1Te dongah manghai neh Haman tah manghai nu neh misur tui ok hamla cet.
2A hnin bae dongkah a ok uh vaengah khaw manghai loh, “Manghainu Esther metlam a om? Na huithuinah te metlam a om tih na bihnah khaw metlam a om? Te te nang kam paek bitni. Ram rhakthuem hil mai akhaw,” a ti nah.
3Te dongah a doo tih, “Manghai taengah kolonah ka dang mai atah, ka huithuinah neh ka pilnam kah bihnah bangla ka hinglu he hlun mai.
4Kai neh ka pilnam he, thup hamla, poelyoe hamla, sal bi sak hamla, kamih neh ka ca rhoek khaw, salnu, salpa rhoek khaw n'yoih uh coeng. He ni ka mingnah la aka om coeng. Kaimih kah sungdaehnah he ni yahrhai neh manghai impuei la kang khuen,” a ti nah.
5Te vaengah manghai loh, “Te bang hno saii hamla aka ngaih te unim?” a ti nah.
6Te dongah Esther loh, “Kaimih kah thunkha tah Haman hlang thae ni,” a ti nah. Te vaengah Haman tah manghai neh manghainu mikhmuh ah sut let coeng.
7Manghai tah buhkung lamloh thoo tih dum khuila cet. Tedae Haman long tah a hinglu ham te manghaihu a hloep. Amah ngawn tah ngaihmangnah a tong khungdaeng coeng.
8Manghai te dum lamloh a mael vaengah tah Haman te manghainu ana hloep tih thingkong dongah ana yalh. Te dongah manghai loh, “Kamah im ah ka yuu khaw tholh puei a ngaih bal pueng,” a ti. Haman loh a yaak vaengah a maelhmai te a dangrhoek.
9Te vaengah hlueikhu boei Bugathan loh manghai te, “Haman loh Mordekai ham kui-ok rhui a sui coeng lah ko ke. Mordekai longla manghai taengah ol a thui dae. Haman im ah kui-ok rhui dong sawmnga a sang la pai lah ko,” a ti nah. Te dongah manghai loh, “Haman amah te kui-ok saeh,” a ti nah.
10Te dongah Haman tah Mordekai ham a sui pah kui-ok rhui dongah kui-ok. Te daengah ni manghai kah thintoek khaw a daeh pueng.
