Bunanige 2:13-47

¹³Eatu tunisi si sawaviniisiya si bwaduwa, “Kamo si ukowayuwa nakasina na fasinei nofemaise si nunusifufuwa.”

¹⁴Eatu Fita i misiniya tonowana kasi 11 nukusi eketa kayona nakasinei sabu i iyavisiya i bwaduwa, “Unaunaku fiyao Diu yota aviyaonana Yenusanema kwa fakwafakwa, ata givimayeta eatu kwata nowanautuutuya avana nofe kana nuwanuwa.

¹⁵Kima muka kata ukowakowayu, taki maise kwa vivinuwadadana. Nofe 9 kana fafani yawane nuwabuni, yota namoḡa nofe kawasasanama nenei, muka sita ukowakowayu.

¹⁶Eatu aviyavana nofe i kikinomana o naki avana Guyau yana tomatakawa Yoweni i bwaduwiya maise,

¹⁷‘Guyau nofemaise i bwaduwa. Tova kasi kafa nusafuwai namoḡa matatafusi nenesiyai Kanunuku ana bisiwaiya. Eketa natunatumi namoḡa be vivine fonaku sina bwaduvioḡoniya. Yami tufunakata katekatevatusi sina kenokita yota yami namoḡa vituvekasi sina kenokavakavayuna.

¹⁸Noko tovasima nenesiyai, kaku kaetoḡa namoḡa be vivine nenesiyai, Kanunuku ana bisiwaiya ebe fonaku sina bwaduvioḡoniya namoḡa nenesiyai.

¹⁹Kafa nuwatabau atai kawasasakaoḡona nenei ana savivinisiya yota kiyakiyaya ana visawavenena tanowai fwayafwaya nenei maise ufaufa be kikanakanata keta yota siyou badobadona.

²⁰Vanavana ina kumanovaniya yota yamayamana ina yabeniya maise ufaufa, eyo muniyai, kuyadayada nakasina keta kaikaiwabuna ina kikinomana nenei, Iyau Tuveka ana nemiya.

²¹Eatu aviyaonana vitumaḡanai sina bwauwa Tuveka nenei, gifafafana sina nisaiya.’”

²²Fita yota yana bwadu i tenesaviya, “Fiyao Isineni, Yeisu tene Nasaneti sifufuna nofe kwa vaneneḡei. Tututaumi kwa sanamaniya namaise Guyau fiwana i veniya be savivina fifiwanamokesi keta yota kiyakiyaya kafa nuwatabau i savivinisiya. Noko si visawavenena venemokena tanake gewa Guyau nenei i nemiya.

²³Guyau waniya kana uḡu i vinuwadadaniya eketa visime kana toodibutoyoḡa nimamiyai si teniya, be nukusi kwa giviogonaḡanaiya eketa kwa nuvimatiya.

²⁴Eatu Guyau i ketoyauya mate kana kuvavana kunukubana nenei eketa mateyai i sinaviyawasa-savaviniya uḡuna mate muka fifiwanina be ina sinaviyewai.

²⁵Nofe namoḡanama fasinei tufomu Deivida i viginiwiya i bwaduwa, ‘Tova nubwayouna yaku Tuveka Guyau naukuwai a tonetoneiya. Muka kaku kaniyabina ana matuteisi uḡuna tanake niniukuwai.

²⁶Muka kuna venumakanoveiku tomate yasi kabaḡai o ka Kaetoḡa Tafutafuna kuna kitamokei be ina kaniniya kididiku sinenei. Na fasinei yaku sebobo avi nakata be semwanai a oseoseya, a sanamane-budowanemokiya tofwaku kuna kitavikaviniya fasinei.

²⁸Yawasi kana ketaketa ku visawasawavenikuwa eketa tafakaiu yana yagova nenei sebobo ina tewesafukuwa.’”

²⁹Fita sifufu i nusaviya i bwaduwa, “Unaunaku, nofe bwadu venemokena a iyaiyavimiya, waḡata Deivida i mateya keta si tauniya atu kana kididikunama o kimoki kita nukusi yawane i fakwafakwa.

³⁰Nofe nenei ta sanamaniya gewa muka tauna fasinei ita bwadubwadu eatu tanake Guyau yana tomatakawa eketa naki i bwaduvioḡoniya vitana susukwana nenei tamo yana gabu ina viya.

³¹I kitavaneya kunauna vitana Guyau yana Togifafafana Gigibokeinana, yawane mateyai ina misini-savaviniya tovanama i bwaduwa, ‘Guyau muka ina venumakanovei tomate yasi kabaḡai o tofwana ina kitamokei be ina kaniniya kididiku sinenei.’

³²Guyau nofe Yeisunama mateyai i sinaviyawasa eketa matatafuki o kana tokita.

³³Guyau i vitoḡavaneiya kikikatainei vifotu kabaina nenei. Eketa Amana Kanunu Tafutafuna i bwadudabedabiya maise nenei i viya eketa i bisiwaḡa nenekiyai. Avana nofe kimoki kwa kitakitiya keta kwa nowanowaniya.

³⁴Kwa sanamaniya Deivida muka ita vane abamai eatu tauna i bwaduwa, ‘Guyau yaku Tuveka i iyaviya i bwaduwa, “Kukikikataiku ku nuvitoḡa vifotu kabaina nenei

³⁵kana nivaniva nifanifaiu ana tenisiya kaeyafayafaweu ya kafa vasafasafa.”’

³⁶Atu kwami fiyao Isineni matatafumi o kwata sanamaniya nofe namoḡanama Yeisu kwa nuvimatiya eatu Guyau i ginakasiya yata Tuveka keta yota kata Togifafafana Gigibokeinana.”

³⁷Si vanevaneneḡa eatu tovanama sifufu nofe si nowaniya, katekatesi i kayavana eketa Fita be tunisi tonowana si iyavisiya si bwaduwa, “Ae, unaunaki! Namaise kata fufuna ebe Guyau ita vinuwateweyeiki?”

³⁸Eketa Fita i iyavisiya i bwaduwa, “Tamokatamokaḡa kwa ugevinaimi be Yeisu Togifafafana Gigibokeinana kana wavai ka givibutabutaimi ebe yami go'yona kasi vinuwateweyeina fasinei yo muniyai, kami nuwagabubu Kanunu Tafutafuna, Guyau ina venimiya.

³⁹Guyau yana bwadudabadaba ina saviviniya fasimiyai keta natunatumi be yota matatafusi aviyaonana kedawanauwai si nenemiya fasisiyai. Tasike aviyaonana Tuveka yata Guyau ina wenisiya be sina nemiya nenei, namoḡasima tauna Kanununa ina venisiya.”

⁴⁰Fita yana sifufu yagwanina nenesiyai i matakawisiya i bwaduwa, “Aviyaonana kimoki muka Yeisu sita vitumaḡanei, Guyau ina vimatadawanisiya. Na uḡuna kwa kawanunukuwei be i gifafafaneimi.”

⁴¹Eketa kuyadayadanama nenei namoḡasima bwadu si vitumaḡaniya be si givibutibutisiya o kasi yagwana 3,000. Keta namoḡasima o Yeisu kana tomuniyeina nukusi si vikatutamokisiya.

⁴²Tova nubwayouna tovitumaḡana, tonowana yasi visawavenena si vanevaneneisiya eketa yota unaunasi nukusi, kanunu keta kwafini nenesiyai, si vivikaovivita. Tovitumaḡana Tuveka yana Ka kana kiyakiyaya si fufufuniya keta yota si kawakawanunukuwa.

⁴³Yenusanema kana matatafu tovanama si kitisiya tonowana kiyakiyaya kafa nuwatabau yagwanisi si savisavivinisiya eketa Guyau kana vimogumogu i nakatamoka nenesiyai.

⁴⁴Tovitumaḡana si yokoyokowa eketa iba matatafuna si vivitukuwa tamo nenei.

⁴⁵Atu tunisi yasi fwayafwaya be nogonogo si vivikimwaneina eketa unaunasi aviyaonana na kasi dauna nukusi, noko gabaninama si venivenisiya.

⁴⁶Tovatova Numa Kodukodu nenei si vivikaninisaḡa. Eatu ka fasinei o yasi numai semwanai yota nuwasobuwai si kakaviyaowa.

⁴⁷Guyau si davadaviya eketa namoḡa matatafusi tovitumaḡana si vifotuwisiya. Naki tovatova namoḡa gifafafana si ninisaiya keta Tuveka tovitumaḡana kasi yoko i gigivinakasiya.