Buk Song 18:32-48

³²God tasol i save mekim mi i sanap strong Na em i save lukautim mi gut long taim mi wokabaut.

³³Em i mekim mi i wokabaut gut tru olsem ol wel abus antap long ol maunten, na mi no inap pundaun.

³⁴Em i skulim mi long pasin bilong pait, na em i mekim han bilong mi i strong. Mi inap taitim strongpela banara ol i wokim long bras.

³⁵Bikpela, yu bin kisim bek mi long han bilong ol birua. Yu givim mi hap plang bilong yu na mi hait i stap baksait long en. Yu bin holim han bilong mi na mi sanap strong. Yu bin bekim singaut bilong mi, olsem na mi gat biknem long ai bilong ol manmeri.

³⁶Yu bin givim gutpela rot long mi na lek bilong mi i no wel. Mi wokabaut na mi no pundaun.

³⁷Mi bin ranim ol birua na holimpasim ol. Mi mekim save tru long ol na mi pinisim ol olgeta.

³⁸Mi sutim ol na ol i pundaun. Ol i slip i stap klostu long lek bilong mi, na ol i no inap kirap gen.

³⁹Yu givim mi strong bilong pait. Na yu putim ol birua long han bilong mi, na mi winim ol.

⁴⁰Yu mekim ol birua i tanim baksait na i ranawe long mi, na mi pinisim ol dispela man i no laikim mi.

⁴¹Ol i singaut long ol man i mas i kam helpim ol, tasol i no gat man i stap. Ol i krai long Bikpela, tasol em i no harim prea bilong ol.

⁴²Mi bagarapim ol tru na ol i kamap olsem das win i tromoi i go nabaut. Mi rausim ol birua i go na ol i stap nating olsem graun malumalum i stap long rot.

⁴³Taim ol manmeri i birua long mi, yu bin helpim mi na ol i no bagarapim mi. Na yu larim mi i stap bosman bilong ol arapela lain manmeri tu. Ol manmeri mi no bin save long ol, nau ol i stap aninit long mi.

⁴⁴Ol manmeri bilong ol arapela kantri i harim tok long biknem bilong mi, na wantu ol i aninit long mi. Ol i pret long mi, na ol i kam brukim skru long mi.

⁴⁵Strong bilong ol i lus pinis, na ol i lusim ol strongpela taun bilong ol, na ol i guria guria i kam long mi.

⁴⁶Bikpela i stap oltaim. Em i olsem bikpela ston i banisim mi, olsem na yumi mas litimapim nem bilong em. God i save kisim bek mi, olsem na yumi mas litimapim biknem bilong em.

⁴⁷God i bin bekim pasin nogut bilong ol birua bilong mi. Na em i putim ol arapela lain pipel i stap aninit long mi.

⁴⁸Na em i kisim bek mi long han bilong ol birua. Tru tumas, Bikpela, yu bin givim biknem long mi long ai bilong ol birua bilong mi. Yu bin helpim mi na ol man bilong pait i no kilim mi i dai.