Epeso 5

1

2

3

4

5

6

¹Omi Eaubada au laulauwatai, doha merumeru lolodi,

²eo gadosisi boeana eai au laulau, doha hinage Keriso i gadosisieda, eo iabom i moseuioi ita debada eai, ena ainauia panena i amna eo ena aitalasam Eaubada arinai.

³Na laulau baaea, eo laulau bii, eo ginauri se lelehiedi, tabu esadi se ribaedi arimiu eai, doha omi hetabu tataomiu.

⁴Eo riba bii hinage, eo riba eauyaure, eo talawasi, teina laulau ta nige se lolo; na taba au aihelahui mo.

⁵Paana ede teina ta au nuatui, tauitaitadio, eo taubiibii, eo taulelelelehi (oitau aihelahuina meta), isi taba nige edi tupo Keriso eo Eaubada edi basileia eai.

⁶Tabu tau esau ena ribaribagaibu aridi eai i boraimiu; paana teina ginauri ta debadi eai awayagara nanatunayao Eaubada ena ouyalayala abo se hearo.

⁷Arinai tabu au patulau aridi eai,

⁸paana omi beabeana wa au masigiri, na huia ta omi au marao Guiau boeana eai: au laulau doha marana nanatunayao

⁹(paana mara aniona ta lobai lolo gamagamagari eo laulau dudurai, eo riba mamohoina eai),

¹⁰au aipate emi laulau eai Guiau nuana au helolo.

¹¹Masigiri ena paipaisoa nige aniodi, tabu au patulau aridi eai, na taba au hemasarahadi mo.

¹²Paana ta taumaeamaea ena edi laulau eamuyamui se ribaribaedi.

¹³Na ginauri gamagamagari se hemasarahadi marana eai abo se masamasaraha: ginauri gamagamagari edi aba hemasaraha wa ia ede marana.

¹⁴Arinai si ene, “Oa taueno e, u toro, mate eai u torohai, abo Keriso mara i leawa.”

¹⁵Au itakomakomani na au laulau, nige doha tatao eauyaure na doha tatao sonoga,

¹⁶emi huia au miahelolo, paana asubenadi se baaea.

¹⁷Arinai tabu au supusupu, na Guiau nuana au ita lobai.

¹⁸Tabu waina i heyauyauremiu, doha au nomnomdaoi; na Earua taba i hemonaumiu;

¹⁹om. au hairibagogo ma nuamiu, salamo eo wana, eo galewa wanadi au wanawanaedi Guiau arinai;

²⁰huia gamagamagari ginauri gamagamagari aridi eai Eaubada, eo Tamana, au aiaitoiei, eda Guiau Iesu Keriso esana eai.

²¹Esau esau au haiawaabiuioimiu Eaubada matausina boeana eai.

²²Sisine maitawasora omi monemiuyao mamohoi au awaabiedi doha Guiau au awaabiei.

²³Paana tau monena wa uruuruna ede, doha hinage Keriso, ekalesia, ia tauna wa, ia uruuruna ede, eo tauhemaurina.

²⁴Arinai doha ekalesia Keriso se awaabiei, hinage sisine wa monediyao mamohoi ginauri gamagamagari aridi ea se awamamohoiedi hinage.

²⁵Tatao maitawasora monemiuyao au gadosisiedi doha hinage Keriso ekalesia i gadosisiei, eo debana eai iabom i moseuioilaei,

²⁶ia bena i hetabuei, eo i heaa, goila eai i deuri, eo riba debana eai hinage,

²⁷iabom bena i ainauiauioi ekalesia lolodumadumana, nige biina begana, eo nige wowoeana begana, nige ariariri, na ekalesia wa ia i hetabuei, eo nige ena baaea.

²⁸Hinage doha ede meta tatao monediyao taba se gadosisiedi doha ede taudi se gadosisiuioidi. Ia monena i gadosisiei iabom hinage i gadosisiuioi.

²⁹Paana ede nabada wa i laoma ina huia ta nige tau esega iabom bulumana i ouyalayalauioi; na i heai, eo i hebiga, doha hinage Guiau ekalesia ena abiabina.

³⁰Ia tauna eaudi ede ita, eo ia bulumana hinage, eo ia siadana.

³¹Arinai ede tau wa tamana sinana i laugabaedi, abo i patulau ia monena arinai, isi taudi labui abo bulumadi esega dumaduma mo.

³²Riba ta ribayamuyamui lailai; na Keriso eo ekalesia ribana wa ea ribaribaei.

³³Taiede omi gamagarimiu, esau eo esau, tau wa ia monena abo i gadosisiei doha iabom i gadosisiuioi; eo sine wa hinage monena abo i nanabuei.