Apostolo 15:2-25

²Paulo ani Banabasine eꞌe ḡoeꞌa igirotene, ꞌuguḡa haḡaiḡa mene haḡaiꞌuma radu, zeḡe teite taꞌiro titiro. Eꞌanoꞌo Antioka ekalesia azaḡaniꞌa Paulo zu Banabasi madu, nabudize nu teite Ierusalema neḡano tuḡuziꞌuma reiro, zeḡeꞌa apostolo azaḡa zu ekalesia vaze boroboro teite eꞌe ḡoeꞌa ḡoꞌanoga veize.

³Eꞌanoꞌo Antioka ekalesia azaḡaniꞌa Paulo duḡuru Ierusalema neḡano tuḡuziro. Ebu zeḡeꞌa Poinikia zu Samaria habaꞌa vitau onaminutene, nouge nouge Iuda mene azaḡaniꞌa Zuhiꞌa Boro mone ḡihuriroteꞌe hariḡa neḡaneḡano meꞌodo ziniro. Ebu Zuhiꞌa Boro mone azaḡa niduꞌa, eꞌe hariḡa igirotene, matuꞌe rudaro.

⁴Zeḡeꞌa Ierusalema neḡano feurirotene, Ierusalema ekalesia azaḡa, apostolo azaḡa zu ekalesia vaze boroboroꞌa matuꞌo ziniro. Ebu Badiꞌaꞌa zeḡe gauonoꞌo haḡairoteꞌe ḡauḡa niduꞌa, Paulo duḡuruꞌa meꞌodo ziniro.

⁵Rehano Farisea azaḡa, Zuhiꞌa Boro mazao fieꞌeteꞌe azaḡa nuꞌa iḡunadu, ꞌahige reiro. “Iuda mene azaḡa zuni ahirize rana Badiꞌa mone raꞌeteꞌe iḡuꞌa haḡaiꞌuma, ebu Mose goro ḡoeꞌano tiroteꞌe haḡaiḡa zuni haḡaiꞌuma.”

⁶Eꞌanoꞌo apostolo azaḡa zu ekalesia vaze boroboroꞌa ḡoere fainifine nuꞌoraro.

⁷Ze faḡa ḡoꞌaniroteꞌe enogano, Peteroꞌa iḡunadu ziro, raenaꞌa, “Nego nabudi, zae niduꞌa edeḡa, ibite zae boꞌaḡanonoꞌo Badiꞌaꞌa eḡe tuḡuhiro, Iuda mene azaḡaniꞌa hari manoḡa egadu Zuhiꞌa Boro mazao fioga veize.

⁸Badiꞌaꞌe vaze zama edereꞌeteꞌe Badiꞌaḡa. Eꞌe Badiꞌaḡaniꞌa Iuda mene azaḡa mazao zuni Vine Zaḡoḡa tuḡuniro, emeḡe mazao tuḡuniroteꞌe teige. Badiꞌa ani ꞌougeꞌenaꞌa, Iuda mene azaḡa zuni mae zouziꞌuma rae ihofiro.

⁹Badiꞌa ubumaoꞌe Iuda mene azaḡa zu emeꞌe mene nunu, mazaḡa zeḡeꞌa Zuhiꞌa Boro mazao fiiroteꞌeanoꞌo, zeḡe zama Badiꞌaꞌa deheniro.

¹⁰Zaeꞌa raꞌetaꞌaꞌe, emeḡe zu vouḡafeꞌa haḡaoga mene idararoteꞌe haḡaiḡa. Rehano za nougadu, Zuhiꞌa Boro tahiꞌa tahiꞌa eꞌe, haḡai aduga zinihi raꞌohe. Za ꞌougeꞌenaꞌa Badiꞌa tuꞌine nurihi raꞌohe.

¹¹Mene! Eme ꞌahige hubehune zamareꞌohe. Zuhiꞌa Boro Iesuꞌa ḡahunofiꞌeteꞌeanoꞌo eme ḡabofeha. Iuda mene azaḡa zuni Badiꞌaꞌa eꞌe ibiḡano ḡabozeha.”

¹²Petero ḡoere igirotene, eꞌea radiroteꞌe azaḡa niduꞌa mene ḡoeriro. Ebu Paulo ani Banabasine, Badiꞌaꞌa zeḡe gauonoꞌo Iuda mene azaḡa boꞌaḡano ane tahi gigiꞌa haḡaiḡa zu zaguzagaꞌuma haḡaiḡa haḡaidoteꞌe fairu meꞌodo ziniroteꞌe zamaḡano, eꞌea radiroteꞌe azaḡaniꞌe abite radiro.

¹³Zeḡeꞌa ḡoere hauḡirotene, vaze boro ꞌahoga, Iakoboꞌa iḡunadu ḡoeriro, raenaꞌa, “Nego nabudi, eḡe ḡoere egoꞌi!

¹⁴Badiꞌaꞌa nouge nouge Iuda mene azaḡa zamaradu, Badiꞌa mone reifine zeḡe boꞌaḡanonoꞌo ḡadaheḡano vaze nu zamaziroteꞌe hariḡa, Peteroꞌa rae fureneha.

¹⁵Peroveta azaḡa zuni ꞌouge rae tiro, raenaꞌa,

¹⁶'Zuhiꞌa Boroꞌa ꞌahige raꞌohe. Eꞌe enogano, eꞌe bare onaiꞌuma. Ebu Davidaꞌa zuhiꞌaziroteꞌe neḡa fahanogaꞌe, eḡeꞌa bare ogoraꞌuma. Ane ḡahutu neḡaꞌe bare ogoru ḡehaniꞌuma. Ebu bare izifiꞌuma.

¹⁷Haba ꞌahoga ꞌahoga zamaḡano radiuꞌeteꞌe azaḡaniꞌa Zuhiꞌa Boro vaḡifine. Ebu Iuda mene azaḡa boꞌaḡano eḡe mone raꞌeteꞌe azaḡaniꞌa Zuhiꞌa Boro vaḡifine. Eꞌe haḡaiḡa fureniꞌuma Zuhiꞌaḡa Boroꞌa ꞌouge raꞌohe.

¹⁸Aꞌe Zuhiꞌa Boroꞌa amahi rae fureniroteꞌe ḡoeꞌa.' (Amosi 9:11-12)

¹⁹Eꞌanoꞌo eḡeꞌa zamareꞌetene, haḡai adugaꞌe, Iuda mene azaḡa boꞌaḡanonoꞌo Badiꞌa mone ḡihureꞌeteꞌe azaḡa, mene ziniꞌuma,

²⁰rehano zeḡe veize soꞌao mirihadu, ꞌahige ḡoere tuḡuriꞌuma. Ze, ḡuriro badiꞌaḡa mazao tiꞌeteꞌe ogomuḡaꞌe mene aꞌuma, ebu vaze ꞌahogaꞌe ane teite mene hahurateꞌe vazeḡa teite ibi mene veꞌoniꞌuma, ebu ꞌunuḡano harine runateꞌe maniḡa zu ruꞌe mene aꞌuma.

²¹Mazaḡa Mose goro ḡoeꞌaꞌe amahionoꞌo neḡaneḡano Iuda azaḡa kuru neḡano Bana Madaḡa Madaḡano meꞌode harame onaido.”

²²Eꞌanoꞌo apostolo azaḡa zu ekalesia vaze boroboroꞌa ekalesia azaḡa niduꞌa teite ḡoꞌanadu, zeḡe vaze nu meꞌuma reiro, Paulo zu Banabasi teite Antioka neḡano tuḡuzoga veize. Ze vaze ꞌahoga, niḡa Iuda, niḡa ꞌahogaꞌe Barasaba, zu vaze ꞌahoga, niḡa Silasi meiro. Anianineꞌe Zuhiꞌa Boro mone azaḡa ibito ziniꞌeteꞌe azaḡa.

²³Ze soꞌao ꞌahige mirihadu tuḡuriro, raenaꞌa, “Eme, zae negoze, apostolo azaḡa, ekalesia vaze boroboro, zu ekalesia azaḡaniꞌa, Iuda mene azaḡa Iesu mazao fieꞌeteꞌe, Antioka neḡano zu Suria zu Kilikia habaꞌano radiuꞌeteꞌe mazao matuꞌu ḡoeꞌa tuḡureꞌohe.

²⁴Eme hari ꞌahoga igiro. Vaze nuꞌa emeḡe mazaonoꞌo amadu, ḡoere nunu hina zamaze mae ḡunuḡununiro, ebu zamazeꞌa adudaroteꞌe igiro. Rehano zeꞌe emeḡeꞌa mene tuḡuziro.

²⁵Eꞌanoꞌo emeḡe niduꞌa ḡoꞌane idanadu, vaze nu maha, ebu negofe manoḡa Banabasi zu Paulo teite zae vaḡe tuḡuziꞌuma raꞌohe.