno yuedanquid utsi nibëdec. Nuquin Papa yacno tabadte bunec aid tantiaquid icta —quepanëdash Petedobëd Uan.

¹³Adec Petedobëd Uan dacuëdenquio yec comapenec onquesho tantiash tsusiobo: —Aid daëdi tsusiopenquio iquequi adecbidi Nuquin Papan chiampid tantiabenabicquid iquequi Esusbëd icquid aid daëd icquin ¿mitsipadomboen caputiapimbocquid bëdamepashba? —quec tantiadempambo yec tsusiobo tabadpanëdash.

¹⁴Aden ambi bëdameboed aidbëdi icsho isash, Icsamboen mimbi naoc, quetiapimbo tsusiobo tabadpanëdash.

¹⁵Adshun Petedo Uambëdta nidmiash, Tantianu, quec onquecuededec tsusiobo:

¹⁶—¿Mitsipadomboen aid daëd nuqui napeba? Nadatiambocquin nasho Edusaden yacnocquidtedishun isbededposh. Ad icnuc, Caputiapimbocquid bëdanambo iquec, ëbitedi quetiapimbo iquebi.

¹⁷Dadpenshun tantianushe queshun, Esus padpiden chuibanoainda, quequin aid daëdi chuinuna —quecuededpanëdash tsusiobo.

¹⁸Adshun Petedobëdta Uan chomeoashun: —Padpiden Esus chuibanoainda. Aidën chiaid chuiquin tantiamenda —capanëdash tsusiobon.

¹⁹Adoaquien: —¿Mitsicquidën chiaid ëmbi natequid icpec? ¿Nuquin Papan chiaid niacquindambi mimbi chiacpaden nadi?

²⁰Nuqui isboed nuqui tantiaboedbidi chuitequidquio iquendac —quepanëdash Petedo.

²¹Adoaquien: —Ëmbi chiacpaden nainquiocsho isun mibi daëdi mëyantsiambique. Baded nid cueschitomane —capanëdash tsusiobon. Abi tishaid seta 40ted icquid caputiapimbocsho bëdamepanëdash. Aid Nuquin Papan bëdamiacsho isash utsibo cuëdëncuededpanëdash. Adsho tantiash Petedobëdta Uan mëyantiadquiocboedi adotiapimbo yec tabadpanëdash tsusiobo.

²³Tsusiobon nidmiac nidash iccuededbocnombo choash puduedshun tsusiobon chuiboed Petedobëdtan Uanën chuioapanëdash.

²⁴Adoac abentsëc onquiacbimboen naden Nuquin Papa chuipanëdash: —Con Icbombo mibi nec. Abubëdta nidaid acte chedo uashun aidënquio icquidtedimbo mimbi uabampampic.

²⁵Adembidi ëndenquimboshë mimbi tantiacpaden min Mayanën tantiamiac mimbi chuimiaid, Dabid padon naden dada uapampic: “¿Atotsieshumbini ëbi dëniactiapimbo icquidombi isadaidpembo comapenec nëishash ëbi dëniacte buncuededpec? Adquiecbidi ¿Atotsi quiash ëmbi chomiaid icsamboen nanushbimboec isadaidbo onqueuidoapec?

²⁶Ancanquidobëd chuiquid utsibo ëmbi chomiaid aton Icbobi mëyanuec iccuededec.”

²⁷Ai, mimbi Dabid pado dada uamiampicpadembi ënabi Edusaden yacno isadaidpembo ancaquid daëd Edodesbëd Ponsio Pidato icnubi isadaidbo chedo iccuededquin mimbi Chomiaid icsaisa Esus icsa uanuec onquecuededpondash.

²⁸Mimbi tantiampicpadembi unës uapondash, Papa.

²⁹Adquidën Petedobëdta Uan chushcasho mimbi tantioc. Cuesambocquid ëbitedi icmequin mimbi chiaid ëbi chuibame, Papa.

³⁰Icsaisan Esusën bëdamiacpaden nadatiambocquin naban, Icbo —quepanëdash Esus tantiaquido Nuquin Papa caic.

³¹Adoac abi iccuededacno ishcudpanëdash. Adec ishcudnuc ambocquid Nuquin Papan Mayanën comapenen pausunac dacuëdenquiocquin Nuquin Papan chiaid chuibampanëdash.

³²Aden chuibanequi abentsëc onquiacbimboec tabadec Esus tantiaquido, Con na nec, quenquio yec, Nuquin Papan na nec, quec tabadcuenepanëdash.

³³Adequi tabadcuenequimbi dacuëdenquiocquin, Esuquidistu uincuenacsho isombi, quequin chuibenepanëdash. Adec Esus tantiaquido tabadsho utsibon bëdamboen isbededquin aidën chuibansho bëdamboen tantiapanëdash.

³⁴Adembidi nidaid icbo utsin-utsinquien aton nidaid menequin piucquid bedshun Esus chuibenequido menepanëdash. Adembidi, shubu icbo utsin-utsinquien aton shubu menequin piucquid bedshun meneoapanëdash. Aden meniac aton na nibëdquid icsho isun Esus chuibenequidon menebanac bunenquio tabadpanëdash.