Eks 7:45-57

⁴⁵Regavo rad saifnuvuon bu ar muvuaka iji abe afijaf miava bu dab gieme e Josuana e ar kafoko ijiebuon ar abekuai vain. Regavo Godri ifejdiama bu e moik ijekor iji kuriaireva bu subinai vain. Bu subinai vakoga ar iji fum ijia na roke e Devidon tavan ijia ruain.

⁴⁶Devid fu unam amarigia kegoino ijefuon God fu Devid abe nidoin. Ijefuon Devid fu una God kua, Ar Jekafon God ijefuon ni kie na ar on be savno kuain.

⁴⁷Rega Devid fu bakigavo fu e Soromonri Godon ar be sain.

⁴⁸Regavo God fu e bomanado fuba ar emab sainva ijia fik. Regavo e Godon vuak vierafene kuainma iji fu ijeg kuai,

⁴⁹God fu kua, Varur gafi fu ar nun gavo moikigi na dia ijia korevo ijefuon ja ar izia nuifuon sak? Regavo ar na ijia fikfuon iji izer? Regavo ire fok igi nan nar imut nun igia amardiain.

⁵¹Stiven fu suar iji kuardia barme uri kia, Ja sibe nui giren. Jaika e taraikor igeg Godon vuak iji jaba faiv. Ja e saifjon bu kenva jak ja ijeg Godon Kaven iji nuigafav.

⁵²Regavo saifjon ijieb e iji Godon vuak vierafene kuaivo iji kaniain. Regavo madu e ma iji bu kia fu ruakno kiainva iji ja iviakma koikjon kunaim kanain.

⁵³Godon vuak iji anera bu abe roka jan fain gavo irerafuon jaba vuak iji igain.

⁵⁴E iji karinva bu Stivenon vuak iji faiva buka ma deajidiamga bu uri kuriaikuriaikin igia kuriaireme fu ziegafain.

⁵⁵Regavo Stiven e ka Godon Kaven Akai ijar oifuon ijia raren ijefuon fu gafeg varur gufia ga God fino ijia fuka sanako Jesu fu una Godon imut maink ijia fin.

⁵⁶Fu ijia figa Stiven fu game kume, Varur fu daja ruvako naga Jesu fu una Godon imut maink ijia fina na gainvano kumen.

⁵⁷Fu ijeg kumega e fok bu imut ada bijume set iduadiaga bu savo buon iji ru moik ijia name vakga e nivek Sor kuavo ijar samuagdiako bu biom Stiven manino ijia vain. Bu ijia usem fu diakara dab ar iji bu karinva iji arega abe usem makaf ijia mun tuame kanain.