Buk Song 119:164-173

¹⁶⁴7-pela taim long olgeta de mi save tenkyu long yu long ol stretpela tok yu mekim long kot.

¹⁶⁵Ol manmeri i laikim tumas lo bilong yu, ol i stap gut tru, na i no gat wanpela samting inap mekim ol i pundaun.

¹⁶⁶Bikpela, mi wetim yu i kisim bek mi, na mi mekim pasin olsem yu bin tok.

¹⁶⁷Mi save bihainim ol lo bilong yu. Mi laikim tumas ol dispela lo.

¹⁶⁸Mi save bihainim olgeta lo na olgeta tok bilong yu, na yu save lukim olgeta pasin bilong mi.

¹⁶⁹Bikpela, harim mi i singaut long yu long helpim mi. Givim gutpela save long mi, olsem bipo yu promis pinis long mi.

¹⁷⁰Putim yau long prea bilong mi, na kisim bek mi olsem bipo yu tok.

¹⁷¹Yu save skulim mi gut long olgeta lo bilong yu, olsem na bai mi litimapim nem bilong yu oltaim.

¹⁷²Mi bai singim song long lo bilong yu, long wanem, olgeta lo bilong yu i stretpela tasol.

¹⁷³Mi save bihainim lo bilong yu, olsem na yu mas redi long helpim mi oltaim.