Buk Song 119:98-117

⁹⁸Lo bilong yu i stap wantaim mi oltaim na i givim planti save long mi. Na dispela i mekim mi i saveman tru na mi winim save bilong ol birua bilong mi.

⁹⁹Oltaim mi save tingting long tok tru bilong yu, olsem na mi kisim gutpela tingting tru, na mi winim ol tisa bilong mi.

¹⁰⁰Na save bilong mi i winim save bilong ol lapun, long wanem, mi save bihainim stretpela lo bilong yu.

¹⁰¹Mi surik long bihainim pasin nogut, long wanem, mi laik bihainim tok bilong yu tasol.

¹⁰²Yu yet yu bin lainim mi long ol tok bilong yu. Olsem na mi no lusim dispela tok.

¹⁰³Hani i save swit long maus bilong mi, tasol tok bilong yu i swit moa yet.

¹⁰⁴Lo bilong yu i save givim gutpela tingting long mi, olsem na mi no laik tru long olgeta pasin nogut.

¹⁰⁵Tok bilong yu i olsem lam bilong helpim mi long wokabaut stret, na i olsem lait bilong soim rot long mi.

¹⁰⁶Mi promis pinis bai mi bihainim olgeta stretpela tok bilong yu. Orait bai mi mekim olsem. Mi no ken giaman.

¹⁰⁷Bikpela, harim. Bikpela pen tru i karamapim mi. Yu mas mekim mi i stap laip olsem yu bin promis.

¹⁰⁸Bikpela, mi prea na givim tenkyu long yu. Yu ken kisim tenkyu bilong mi, na skulim mi gut long tok bilong yu.

¹⁰⁹Oltaim mi redi long lusim laip bilong mi. Tasol mi no lusim tingting long lo bilong yu.

¹¹⁰Ol man nogut i taitim umben bilong holimpas mi. Tasol mi no lusim tok bilong yu.

¹¹¹Mi save holim tok bilong yu oltaim oltaim. Na dispela tok i save mekim bel bilong mi i amamas tru.

¹¹²Mi tok pinis bai mi bihainim olgeta lo bilong yu inap long taim mi dai.

¹¹³Mi no save laikim ol man i giaman long bihainim yu. Tasol mi laikim tumas lo bilong yu.

¹¹⁴Yu tasol yu wasman bilong mi na strongpela banis bilong mi. Mi save bilip long promis bilong yu.

¹¹⁵Yupela manmeri bilong sin, lusim mi. Mi laik bihainim lo bilong God bilong mi.

¹¹⁶Yu promis pinis bai yu strongim mi na mi stap laip, na mi bilipim promis bilong yu. Givim dispela strong long mi, nogut bilip bilong mi i lus nating.

¹¹⁷Holim han bilong mi na bai mi stap gut. Na oltaim bai mi putim gut yau bilong mi long tok bilong yu na bai mi bihainim.