Buk Song 139:7-15

⁷Bai mi go we na mi ken lusim spirit bilong yu? Na bai mi ranawe i go long wanem hap na mi ken hait long yu?

⁸Sapos mi go antap na mi stap long heven, yu stap long heven. Sapos mi go i stap long ples bilong ol man i dai pinis, yu stap long dispela ples tu.

⁹Sapos mi flai i go longwe long hap bilong sankamap, o sapos mi go i stap long wanpela ples i stap longwe tumas long hap bilong san i go daun,

¹⁰bai yu stap long dispela ples tu bilong stiaim lek bilong mi na bilong helpim mi.

¹¹Na sapos mi tok, “Tudak i mas haitim mi, na lait bilong san i raunim mi, em i mas kamap tudak,”

¹²maski, long tingting bilong yu tudak em i no olsem tudak tru. Na nait i save lait tru olsem san. Tudak na tulait i wankain tasol long ai bilong yu.

¹³Yu bin wokim olgeta hap bilong bodi bilong mi. Yu wokim mi olgeta insait long bel bilong mama.

¹⁴Mi pret long yu, olsem na mi save litimapim nem bilong yu. Olgeta samting yu wokim i narakain na i nambawan tru. Mi save gut long dispela samting na mi pilim tru.

¹⁵Taim mi kamap isi isi long ples hait insait long bel bilong mama, yu bin lukim olgeta bun bilong mi i kamap na i pas wantaim.