1Te khohnin ah hlangyoi Haman ka koeva boeih te manghai Artaxerxes loh Esther taengla a paek. Mordekai neh a pha uh te khaw Esther loh manghai taengah a thui pah dongah Mordekai te manghai loh a khue.
2Manghai loh Haman taengkah kutbuen te a loh tih Mordekai taengah a paek. Haman taengkah aka om boeih te Esther loh Mordekai kut ah a tloeng.
3Te phoeiah Esther te manghai kho kungah bakop tih Haman loh Judah rhoek taengah a mangtaengnah a thae la a khueh boeih te lat hamla a thui pah.
4Manghai loh sui mancai te Esther taengla a doe tih manghai mikhmuh ah koe pai.
5Manghai loh, “Na ngaih mai tih, kolonah ka dang mai atah, na ram khuikah Judah rhoek thup hamla Haman loh ca a daek te lat hamla olpaek pat mai.
6Ka pilnam a milh te metlam ka sawt eh?” a ti nah.
7Manghai loh Esther te, “Haman kah koe boeih te nang taengah kam paek tih, Judah rhoek taengah a saii bangla anih te thing dongah ka kui-ok sak coeng. Balae na bih bal pueng?
8Then na ti bangla ka ming neh daek lamtah, ka kutbuen neh daeng thil. Manghai olpaek bangla a daek tih ka kutbuen neh a daeng thil boeih a phae thai moenih,” a ti nah.
9Te dongah amah kum kah Nisan hla sae hnin hlai thum vaengah cadaek boeih a khue tih, India lamloh Etheopia hil ram ya hnih sawm rhih kah, Judah rhoek, manghai laipai rhoek, mangpa rhoek taengah Mordekai kah a thui bangla, manghai Artaxerxes kah olpaek te, Judah ol, namtom kah ol neh a daek tih a pat.
10Manghai Artaxerxes ming neh a daek te manghai kutbuen te a daeng thil tih marhang neh boeih a thak sak.
11Kho takuem kah Judah rhoek loh amah olkhueng te tuem saeh, amah te tungaep uh saeh, a thunkha neh a thimkalh soah khaw a ngaih bangla saii saeh.
12Te tah hla hlainit nah Adar hnin hlai thum vaengah tah Artaxerxes kah ram pum cak saeh,” a ti nah.
13He tah catlaep ca ni. Manghai boei Artaxerxes loh India lamloh Ethiopia ram kah mangpa rhoek neh ram ya pakul parhih taeng neh, mamih kah taemngaihnah dongah uepom la aka om boeih te kan toidal uh.
14Pilnam a kum ngai he, moeihoeinah a yet neh a hoeikhangnah la muep a thangpom vaengah koevoeinah la muep a om pah.
15Ka pilnam he a patang sak bueng kolla, amah aka hoeikhang sak neh a khuehtawn thoh ham khawa noeng uh moenih.
16Hlang dongah aka om lungming kohoe te a khoe tih a phae uh. Hno then ming muehla aka ngai pawt rhoek loh a cungkuem aka hmu Pathen kah dantatnah he ka rhael thai ni a ti uh.
17Saithainah paihmuen ah aka ngol puet long khaw ommong sitoe kah thii long sak ham a pakai uh. Hlangping kah bitat taemrhainah dongah aka phum uh tangtae khaw paya rhoek kah yoekanah rhangneh tlaihvong ham aka coeng pawh patangnah dongah nuen coeng.
18He hlang rhoek kah a coengnah khoboe thae neh laithae kah vuelvaeknah loh manghai kah boethen khaw a vuelvaek pah.
19Hnuksul kah khoboe thae te khokhuen cabu dongah a phoe bueng kolla a tuengta mueh ah nangmih khuila saithainah a loh khaw, a khobae thae cueihnah la loh ham tueng coeng.
20He tlam ni mamih loh ram he hmailong ah hlang boeih te caemrhal lamloh loeih tih, rhalthal la om sak ngaih dongah, a ngoengaih bangla tlaivong ham om coeng.
21Mamih mikhmuh ah aka thoeng dumlai khaw tiktam la laitloek ham om coeng.
22Parsia thi cip at khaw aka om pawh, Mekedonia Mammedatha capa Haman pataeng mamih neh thamat khaw m'vai uh pawt tih, rhennah khaw talh dae, mamih taengah yin la n'om sak coeng.
23Nam tom boeih hamla kopoaek then te omngaih omloe la rhep n'khueh dongah anih te mamih napa la n'khue uh. Boei ngolkhoel dongah a pabae kah aka ngol hlang hlang boeih loh a cungkueng thil uh.
24Tedae a koevoeinah te a khoem tloel dongah mamih kah ram neh hingnah he poeih hamla cai.
25Te dongah mamih kah khangkung neh mamih aka hoeikhang sak Mordekai khaw, mamih ram ah cuembuet la aka om mah pueipo Esther khaw, a namtu boeih khaw, rhenten thup hamla thailatnah neh a taeng.
26He ning la mamih kah tungaepnah te ka phae eh, Persia ram te Mekedonia ram ka poeh sak eh a ti.
27Tedae he bang hlang muen loh milh sak hamla a taeng Judah hlang rhoek he n'sawt vaengah boethae aka sai la om uh pawt tih, duengnah olkhueng neh aka taemrhai uh rhoek lam ni a om.
28Tlung thang neh Khohni Pathen kah a ca rhoek lamni a om uh. Pathen long ni mamih ham neh a pa rhoek ham khaw ram he aka thenkoek taemrhainah neh a hoihaeng.
29Te dongah Hammedatha capa Haman loh ngawnnah ca ham pat te hnothen la poek uh boeh.
30He bang hno a saii parhi te amah ni Susa vongka ah a imkhui pum neh rhenten a kui-ok coeng. Pathen long hno cungkuem a uk dongah, anih soah amah neh a tingtawk la dantatnah tlek a thoeng sak.
31Te dongah he catlaep ca he hmuen takuem ah tai uh lamtah Judah rhoek te amah olkhueng neh khosak sak uh.
32Amih te thaphohnah pae uh. Hla hlai nit Adar hla hnin hlai thum, amih phaepnah tue ah tah amih aka tloek rhoek taenglam loh amamih te tungaep uh thae saeh.
33Cungkuem aka uk Pathen loh a coelh pilnam ham kothaengaithae yueng, omngaihnah khohnin la a khueh pah coeng.
34Te dongah nangmih kah poekkoepnah khotue he tah hinyah hnin la lungbuei then boeih neh tuem uh.
35Tahae neh hmailong ah khaw nangmih he uepom Persia kah loeihnah la a om eh. Tedae mamih aka taeng rhoek ham tah pocinah aka tarhoek sak la om saeh.
36Ram neh khopuei takuem ah khaw, hlaangnah om boel saeh. A longim la kho aka boe pawt tah kosi neh, caai neh, hmai neh phae saeh. Te long te hlang hing bueng pawt tih, khohong rhamsa aka tlung khaw, vaa khaw, a tue boeih dongah hoep boel saeh.
37He oltloek catlaep he ram pum ah langya la tai saeh lamtah te khohnin tah Judah rhoek loh a rhal te thung ham sikim la om saeh.
38Te dongah puencawn rhoek te marhang dongah a loe la ngol uh tih manghai kah olpaek te koe a sai uh. Te oltloek te Susa ah khaw a hoe uh.
39Mordekai tah boei himbai, sui rhuisam, daidi hnithen lupong neh cet. Susa kah pilnam loh anih a hmuh vaengah omngaih uh.
40Judah rhoek tah voelphoeng uh tih a kohoe uh.
41Khopuei neh ram pum boeih tah olpaek te a hoe uh. Olhoenah te a khueh van neh Judah rhoek omngaih tih a kohoe uh, duemnah hnin te buhkoknah hnin la a khueh uh. Namtom hlang loh yahhmui a rhet uh. Judah hlang te a hinyah uh tih Judah hlang la kun uh.
