De Postle Dem 7:45-57

⁴⁵We ole fada dat been dey fus, dey dead an lef dey tent ta we fada dem. An dey tote um wen dey gone wid Joshua an tek oba de lan fom dem oda nation dat God been dribe outta dey fo Joshua an de people dem. De tent been dey een dat lan til de time wen David beena rule.

⁴⁶God been heppy wid David, an David aks God fa leh um build a house fa de God dat Jacob woshup.

⁴⁷Bot King Solomon de one dat build dat house fa God.

⁴⁸“Stillyet, God wa dey oba all de wol, an wa hab powa mo den all oda, e ain lib eenside house wa people mek. Jes like de prophet write, wen e say,

⁴⁹‘Heaben de place weh A da seddown fa rule, an pon de wol weh de people da lib, A pit me foot. So wa kinda house ya wahn fa build fa me? Weh de place weh A gwine res?

⁵⁰Ain me han mek all dem ting?’

⁵¹“Oona got haad haat fa true! God ain dey een oona haat, an oona ain da pay no mind ta wa God say! Oona jes like oona ole people. Oonasef ain neba gree fa do nottin dat de Holy Sperit tell oona fa do!

⁵²Dey ain neba been no prophet dat oona ole people ain mek suffa, ainty? Dey eben kill dem prophet dat God sen fa tell bout how de One wa da Waak Scraight wid God been gwine come. Now, oona done han dat One wa da Waak Scraight wid God oba ta de enemy, an oona kill um.

⁵³God sen e angel dem fa gii oona e law. Stillyet, oona ain do wa de law tell oona fa do!”

⁵⁴Wen de leada dem een de Jew Council yeh wa Stephen say, dey been mad down, an dey suck dey teet at um.

⁵⁵Bot Stephen been full op wid de Holy Sperit. E look op eenta heaben an e see God glory da shine an Jedus da stan pon God right han side.

⁵⁶Stephen tell de people say, “Look! A see heaben open op an A see de Man wa Come fom God da stanop pon God right han side!”

⁵⁷Wen dey yeh Stephen say dat, de people kiba dey yea wid dey han. Dey holla loud an dey all rush togeda pon Stephen.