1He phoeiah tah manghai Artaxerxes loh Bougean Hmmedatha capa Haman te a pomsang tih manghai paya boeih soah a hmuenthen a paek.
2Te dongah manghai im kah boeih long tah manghai ol bangla haman taengah kho sungkueng te hinyanah a paek uh. Tedae Mordekai long tah sungkueng pawt tih hninyah khaw pae pawh.
3Manghai im kah rhoek long khaw Mordekai te, “Modekai balae tih manghai olpaek te na ngai pawh?, a ti nah uh.
4A hnin, hnin atah a thui pa dae hnatun pawh. Te dongah, “Mordekai loh manghai ol a ngai moenih,” tila Haman taengah pueng uh.
5Mordekai loh a ol a ngai pawt te Hamman loh loh a yaak vaengah a thintoek te sai.
6Te dongah Artaxerxes kut hmui kah Judah hlang boeih te tah thup hamla a taeng.
7Manghai Artaxerxes kah kum hlai nit dongah tah Haman te cet tih oltloek te hmulung a naan thil. Mordekai neh a huiko boeih te thup hamla hmulung, a khohnin neh a hla te a tae tih a naan. Te vaengah hmolung loh Adar hla hnin hlai li buelh a ngaeh.
8Te phoeiah Haman loh manghai Artaxerxes te, “Na ram khuiah ah a tloe kah namtom hlang khaw taekyak uh coeng. Amih kah olkhueng khaw namtom rhoek kah lakah lang. Te dongah manghai nang kah olkhueng te ngaithuen uh pawh. Amih he tah tloethoeh la na dom ham khaw tueng pawh.
9Manghai nang loh na ngaih mai koinih amih te thup hamla oltloeknah khueh laeh. Kai long khaw manghai thakvoh im ah cak talent thawng rha ka sang van mai eh,” a ti nah.
10Te dongah manghai loh a kutbuen te a loh tih, Judah sokah oltloeknah te daeng thil hamla a paek.
11Manghai loh Haman te, “Cak te khoem laeh, namtom taengah na ngaih bangla saii nawn,” a ti nah.
12Hlakhat hnin lamhma cuek dongah te caek rhoek te boeih a tah. Te dae Haman kah a uen bangla manghai Artaxerxes ming neh India neh Ethiopiah ram due la khoboei ham khaw, ukkung ham khaw ca a pat. Te vaengah ham te ya pakul parhih lo tih amah mah ol rhip a daek pah.
13Oluenah dongah Artaxerxes ram kah Judah pilnam boeih tah a hla hlainit Adar hla kah khohnin vaengah boeih thup tih a koe khaw poelyoe pah ham a pat.
14He kah catlep ca he tah, manghai boei Artaxerxes loh India lamkah Ethiopia hil ram ya pakul pa rhih kah boei rhoek te taemkung rhoek taengah a pat.
15Namtom cungkuem he ka taem tih diklai pum kah a kungmah la ka om coeng. Ka oltloek dongah he khosak tih aka hing tah a hnukkueng ah rhalthal la om sak ka ngaih. Ka ram he khaw mongnah om tih sayalh la pongpa saeh. Pilnam boeih kah a ngaihnah bangla rhoepnah koep khueh he ka ngaih.
16He metlam a soep eh ti khaw ka baerhoep rhoek taengah ka dawt. Te vaengah Haman tah kaimih lakah a pueh la tlaitloeknah thuem. Anih tah lang tih a boethen khaw thovael pawh. Uepomnah khaw a cak dongah ram kah hmuen pabaenah te a loh.
17Kaimih taengah khaw, “Diklai namtom lakli ah boekoep pilnam teh taekyak coeng. Amih kah olkhueng tah namtom kah olkhueng neh kingkalh uh. Manghai kah oltloeknah khaw a hnoelrhoeng uh. Te dongah ram kah rhoepnah neh hinyahnah n'thui khaw n'saii thai pawh.
18He pilnam he m'ming uh coeng. Amih he namtom taengah boekoeknah neh khak pai uh. khosaknah omih khaw, olkhueng khaw, a haehum la a phaelh uh tih mamih kah uktaemnah khaw a thae la a khueh uh, thae bueng a huet uh dongah ram he mongnah om mahpawh.
19Te dongah Haman kah ca a daek bangla he oltloek he nangmih taengah boeih kan tueng. Anih tah mamih kah khosak rhamsak aka hutnah tih mamih kah napa pabae coeng ni. Tahae kum hla hlainit nah Adar hla hnin hlai li vaengah tah rhal te cunghang neh boeih thup uh uh. Lungma neh haidamnah khaw khueh uh boeh.
20Te daengah ni boekoek la puet aka om rhoek te khohnin pakhat ah Hell la banlak suntla uh vetih uktaemknah khaw hil a uep eh. Soekloeknah khaw a om pawt eh.
21Te khohnin ham rhuengphong ham te namtom taengah catlaep la ca boeih a pat.
22Ca te Susa ah khaw a hoe. Te vaengah manghai neh Haman khaw ngol dae Susa khopuei tah boeih vikvuek uh coeng.
