Apostolop 2:29-44

²⁹Tie, inagat maulo Petro gare ro, “Papap pam, eba baistang uakap aime ea buang Devit: Irie la tiesong gare rie ga uvara ra ga memuam neip a na una Ierusalem. Ga iruo una ang la man ut ka, kabirana buo ga muio puoieng titot ga bubuo ganam la abit iruo.

³⁰Are ratmat ga paga la tiesong Devit a, la tale aime irie kan. Karuk. Tiesong aime Karisito. Iriro Devit, irie la unuli, ga okosarong Morowa mida ula mamaranu me aun ga ugama, ‘Migat tatuan, tubiat eba tabung kaguma ira a noba ma eap nuam meba irie ba orong onim Israel are ba nunuo.’

³¹Eva, Devit irie la ait iruo paga la eba akosarang Morowa tubiat ga ovaikang uro ait a Karisito la eba aving ga eba ina gat emung ga umirong gare ro, ‘Morowa la tale kan uaira Karisito meba onang na pianam maiong inamaniap la mevara, ga tale isam neip a.’

³²Iriro Karisito, irie Iesu. Uvara pa Morowa la ina imua na una. Ga pava ganam la agimapang la inim ga baispang o urio ties.

³³Aime irie Iesu, Morowa la uabua ra nakap ga unama na kilan a ila lamige. Ga Mamo la uala iruo Muranama Ila Babai aun Iesu, ga titot la ourukong kukunim a iruo Muranama are tinan la midaong. Are ratmat ga betong iruo paga ira pa titot ga agimaming ga mipta.

³⁴Aime Devit, irie la tale kan ula ga neip a na panbinim gare Iesu la ula nakap. Pa tiesong gare ro, “‘Morowa la aulo Ila Kakani ruang Iesu gare ro,

³⁵Nonang na kilan ila lamige ruang, puoieng la eba tabum karorap nuam meba maionang nopat.’

³⁶“Are ratmat ga mimi garip ganam onim Israel, omira maset ties tung la migat o. Iriro Iesu la asopming iro maiogun, Morowa la apuoong irie gare Ila Kakani ga irie Karisito.”

³⁷Urie, teip ga magaulap la mepto ties ang Petro ga osainmeng urio ties la are sakmes la mavureong migat dalap ma. Ga amelo Petro ga non Apostolop, ga megama, “O papap pam, eba akosarpang mani meba tale pakiraraang Morowa?”

³⁸Pa maulo Petro gare ro, “Mialam ibup mi narit narit ira ma tavukup mim mila kiram ga marigiming dalap mi me aun Morowa. Ga omila nuvietiap iro bonim a Iesu Karisito. Leba okosarming gare ro, tie eba maduratang Morowa mirie kirinimup mim ga eba alang Muranam Ila Babai ang miun.

³⁹Ume iriro mida, Morowa Ila Kakani buang irie la midaong meba alang Muranama Ila Babai miun ga maun lop mim ga maun inamaniap gat la mavuvuoong ga mamarikong. Ga eba alang uriro mida miun ga maun inamaniap gat la maionama kakaliat.”

⁴⁰Petro la man masinguala teip ga magaulap ma non gat tiesiap ga imum agarip maiang gare ro, “Iriro gar ma inamaniap titot, la mime makosar non ara non ara tavukup mila kiram la eba makiraraang Morowa. Are ratmat ga buat makosarming tavukup mila kiram ga ebun mikiram ga mirie! Karuk kan. Leba are ba rie, eba milagiang Morowa kabirana a iruo gar ma inamaniap mila kiram!”

⁴¹Tie, teip ga magaulap la maiario ties ang Petro ga omela nuvietiap. Na urie la, uvas ma teip ga magaulap la maiobu na gar ma teip ga magaulap la naganmeng ira a Iesu la puomeng gare 3,000 ma inamaniap.

⁴²Urie, mirie teip ga magaulap la mamaranim la mepto ties maiong Apostolop, ga nebolameng un namurit dalap ga opakomela purun ga iat marikmeng.

⁴³Ga Morowa la ualo kukunim maun Apostolop ga makosarmeng papot ma pagap o kukunim ga kagup onim na panbinim. Are ratmat ga mirier teip ga magaulap ganam la magimameng ga merau migat.

⁴⁴Ga teip ga magaulap la naganmeng ira Iesu la mime nebola iat, ga pagap maiam narit narit la tale mime mabuga namo maiam kan. Karuk. Leba kages ang migana ba a paga ba kabirana ma, eva noba ma leba agamelie ga mavuotmeng pagap maiam me aun.