HECHOS 16:12-40

¹²Dá nɛxhe bʉ Neápolis bʉya nɛ dá sømhbe bʉ ra dąhnini Filipos, rán guat'i ra häi Roma. Nu ra hnini Filipos man'da ja rá ts'ɛdi xinda gue mi'da yʉ hnini bʉ ra häi Macedonia. Nɛ dám 'bʉhmbe bʉ 'da yʉ pa.

¹³Nɛ nu'bʉ ra pa ran säya dá pømhbe bʉ ja ra hnini, dá mbähmbe bʉ ja ra ndendąthe guepʉ ząnt'a min yąhʉ Oją yʉ ją'i. Nɛ dá huhmbe bʉ, dá xihmbe rám Hman Oją ʉ yʉ xisu ngue madím pɛti bʉ.

¹⁴Nɛ nu n'da ra xisu í Lidia ra mɛngu bʉ Tiatira, bi 'yøde 'bɛ'a dá mamhbe. Nu'a ra Lidia ra mbä'bø't'e na, i pä ra 'bø't'e xʉn jʉpoi ngue xʉn ho. Nu'a i ɛ̨c'yɛi nɛ mi numansu Oją, janangue'a bi xocua rá mbʉi da 'yøde xʉn ho 'bɛ'a bi man'a ra Pablo.

¹⁵Nu ra Lidia bin xixyą bʉya nɛ gätho 'bʉpʉ rá ngu. M'bɛjua bi xicähe: ―Nu'bʉ guí ɛ̨na majuąni dí ɛ̨c'yɛi ra Hmu mahɛ̨ts'i, ba ɛ̨hmbʉ ua ja ma ngu gam 'bʉhmbʉ ua 'da yʉ pa, bi 'yɛ̨nje. Nɛ bi 'yørcahe ts'ɛdi janangue'a dá mbähmbe.

¹⁶N'da ra pa nu'bʉ má mbähmbe bʉ ząi bi yąhʉ Oją yʉ ją'i, dán c'athe n'da ra hmute ra 'yɛ̨hɛ. Nu'a man ra 'yøde nangue ra zįthu min 'youi, nɛ mí tąha xʉn ngu ra mbɛti di un'dʉ yʉ́ hmu.

¹⁷Nu'a ra hmute mi tɛn'na ra Pablo nɛcähe. Bi mbafi bi 'yɛ̨na: ―Nuya yʉn 'yohʉ, yʉ́ mbɛfi Oją nuįxte thoho, i xängahʉ hague dán zä dam pøhmbʉ, bi 'yɛ̨na.

¹⁸Nɛ xʉn ngu yʉ pa ngubʉ mi øt' ra hmute. Madí xømbʉi ra Pablo nɛ bi xi'a ra zįthu min 'youi ra hmute: ―Nangue rá thuhu ra Jesucristo dami pøm bʉ rá mbʉi na ra hmute, bi 'yɛ̨mbi. 'Bexque bi bøn ra zįthu bʉya.

¹⁹Nu'bʉ mí pąh yʉ́ hmu ra hmute gue him man zä da dąp rán zäbi, bi bɛnt'a ra Pablo nɛ ra Silas, nɛ bi zixpʉ ja ra täi guepʉ 'bʉh yʉ zɛ'mi.

²⁰Nɛ nu'bʉ mi dä bʉ 'bʉh yʉ zɛ'mi, bi 'yɛ̨n'ʉ: ―Nuya yʉn 'yohʉ 'bʉcua, yʉ judío ya. Nɛ in nde di ts'on yʉ ją'i 'bʉcua ja ma hninihʉ.

²¹Nɛ i man yʉn t'øt'e gue hingui sä ga øthʉ, nguetho nujʉ dyʉ romanohʉ. Nɛ hin'yʉ man t'ɛ̨di ga øthʉ a i xijʉ, sä bi 'yɛ̨n'ʉ yʉ yąpate.

²²Nɛ bi munts' yʉ ją'i ngue nde da zʉ'ʉ. Nu yʉ zɛ'mi bʉya, bi manda da 'bøcua yʉ́ pahni, da mba m'bɛi ra Pablo nɛ ra Silas.

²³Nɛ nu'bʉ mi juadi ngue ɛ̨mmɛ xí 'bɛi, bi mba njot'i bʉ ja ra fädi. Nɛ bi sih ra mbängoxthi da mbädi xʉn ho.

²⁴Nu'bʉ min t'un ran t'ɛ̨di ra mbädi bi zixpʉ man'da mbo. Nɛ bi zɛmba yʉ́ gua bʉ ja ra fädiza.

²⁵Nu'bʉ mi zøm made ra xui bʉya, nu ra Pablo nɛ ra Silas min yąhʉ Oją nɛ bin tuh yʉ́ thuhu Oją. Nɛ gätho mi'da yʉ ofädi mi øde.

²⁶Nɛ 'dahmantho 'bʉ mi mbʉdi bin ja n'da ra 'yąnhäi, gue'bʉ go mi guhni yʉ́ guangu ra fädi. Gätho yʉ jut'i bin xozɛhɛ nɛ gätho yʉ t'ɛgui man thąt'i yʉ ofädi bin xozɛhɛ.

²⁷Nɛ nu'bʉ mi nuh rá mbängoxthi ra fädi, bi nu gätho nsoqui yʉ goxthi, bi gʉx rá juai bʉya gue nde xtín hyosɛ, nguetho mim bɛ̨ni ngue ɛ̨mbi gätho xí 'da'ʉ yʉ ofädi.

²⁸Pɛ nu ra Pablo nts'ɛdi bi mba't'i, bi 'yɛ̨mbi: ―O gadín ʉnba zɛhɛ nguetho gätho dí 'bʉcähe ua.

²⁹Nɛ nu'a ra mbängoxthi bʉya bi 'yä'a n'da ra sibi, bi yʉrpʉ mbo, nɛ ɛ̨mmɛ di fɛt'i nguetho min su. Nɛ bi yørpʉ ja rá gua ra Pablo nɛ ra Silas.

³⁰Nɛ bi gʉcpʉ thi ʉ, nɛ bi 'yänni: ―N'yohʉ aui 'bɛ'a sä ga øt'ä nguepʉ da zä dam pøcä, bi 'yɛ̨na.

³¹Nu ra Pablo nɛ ra Silas bi 'yɛ̨mbi: ―Dami däp ni mbʉi ra Hmu, ra Jesucristo, di pun'na ni ts'oqui, nɛ da zimanho i, nɛ'ʉ gätho 'bʉpʉ ni ngu, 'bʉ di däp yʉ́ mbʉi a, bi 'yɛ̨mbi.

³²Nubʉya bi xih rán ho ma'da'yo ra Cristo nɛ gätho 'bʉpʉ rá ngu.

³³Nɛ nu'a ra mbängoxthi nɛ gätho 'bʉpʉ ja rá ngu bin xixyą a ra xui a.

³⁴Nu'a ra mbängoxthi bʉya bi zix'a ra Pablo nɛ ra Silas bʉ ja rá ngu, nɛ bi 'uįni. Nɛ'a, nɛ gätho 'bʉpʉ ja rá ngu ɛ̨mmɛ bin johya nguetho bi 'yɛ̨c'yɛi Oją.

³⁵Nu'bʉ mí hyats'i, nu'ʉ yʉ zɛ'mi bi mbɛnh'dʉ yʉ asmayo da xih ra mbängoxthi da bøm bʉ ja ra fädi ra Pablo nɛ ra Silas.

³⁶Nɛ nu'a ra mbängoxthi bi xi'a ra Pablo bʉya: ―Nu yʉ zɛ'mi bá pɛnh ra nde ga xoc'aui. Nuya sä gui pømmi nɛ nte gui jaui, bi 'yɛ̨mbi.

³⁷Pɛ nu ra Pablo bi 'yɛ̨mbi: ―Nugä'be dí cą'be ran t'ɛ̨di bi bøm bʉ Roma, pɛ guehma bi 'bɛnzagä'be bʉ 'bʉh yʉ ją'i, nɛ him 'bɛ bi juąngä'be pɛ bi goctä'be. Nuya ha ɛ̨n'ʉ gui jʉgä'be ngue njon da nu. Hin'na, hingui sä. Bá xifi ba ɛ̨sɛ da xogä'be, bi 'yɛ̨na.

³⁸Nu yʉ asmayo bʉya bi mba bi xih yʉ zɛ'mi 'bɛ'a bi ma ra Pablo. Nu yʉ zɛ'mi nu'bʉ mi 'yøde ngue i cą yʉn t'ɛ̨di bʉ Roma a ra Pablo nɛ ra Silas bʉya, ɛ̨mmɛ bin su.

³⁹Nɛ nu'bʉ bá ɛ̨h yʉ zɛ'mi bʉya, bi xocuabi nɛ bi 'yäp ra punbi, nɛ bi xi'ʉ: ―'Yørcahe ra mate gui pømmi ua ja ra hnini, bi 'yɛ̨mbi.

⁴⁰Pɛ nu ra Pablo nɛ ra Silas 'bʉ mí bøm bʉ ja ra fädi, bi mba bʉ ja rá ngu ra Lidia. Nɛ nu'bʉ mi nu yʉ cu nangue ra Cristo, bi hąt ra ts'ɛdi yʉ́ mbʉi ʉ, nɛ bi mba bʉya.