Buk Song 14:2-5

²Bikpela i stap long heven na i lukluk i go daun long ol manmeri. Em i laik painim sampela man i gat gutpela save na ol i wok long painim God.

³Tasol nogat. Olgeta i lusim gutpela rot pinis. Olgeta i wankain tasol, ol i man nogut tru. I no gat wanpela bilong ol i save mekim gutpela pasin. Nogat tru.

⁴God i tok olsem, “Ol dispela man i mekim pasin nogut, ating ol i no gat save, a? Ol i save pinisim ol manmeri bilong mi olsem ol i save kaikai bret. Na ol i no save beten long mi.”

⁵Tasol ol dispela man bai i pret nogut tru. Long wanem, God i stap wantaim ol man i bihainim tok bilong en.