Buk Song 34:12-22

¹²Yu laik bai laip bilong yu i kamap gutpela? Na yu laik bai yu stap laip longtaim tru, na yu stap gut na amamas?

¹³Sapos yu laik i stap olsem, orait yu no ken mekim tok nogut, na yu no ken tok giaman.

¹⁴Yu mas givim baksait long pasin nogut, na bihainim gutpela pasin tasol. Yu mas wok long kamap wanbel wantaim ol arapela manmeri na yu mas strong long bihainim dispela pasin.

¹⁵Bikpela i save lukautim ol stretpela manmeri, na em i save harim beten bilong ol.

¹⁶Tasol Bikpela i no save laikim ol manmeri nogut. Na bai em i kilim ol i dai na ol manmeri i no tingim ol gen.

¹⁷Ol stretpela manmeri i save beten long Bikpela na em i save harim ol. Em i save helpim ol na hevi i no daunim ol.

¹⁸God i save stap klostu long ol manmeri i gat hevi. Na em i save helpim ol manmeri bilip bilong ol i bagarap.

¹⁹Planti hevi i save kamap long stretpela man, tasol Bikpela i save helpim em na ol dispela hevi i no daunim em.

²⁰Bikpela i save lukautim em olgeta, na i no gat wanpela bun bilong en i bruk.

²¹Ol kain kain samting nogut bai i kilim i dai ol man nogut. Na Bikpela bai i mekim save long ol man i save birua long ol stretpela man.

²²God i save kisim bek ol wokman bilong en na ol i stap laip. Na olgeta manmeri i bilip long em i lukautim ol, bai ol i no inap lus. Nogat tru.