Arókasi 24:36-52

³⁶Isãkirauatapanikana inakasaakina, Xesosi tokiã ninoa sauaki. —Erekaxinire hĩtxako —itxa.

³⁷Itikoãkatana. Ipĩkarauatana. Kamiri iuãkatarina.

³⁸—Kinirepa hĩtikoka? Kinirepa kamaxirepeka hĩtxa iĩkiteta?

³⁹Hãtamatariko niuako, nikiti pakini. Iuapitikarano nota. Himaãtakano. Kamiri !kaxiniri. Kamiri kona kapiri. Hãtamatano. Niĩtokara. Kamiri !nitxaua —itxa Xesosi.

⁴⁰Ininiã oerekari iuako, ikiti pakini ninoamoni.

⁴¹Ninoa iteene poxokoniuata, txamari !iteene !auikapanikarina atão Xesosi ininiua. Ininiã iuasaaki Xesosi pimaãna: —Nipokori aua hĩtemoni? —itxa.

⁴²Ininiã ninoa sikari ipixini ximaki kimitakori. Mapaã apaka isikarina.

⁴³Ininiã iua nikari ninoa apisatoõ. Iuasaaki ninoa imarotari atão Xesosi ininiua, kotxi kamiri !inikari nipokori.

⁴⁴Eereka iua misãkiretana ninoa: —Mitxi hĩtekata nauakasaaki, nisãpiretai ikinipoko nota pirena Teoso sãkire iõkatsopatakoriã. Noerekapekai hĩte Moisesini iõkatsopatakiti, Teoso sãkire sãpiretakani iõkatsopatakiti. Xikari iõkatsopatakori apaka noerekapekai. Imakinika ninoa sãpiretakiti nota pirena apokapeka.

⁴⁵Iuasaaki isikaimaroretana ninoa Teoso sãkire iõkatsopatakori imarotinina ĩkapani, ininiã iuasaaki ninoa imarotari atão.

⁴⁶Itxari: —Kitxakapirĩka iõkatsopatapeẽkaika: Teoso mereẽkiti atatsiirauatako. Okaãkako. Ipi ãti õtisaaki õkitikauako.

⁴⁷Kãkiti nisãkire auiãkani iaripiretariko niokanapirena erekari ikini itixiti. Merepanika Xerosareẽ auakanimoni isãpiretaãkako, eereka ikini itixiti auakanimoni isãpiretaãkako. Ninoa oerekariko kãkiti takanapiniri imaerekanina, ininiã iuasaakipeka Teoso makatxakariko maerekati ikamakitina.

⁴⁸Hĩkinika hĩte itikapekari nipinini. Hãtamatano nota iuaĩkana auãki ninini. Ininiã iteene himarotari nota pirena apanakini hĩsãpiretini ĩkapani.

⁴⁹Nota iokanatariko niri sikaenetakiti, Erekari Matamatakoti, hĩtemoni. Uai sitatxi hĩkaikotako. Hiãtapariko iua apokini. Ininiã hãpakapariko Teoso posotiire itano ĩkari —itxa Xesosi.

⁵⁰Xesosi anikari imoianariakori Petánia sitatxitimoni. Iuaã apokasaakina, Xesosi õkitikauakotaua. Itxari Teoso: —Niri, naia pinĩkata. Pitakari erekari naiamoni —itxa.

⁵¹Isãkirauatakasaaki, anikaãka Teoso tixinemoni.

⁵²Iuasaaki ninoa: —Peerekari Xesosi. Iuanoka Apiananiri —itxanãtana. Eereka Xerosareẽ ikanapiriãna ipoxokoniritikana.