Apostolo 16:12-40

¹²Aŋga tonaŋ jaasa Romnêŋ malac wakuc Pilipi, taŋ kêtu Makedonia ŋamalacsêga naŋ, ma aŋgôŋ malac tonaŋ bêc ŋagêdô.

¹³Go gêdêŋ sabat aêac asa malac ŋamagê aja e aô lasê bu teŋ, gebe aêac taêŋ gêjam gebe teteŋ mec ŋamala oc gêc tonaŋ. Aêac aŋgôŋ sic ma asôm biŋ gêdêŋ lauo, taŋ sêkac tau ŋ sa naŋ.

¹⁴Ma awê teŋ, nê ŋaê Ludia, gêmoa; naŋ gêjam sakiŋ Anôtô. Eŋ aŋga malac Tuatira ma kêtulu obo asôsamuc. Eŋ gêŋô biŋ tau ma Apômtau kêlaiŋ ênê ŋalêlôm e kêkêŋ taŋa biŋ, taŋ Paulu kêsôm naŋ.

¹⁵Asagu eŋ to nê lau su, go keteŋ aêac ma kêsôm gebe “Embe alic aê kakêŋ gêwiŋ Apômtau ŋanôgeŋ, naŋ asô mêŋaŋgôŋ ŋoc andu,” ma kêkac aêacgeŋ.

¹⁶Ŋabêc teŋ aêac abe ana mec ŋamala tonaŋ. Asêlêŋ amoa e adac sakiŋwagao teŋ toŋalau geoc biŋ lasêŋa. Awê tonaŋ geoc biŋ lasê gêdêŋ lau ma sêkêŋ ŋaawa taêsam gêdêŋ ênê ŋatui.

¹⁷Awê tau kêdaguc aêac to Paulu ma gêmôêc gebe “Lau tonec têtu Lôlôc Ŋatau Anôtô nê sakiŋwaga, tec sêwa lêŋ Anôtô ênam ŋamalac kêsiŋa sa êndêŋ amac.”

¹⁸Awê tau kêsôm biŋ tonaŋ e tobêc-tobêc, tec Paulu têtac ŋandaŋ kêkac tau ôkwi ma kêsôm gêdêŋ ŋalau gebe “Aê jajatu aôm gajam Jesu Kilisi laŋô gebe ôwi awê tonaŋ siŋ ôsa ôna.” Ma gaôgeŋ ŋalau tau gêwi eŋ siŋ kêsa gêja.

¹⁹Awê tau nê ŋataui sêlic nêŋ awa ŋamôkê gêc gêja, tec sêkôc Paulu agêc Sila tôŋ ma sê êsêagêc sêsa malacluŋ dêdêŋ kasêga sêja.

²⁰Go sêwê êsêagêc dêdêŋ gôliŋwaga sêja ma sêsôm gebe “Juda luagêc tonec mêŋsêli aêacnêŋ malac sa.

²¹Agêc têdôŋ mêtê teŋ amboac aêac lau Rom tatôm gebe takôc sa ma daŋgôm ŋa naŋ atom.”

²²Lau malacŋa sêbu êsêagêc sêwiŋ, tec gôliŋwaga sêkac êsêagêcnêŋ ŋakwê su ma sêjatu gebe si êsêagêc ŋa sêm.

²³Si êsêagêc ŋanô su acgom, go sêbaliŋ agêc sêsêp kapoacwalô sêja ma sêjac biŋsu ŋagejobwaga gebe ejop êsêagêc ŋapep.

²⁴Sêjac biŋsu ŋac tau amboac tonaŋ, tec kêbaliŋ êsêagêc sêsô andu kapoacwalôŋa ŋabalêm ŋaluŋŋa sêja ma kêkapiŋ êsêagêc eŋkaiŋ tôŋ ŋa ka.

²⁵Sêc e gêbêcauc gêja lu acgom, go Paulu agêc Sila teteŋ mec to sêjam nêŋ wê gêdêŋ Anôtô, ma lau kapoacwalôŋa sêŋô êsêagêc aweŋ sêwiŋ.

²⁶Sêgôm sêmoa e gaôgeŋ ôjô gêjam kapôêŋ, tec andu kapoacwalôŋa ŋaalê wiwic e katam samob gêlêc tau su sep tageŋ ma lau samob nêŋ kapoacwalô kêsu.

²⁷Ŋagejobwaga mata gêlac e gêlic kapoacwalô ŋakatam samob gêŋa, tec kêtaiŋ nê siŋ sa gebe êmbuc tau, gêjam kauc gebe lau kapoacwalôŋa oc sêc sêja.

²⁸Go Paulu gêmôêc awa kapôêŋ gebe “Ôjaiŋ taôm atom, aêac samob tec aŋgôŋ.”

²⁹Tec ŋac tau keteŋ gebe sêkôc ja sêmêŋ ma kêlêti kêsô gamêŋ ŋalêlôm gêja e jakêtênêp tau êndu-êndu gêu tau gêc Paulu agêc Sild eŋkaiŋŋa

³⁰ma gêwê êsêagêc sêsa awê sêja ma kêsôm gebe “O apômtauagêc, aê jaŋgôm asageŋ gebe Anôtô ênam aê kêsi.”

³¹Tec êsêagêc sêsôm gebe “Ôkêŋ êwiŋ Apômtau Jesu, go Anôtô ênam aôm to nêm gôlôac kêsi.”

³²Go agêc sêwa Apômtaunê mêtê sa gêdêŋ eŋ to nê lau samob, taŋ sêŋgôŋ ênê andu naŋ.

³³Gêdêŋ gêbêcauc ŋasawa tonaŋgeŋ ŋac tau kêkôc êsêagêc sa jakêkwasiŋ êsêagêcnêŋ sêm ŋamala ma gaôgeŋ êsêagêc sêsagu eŋ to nê lau samob.

³⁴Go kêkôc êsêagêc sêsô nê andu jakêkêŋ mo êsêagêc seŋ, ma tonê gôlôac samob têntac ŋajam samucgeŋ gebe sêkêŋ gêwiŋ Anôtôgac.

³⁵Geleŋŋa lasê, go gôliŋwaga sêsakiŋ nêŋ sakiŋwaga sêja sêsôm gebe “Ôwi ŋac luagêc tonaŋ siŋ.”

³⁶Tec gejobwaga kêdôŋ biŋ tau gêdêŋ Paulu gebe “Gôliŋwaga sêsakiŋ lau sêmêŋ gebe jawi amagêc siŋ. Amboac tonaŋ aêc tobiŋmalôgeŋ ana.”

³⁷Tec Paulu kêsôm gêdêŋ êsêac gebe “Aêagêc ŋac Romŋa, mago sêmasaŋ aêagêcma biŋ atom. ma si aêagêc akô malacluŋ to sêbaliŋ aêagêc asêp kapoacwalô. Ma galoc sebe sêkêŋ aêagêc kelecgeŋ ana me. Masigoc, amboac tonaŋ atom. Êsêac tauŋ sêmêŋ ma sêwê aêagêc asa ana.”

³⁸Sakiŋwaga tedôŋ biŋ tonaŋ gêdêŋ gôliŋwaga. Ac sêŋô ŋawae gebe êsêagêc ŋac Romŋa ma têtakê ŋanô.

³⁹Tec sêja sê biŋmalo êsêagêc, go sêwê êsêagêc sêsa sêja ma teteŋ êsêagêc gebe sêwi êsêacnêŋ malac siŋ.

⁴⁰Agêc sêsa aŋga andu kapoacwalôŋa ma gêdêŋ Ludia jasêlic lasitêwai ma sê biŋmalô êsêac sa su. go sêc sêja.