Acts 2:13-47

¹³Saba, pipiya mutusi wai si binamisi ba si wonawona, “Nikosi pipiya wine si toma saki.”

¹⁴Damanina ba Peter apostle asi 11 yabata si msiri, ba gamona kaikaponai i parara koroto kurisi, “Komi Jew biyimi ba iyabomi wata Jerusalem kamonai ko mamana wai ereonowami koi tainabaenega kabitam kuriku ba ani sisiya.

¹⁵Nikosi sebasebare wai kega si toma neganega. Niko karaku wata mom mara i tom, ba kao wai 9:00.

¹⁶Kega, nikona wai peroveta Joel matapa wata i sisiyei,

¹⁷‘God i wona, “Mara damonai au Kanuma ani utusewai pipiya ereonowasi kurisi. Natunatumi bibaine ba sebasebare sini peroveta wona, ami yaraka aba kinakinanai sina kinana, ba ami magumagura sina bo meumeu.

¹⁸Ba kosi marasiyai, au saibisaibirisi, sebasebare ba bibaine au Kanuma ana utusewai kurisi ba sini peroveta wona.

¹⁹Ba yebo sapama kaidamonai kituruba ana wose ba matakira dobu kamonai ani beyena. Tara ba keyama kai karakarasina ba kasu guba rutainina.

²⁰Kao ini baidibari ba nawaravi ina botaratara, ba muri yai Bada ana mara kaikapo sakina ba kadakadarina ina botu.

²¹Ba iyabosi wata Bada kana wabai tebi yoereana wai sina yawasa.” ’”

²²Damanina ba Peter i sisiya mena i wona, “Israel biyimi, nikona ko nonori, God wai Iesu Nazareth biyina i debei kata kiyakiyaya, kituruba ba matakira ereonowana i wose wai ko kuiri.

²³Ba niko sebare kona God matapa naki i kuiri ba i damaninei wai pipiya kawa kasekasesi si baisimi wai komi ko kasibunui, ba korosi yai ko tuparatui.

²⁴Saba God rabobo ai ibo bimsiri meyei, ba rabobo ana sini nomosa kamonai i tombubauni, kairawina rabobo kega rubana ita botawani.

²⁵Ba David kona pipiyina i sisiyei, ‘A kuiri kata Bada wai mamanina naoku ai ba kasaku ai e mamana, kona kairavina kega ana nota kabakabai.

²⁶Kona kairavina nuwanuwaku wai nuwagaire i bonuwa, ba kawaku ai ana bokabakabari! Ba tupuviku nuwanubai yebo ini yakam.

²⁷Basuna kega karawagai kuna tere bigaruiku, kona kega am Baibaiyawasina Kaobaisiyena kuna kita bigarui ina paga.

²⁸Ba yawasa ketana kui beyiku ba kamoku ai ke mamana wai nuwagaire e bibonuviku.’”

²⁹Damanina Peter i sisiya mena, “Warewaresiku, ere tepatoraku a wonewonimi kata tamata naki David i rabobo ba si dogui wai kana karawaga nade gubai karaku patana e mamana.

³⁰Ba saba kona wai peroveta, ba i kuiri kata God matapa ana kaobiyoyobana maragasina i terei, kata mara murinai wai nosinosina kesana, taupauma ana aba makimakirai ina terei ina makira.

³¹Matapa awaika naonai i kinakinani wai Iesu ana bomsirina i bisisiyei, kata kona ‘Iesu wai kega karawagai si tere bigarui, kona tupuvina si kita bigarui i paga.’

³²Ba God, Iesu rabobo ai ibo bimsiri meyei wai bisuwona ereonowata mata basutiyai ta kinani.

³³Ba kona i bokabari i gae God kasaunai e makimakira, kata Tamana i kaobaiyoyobani wai gwabinai Kanuma Kaobaisiyena i yauni, ba i utusewai kurita kata karaku ko kinakinani ba ko nonori.

³⁴Ba David kega tupuwai i gae ku sapama saba i wona, ‘Ba Bada i wona au Bada kurina, “Nina kasuku ai ke makira,

³⁵yepo kam abiya ku kae gaburim ana terisi am aba utukikita.” ’

³⁶Kona kairavina Israel biyisi ereonowasi sina kuira kabitamni kata niko Iesu ko tuparatui wai, God i wosei Bada, ba yebo Baibai yawasina Kaobaisiyena.”

³⁷Maranai pipiya nikona si nonori wai nuwanuwasi i yara saki, ba Peter ba apostle mutusi kurisi si wona, “Warewasikai, kata awaika kana wosei?”

³⁸Peter i kaobeyisi i wona, “Ereonowami kesakesasike wata Iesu Keriso kana wabai ami piragagoyosi yai koi nuwabirabira ba ko babataito, kata God ami piragagoyo ina notataveyisi. Ba kami puyo wai Kanuma Kaobaisiyenai kona yauni.

³⁹Niko kaobiyoyobana wai komi ba natunatumi kairavimi, ba iyabosi wata rabarabai te mamana wai ereonowasi, ata Bada God ina yorisi wai yebo yabata.”

⁴⁰Ba sisiya pesarisi yai i kaobitaraparanisi, ba i kao tutou kurisi, i wona, “Ko tombubauna meyimi, ba kega niko kimta asi goyona sarobina ku kamona kona riu.”

⁴¹Ba Bada wonana iyabosi si geruwei wai si babataito kata kona kaonai pipiya 3,000 rubana asi ku koroto mena si riu.

⁴²Ba apostle asi ku bibeyebeyena mena si yapaiki ba sibi kesanisi, si bikambira ba si rupari yabata.

⁴³Ba ereonowasi wai bokuwaya ba nagara i bonuvisi, ba apostle kituruba ba kiyakiyaya ba matakira pesarisi si wose.

⁴⁴Ba bigeruwana biyisi ereonowasi mamanina, sibi kesanisi ba asi sawara ereonowana debai sibi kodei.

⁴⁵Asi sawara si bigimona, ba manesi iyabosi karisi yai kega wai si bereberisi.

⁴⁶Mara kau ereonowana God ana yove kamonai sibi kesanisi ba sibo pepeta, ba asi yove yai sibi kambira ba nuwasisirai ba nuwagaire yai si kam yabata.

⁴⁷God sibo kabakabari, ba pipiya asi gairena si kitai wai si kaobigegaenisi. Kao patepatena Bada iyabosi asi yawasa si berena wai bigeruwana biyisi asi koroto ibi rakasi.