Buk Song 72:6-11

⁶Yu ken mekim king i kamap gutpela man, bai pasin bilong en i gutpela olsem ren i save kam daun long ol gaden na kaikai i kamap gutpela.

⁷Na taim em i stap yet ol manmeri i ken bihainim stretpela pasin tasol. Taim mun i lait yet, planti gutpela samting i ken kamap.

⁸Em bai i stap king na bosim olgeta manmeri long hap bilong solwara i stap klostu na i go inap long solwara i stap longwe. Na mak bilong graun bilong en i ken stat long wara Yufretis na i go inap long olgeta hap bilong graun.

⁹Ol manmeri i stap long ples drai i gat wesan bai ol i stap aninit long dispela king. Na ol birua bilong en bai ol i slip stret long graun.

¹⁰King bilong Spen na ol king bilong ol ailan nabaut, bai ol i givim presen long em. Na king bilong Arebia na king bilong Seba, bai ol i bringim takis long em.

¹¹Olgeta king bai i brukim skru long em. Na olgeta lain manmeri bai i mekim wok bilong en.