Eklezyas 7:7-25

⁷Lè yon moun ki gen bon konprann ap sibi move trètman, sa ka fè l' pèdi tèt li. Lajan sou kote fè l' pèdi karaktè l'.

⁸Lè yon bagay ap fini li pi bon pase lè l'ap konmanse. Pito ou pran pasyans pase pou ou kite lògèy ap pouse ou.

⁹Pa fè kòlè fasil, paske se moun sòt ki renmen fache.

¹⁰Pa janm mande poukisa tan lontan te pi bon pase tan n'ap viv koulye a. Moun ki gen bon konprann p'ap mande bagay konsa.

¹¹Sa bon pou moun gen bon konprann. Se tankou si ou te gen anpil byen. Se yon gwo avantaj pou tout moun k'ap viv sou latè.

¹²Bon konprann pwoteje ou menm jan lajan ka fè l'. Men, avantaj yon moun genyen lè li gen konesans avèk bon konprann, sa l' konnen an ap fè l' viv.

¹³Gade travay Bondye! Ki moun ki ka drese sa Bondye kwochi?

¹⁴Lè bagay ap mache byen pou ou, fè kè ou kontan. Lè malè tonbe sou ou, chonje ni yonn ni lòt se nan Bondye sa soti. Konsa, yon moun pa janm konnen sa k'ap vin apre l'.

¹⁵Lavi n' sou latè pa vo anyen, se vre! Men mwen wè tout kalite bagay: Mwen wè moun debyen, atout yo mache dwat la, mouri mouri yo. Mwen wè mechan yo menm ap viv lontan pou fè mechanste.

¹⁶Pa chache twò bon, ni gen twòp lespri. Sa ou bezwen touye tèt ou fè?

¹⁷Men, pa twò mechan ni pa twò sòt. Poukisa pou ou ta mouri anvan lè ou?

¹⁸Evite fè eksè ni nan yon sans ni nan yon lòt. Si ou gen krentif pou Bondye, ou p'ap tonbe nan fè eksè.

¹⁹Sa konesans fè pou yon moun, dis grannèg pa ka fè l' pou yon lavil.

²⁰Pa gen moun k'ap mache dwat sou latè ki ka di tou sa l'ap fè byen, li pa janm fè sa ki mal.

²¹Pa koute tou sa moun ap di. Konsa ou p'ap tande lè domestik ou ap pale ou mal.

²²Paske ou menm tou, nan kè ou, ou konnen konbe fwa ou pale moun mal.

²³Mwen sèvi avèk bon konprann mwen pou m' fè tout esperyans sa yo nan lavi. Mwen di mwen ta renmen gen bon konprann. Men, mwen pa t' janm rive genyen l'.

²⁴Lavi se yon mistè. Li tankou yon twou san fon. Ki moun ki ka rive konprann li?

²⁵Men, mwen pran san m' pou m' chache konnen, pou m' egzaminen tout bagay. Mwen te soti pou m' te konprann, pou m' te jwenn repons pou tout keksyon mwen t'ap poze tèt mwen, pou m' te rive konnen jan moun mechan yo pèdi tèt yo, jan moun sòt yo egare.