Buk Song 33:4-21

⁴Tok bilong Bikpela i tru olgeta. Em i save bihainim stretpela pasin na mekim olgeta wok.

⁵Bikpela i laikim olgeta gutpela pasin na olgeta samting i stret. Oltaim Bikpela i save laikim olgeta manmeri bilong graun.

⁶God i bin tok tasol, na san na mun na ol sta i kamap long skai. Em i tok tasol na olgeta samting i kamap antap.

⁷Em i kisim solwara na bungim long wanpela hap tasol, olsem man i pulimapim wara long wanpela sospen tasol. Em i mekim as bilong solwara i stap daunbilo tru long ples bilong en.

⁸Olgeta manmeri long graun i mas pret long Bikpela na i stap aninit long em.

⁹Long wanem, em i bin tok tasol, na dispela graun i kamap. Em i mekim strongpela tok, na olgeta samting i stap.

¹⁰Bikpela i save mekim tingting bilong ol lain manmeri i go lus nating. Ol manmeri i save pasim tok long wokim wanpela samting, na em i save pasim rot bilong ol na ol i no inap mekim.

¹¹Tasol taim Bikpela i tok long mekim wanpela samting, orait tok bilong en i stap strong oltaim. Em i tingting long mekim wanpela samting, na dispela tingting i stap oltaim oltaim.

¹²Ol dispela lain Bikpela i stap God bilong ol, ol i ken amamas. Ol dispela manmeri em i makim bilong em yet, ol i ken amamas.

¹³God i stap long heven na i lukluk i go daun. Em i lukim olgeta manmeri.

¹⁴Em i stap king long ples bilong em, na i lukluk i go daun long olgeta manmeri bilong graun.

¹⁵Em yet i save kamapim tingting bilong olgeta manmeri, na em i save lukim olgeta pasin ol i mekim.

¹⁶King i no save winim pait na rausim ol birua long strong bilong bikpela ami tasol. Soldia i no save winim ol birua long strong bilong em yet.

¹⁷Ol hos bilong pait i no inap helpim ol soldia long winim pait. Strong bilong hos i no inap kisim bek ol soldia i lus long pait.

¹⁸Tasol harim. Bikpela i save was long ol manmeri i stap aninit long em.

¹⁹Em i save lukautim ol dispela manmeri bai ol i no i dai. Na em i save givim kaikai long ol long taim bilong hangre, bai ol i no ken i dai.

²⁰Yumi wetim Bikpela i helpim yumi. Bikpela tasol i save helpim yumi. Em i olsem hap plang bilong pait na yumi hait long em.

²¹Yumi bilip tru long gutpela nem bilong em. Olsem na yumi amamas long em.