Pakeke 2:13-47

¹³Aveto toko pelie ako o kelelal or ma o ri ve “Ken, ava areke o thin thei engenga ma otheki vaisis.”

¹⁴Pita i mit tomo nge ithanga or mule pa omole pothoi omole. Na i pres na i ritet nge toko na sengre ve, “Thomu Judare na thomu toko elonga ako o voth a Jerusalem, o ta telngomu e lek riong mo lomumu mire nge ur aken.

¹⁵Thomu o ri ve va toko areke o thin thei engenga, aveto avele. Nang meta rongan i el inga limpenel rulpo.

¹⁶Aveto God ile riong elnga nomenganga ina Joel i ritet nomenga nge ur ake i velpol ma i ri ve,

¹⁷“‘God i ri vene: Toth nge nang patopalalnga aro tho paru Onik Riringa a toko na sengre nge. Mo aro tutumuere o ripot lek riong. Na lomu kulpopoere aro o thopol pathengaling rel relnga. Na lomu toloklokere aro o thopol oni theongre.

¹⁸Naro tho paru Onik Riringa a lek toko na seng omaingare nge, mo aro o ripot lek riong nge nang areken.

¹⁹Aro tho oma pakukukaling pelie a sepsa na pathepolong a ulue na mla na won sesenga na won klunga aolonga aro o velpol.

²⁰Nang theki aro i eksingu mo ia mideng naro ngov i eksingu mo i selele ranga ve ini mla. Panen aro Toko Pomnga ile nang i velpol. Na ile nang aken i aolonga rintet na ini nang ako ini pakukukonga.

²¹Naro toko na seng areko o avav a Toko Pomnga iion, aro God i pamimi or.’ “Na i velpol ranga ve ako God ile riong elnga nomenganga a Joel, i ritet nge.

²²Jisas ako ini Nasareta ini toko ako God i patheng i a thomu nge, ma i papomnga i nge ako i oma paatealing na pathepolong na pakukukaling nge imeni ako ru a thomu nge, ako ranga ve lomumu mire nge lale.

²³Na God i panes vengveng ilemi ako nomenga i ri nge lale ve aro i sungu i a menumu na thomu o oma i ranga ve ako ilemi mire nge ako aro thomu o oma i a i nge, ako thomu o sungu i a toko le vothung kerengare omeni mo o pamona i a won ngoronga nge mo o pun rin i.

²⁴Aveto God i pamimi werera i ma i eltetpot rinong a sisisong a i nge. Eneke rinong i pavurvur aro ile mong i avele.

²⁵Na Devit kene i ri vene nge i, “‘Na tho thopol Toko Pomnga ako i voth tomo nge tho evelelnga. I voth tomo nge tho ma i paengeng tho taro ake o pakerenga tho avele.

²⁶Maken lemik sivenga nge ur ake ma tho ri nge lek lemi sivengaing. Na tho men tetal ol nge ile opoesaling e tho.

²⁷Eneke aro wong mothong lel onik a rinrinongare ole pen avele. Na wong mothong tova punapoaltun lom toko riringa mo ini peti i plot.

²⁸Wong pathengal tho nge mimiong a so lale. Naro wong voth tomo nge tho, naro nge aken, lek lemi sivengaing aro i aolonga.’

²⁹“Titeikre tho ritet vengveng a thomu nge, nge titevir a Devit ako ini nepes. Ako i rin lale ma o tetun i, na ia vuvepun i voth tomo nge it nomenga ma me i pavurvur ponange.

³⁰Devit ini a God ile riong elnga nomenganga, na ilemi mire nge ur areko God i kin ile riong nge ve i nunganga, ve aro panen God aro i pavelpol itevinga e mo aro i velpol ini nepes ranga ve ini i.

³¹Nomenga Devit i thepol ur areko lale ako aro God i oma i panen. Ma i ri nge toko ako God i ateal i ve aro i el werer or, ako nge ile los wereraing, nge ile riong ako i ritet nge nomenga ve, ‘God aro i mothong lel i mo ini peti i plot a rinrinongare ole pen avele.’

³²Na them vusnga them thopol ako God i palos werera Jisas ake lale.

³³Na God i ela Jisas lale ma i men ol a God ilo sei a imeni sivenga nge anga. Ma i el Oni Riringa ako Itema i pator i nge. Na ur ako thomu o thepol i na o nongpol i ini sungong ako Jisas i paru i a them nge.

³⁴Eneke Devit i esa a Pen a Urvet avele, aveto i ri vene, “‘God i ria ok Pomnga ve, “Ong men a menik sivenga nge,

³⁵i pavurvur ako aro la tho paeso lom ngarangre a som thewo.” ’

³⁶“Vene na thomu Israelre, aro lomumu mire senu nge ake. Nge a Jisas aton thomu o pamona i a won ngoronga nge, ake ini toko ako God i ateal i ma God i pavelpol i ako ini Toko Pomnga.”

³⁷O nongpol i ma riong aken i pun oopo. Ma o ria Pita tomo nge pakeke pelie ve, “Titeikre aro them vova ol?”

³⁸Ma Pita i ria or ve, “Thomu omole omole aro kimomu lelalpot lomu vothung kerenga na o el paninuong nge a Jisas Krais iion. Maken God aro ilemi simikal lomu vothung kerenga. Naro i sungu ol Ioni Riringa a thomu nge.

³⁹Eneke nomenga God i kin ile riong tomo nge thomu na nge tutumuere na areko o voth gat i pavurvur nge areko ar Pomnga a God aro i leng or a i nge.”

⁴⁰Pita i panongpol engeng or ma i tor mun or nge riong pulua ve, “Aro thomu o naktet thomu mo aro God i pamimi thomu nge ile paomelaling ako i es a toko kerengare nge.”

⁴¹Make tokokoere olemio nge a Pita ile riong. Mako o el paninuong. Nge nang aken tokokoere or 3,000 o eksing ole mimiong ma o rong esa mun toko lemioongare oa titaling.

⁴²Ma o engeng nge pakekere ole riong nongpolnga, na nge ole men pathunong, na nge ole an tomoing nge bret ako o rek rek i, na nge ole nongong.

⁴³Na God i oma pakukukaling na pathepolong pulua a pakekere omeni. Ma or alavusnga o papomnga or tomo nge ngangeong.

⁴⁴Ma toko lemioongare o men pathunal pel nge nang elonga. Na ole ur elonga ake ini or vusnga oa ol.

⁴⁵Ma aro o sungpot ole ulue na ole ur elonga nge toko e ako mo i ol i, ma o el umtun nge ma o thomreu umtun aken nge tokokoe areko o poor nge ur elonga.

⁴⁶Nge nang elonga o es tomo e pel a Lotu Tepun a Vel. Ma o es a ole vel omole omole ma o an tomo nge bret ako o rek rek i. Ma olemi i ngo pis ma o vual nge lemi sivengaing.

⁴⁷Evelelnga o risea a God iion. Ma toko na seng olemi sivenga ol nge or. Nge nang elonga God i ela mun toko na seng areko i pamimi or ma i rong esa mun toko lemioongare oa titaling nge la.