Buk Song 18:13-42

¹³Bikpela i stap long heven na i bikmaus moa yet olsem klaut i pairap. God Antap Tru i autim tok bilong en, na ol hap paia na ren ais i sut i kam daun.

¹⁴Em i mekim lait bilong klaut i kamap olsem ol spia bilong en, na em i sutim ol birua na ol i ranawe nabaut.

¹⁵Bikpela, yu krosim ol birua na belhat bilong yu i olsem strongpela win i sakim ol. Na belhat bilong yu i mekim solwara i drai olgeta, na ol samting bilong strongim graun i kamap ples klia.

¹⁶Bikpela i stap antap na i putim han i kam daun na i kisim bek mi. Bikpela si i karamapim mi tasol em i pulim mi i kam antap.

¹⁷Ol birua bilong mi i strong tru na mi no inap winim ol. Tasol Bikpela i kisim bek mi long han bilong ol.

¹⁸Bipo taim nogut i painim mi na ol birua i kam pait long mi. Tasol Bikpela i bin was long mi.

¹⁹Em i bin helpim mi na mi stap gut. Em i laikim mi tumas, olsem na em i kisim bek mi.

²⁰Mi bihainim stretpela pasin, olsem na Bikpela i givim mi planti gutpela samting. Mi no mekim wanpela rong, olsem na God i mekim gut long mi.

²¹Mi bihainim gut lo bilong Bikpela. Mi no bin givim baksait long God bilong mi na mekim pasin nogut.

²²Mi bin tingting oltaim long ol lo bilong en, na mi no bin sakim gutpela tok bilong en.

²³Em i save, mi no gat wanpela asua. Mi bin was gut long wokabaut bilong mi, nogut mi mekim wanpela rong.

²⁴Olsem na Bikpela i tingim stretpela pasin bilong mi, na em i bekim gutpela pasin long mi, long wanem, mi stap klin long ai bilong em.

²⁵Bikpela, sapos man i no lusim yu, orait yu no save lusim em. Sapos man i mekim stretpela pasin na i no gat asua, orait yu save bekim stretpela pasin tasol long em.

²⁶Sapos wanpela man i bihainim klinpela pasin, orait yu save soim em klinpela pasin bilong yu. Tasol sapos man i bihainim pasin nogut, orait yu save bekim nogut long em.

²⁷Yu save kisim bek ol manmeri i daunim ol yet. Tasol yu save daunim ol manmeri i litimapim nem bilong ol yet.

²⁸God, Bikpela, yu save givim lait long mi, na yu save rausim tudak long mi.

²⁹God, sapos yu helpim mi, bai mi inap daunim bikpela lain birua. Na sapos yu strongim mi, bai mi inap kalapim bikpela banis bilong taun.

³⁰Pasin bilong God i gutpela tru na i stret olgeta. Sapos em i promis long mekim wanpela samting, orait tok bilong en em i tru olgeta. Bikpela i olsem hap plang bilong pait, na em i save lukautim gut olgeta man i go long em na ol i hait long ol birua.

³¹Bikpela tasol em i God tru. Em wanpela tasol i banisim yumi olsem bikpela ston.

³²God tasol i save mekim mi i sanap strong Na em i save lukautim mi gut long taim mi wokabaut.

³³Em i mekim mi i wokabaut gut tru olsem ol wel abus antap long ol maunten, na mi no inap pundaun.

³⁴Em i skulim mi long pasin bilong pait, na em i mekim han bilong mi i strong. Mi inap taitim strongpela banara ol i wokim long bras.

³⁵Bikpela, yu bin kisim bek mi long han bilong ol birua. Yu givim mi hap plang bilong yu na mi hait i stap baksait long en. Yu bin holim han bilong mi na mi sanap strong. Yu bin bekim singaut bilong mi, olsem na mi gat biknem long ai bilong ol manmeri.

³⁶Yu bin givim gutpela rot long mi na lek bilong mi i no wel. Mi wokabaut na mi no pundaun.

³⁷Mi bin ranim ol birua na holimpasim ol. Mi mekim save tru long ol na mi pinisim ol olgeta.

³⁸Mi sutim ol na ol i pundaun. Ol i slip i stap klostu long lek bilong mi, na ol i no inap kirap gen.

³⁹Yu givim mi strong bilong pait. Na yu putim ol birua long han bilong mi, na mi winim ol.

⁴⁰Yu mekim ol birua i tanim baksait na i ranawe long mi, na mi pinisim ol dispela man i no laikim mi.

⁴¹Ol i singaut long ol man i mas i kam helpim ol, tasol i no gat man i stap. Ol i krai long Bikpela, tasol em i no harim prea bilong ol.

⁴²Mi bagarapim ol tru na ol i kamap olsem das win i tromoi i go nabaut. Mi rausim ol birua i go na ol i stap nating olsem graun malumalum i stap long rot.