Buk Song 119:131-144

¹³¹Mi laikim tru lo bilong yu, na bel bilong mi i kirap moa yet long bihainim.

¹³²Yu mas kam na marimari long mi. Yu save mekim olsem long olgeta manmeri i laikim yu.

¹³³Yu mas was long mi bai mi no ken pundaun long sin, olsem bipo yu promis long mekim. Yu no ken larim pasin nogut i winim mi.

¹³⁴Kisim bek mi, na ol man i wok long daunim mi, ol i no ken bagarapim mi. Olsem na mi ken bihainim tok bilong yu.

¹³⁵Yu ken i stap klostu long mi, na skulim mi long olgeta lo bilong yu, na mekim gut long mi.

¹³⁶Mi krai planti na aiwara bilong mi i ran moa yet, long wanem, ol man i no bihainim lo bilong yu.

¹³⁷Bikpela, yu stret olgeta, na olgeta lo bilong yu i stretpela tasol.

¹³⁸Olgeta lo yu givim mipela i stretpela na gutpela tasol.

¹³⁹Ol birua bilong mi i no save tingting long tok bilong yu. Olsem na bel bilong mi i hat olsem paia.

¹⁴⁰Promis bilong yu i tru, na mi traim pinis. Olsem na mi, wokman bilong yu, mi save laikim tumas dispela promis.

¹⁴¹Mi man nating na ol man i tok bilas long mi, tasol mi no save lusim tingting long lo bilong yu.

¹⁴²Stretpela pasin bilong yu i stap oltaim oltaim, na lo bilong yu i tru olgeta.

¹⁴³Planti hevi i kamap long mi, tasol mi amamas long lo bilong yu.

¹⁴⁴Tok bilong yu i stretpela oltaim oltaim. Yu helpim mi bai mi kisim save long dispela tok na mi ken i stap laip.