Brabli Gudwan Song 5:6-16

⁶Aibin opinim det dowa blanga main olmen, bat im nomo bin deya na. Imbin gowei. Aibin lukabat blanga im, bat ai nomo bin faindim im, najing. Aibin jingat blanga im, bat im nomo bin ensim mi, najing.

⁷Detlot blijiman langa det taun bin faindim mi. Deibin beldimbat mi. Detlot blijiman hu oldei jandapbat langa det wol langa det taun, deibin pulumat main kout.

⁸Yu pramis mi ola gel blanga Jerusalem. If yu faindim main olmen, yu garra dalim im, mi brabli wori miselp, dumaji mi laigim im detmatj, en mi wandim im blanga kambek.

⁹Yu brabli purdiwan gel. Wanim yu reken? Yu olmen im mobeda langa najalot? Wanim brabli gudwan langa im? Wotfo melabat garra meigim det pramis langa yu?

¹⁰Main olmen mobeda langa ola najalot men, en im jidan brabli strongbala. Im mobeda langa ola najalot men.

¹¹Im feis brabli dakbala brom san, en brabli sofwan, en im heya brabli kerliwan en brabli blekwan laik det wakwak.

¹²Im dubala ai brabli purdiwan laik detlot waitwan dab, wen dei oldei washim miselp langa lilwan riba.

¹³Im feis garram gudsmel laik det gadin garram loda gudsmelwan medisin. Im mawus jis laik lili, wetwan garram brabli gudsmelwan medisin.

¹⁴Im bingga brabli gudwan, en im oldei werrimbat ring garram purdiwan ston ebriweya. En im bodi brabli shainiwan laik det smuthwan ston det jidan langa woda, en jis laik im garram loda bluwan ston ebriweya langa im bodi.

¹⁵Im leig laik strongwan pos. Im jidan laiga boswan king, en laik ola bigwan sidatri weya jandap brabli longwan langa Lebanan hil kantri.

¹⁶Im mawus brabli switwan blanga kis, en ai laigim im detmatj. Im meigim mi brabli gudbinji. Lagijat na main olmen im jidan, ol yumob gel brom Jerusalem!