Apostolo 13:21-42

²¹Na kabo se kaibwada bena yodi wasawasa, ede Yaubada Saulo ye mosedi, Kisa natuna, iya meta Beniyamina kana isimulita hesau, na ye woyaidi bolimai 40,

²²kabo Yaubada Saulo ye haigabaei. Mulina ne unai Dawida ye kaisunuwaei ye hemala yodi wasawasa. Yaubada Dawida ye hededehemasalaha ye wane, ‘Ya kita meta Dawida Yese natuna iya tamowai namwanamwana yau ya henuwa ede. Yogu nuwatu maudoidi kabo ye ginaulidi.’

²³Dawida kana isimulita hesau Yaubada ye kaisunuwai bena Isalaela taugilihaidi, iya ede Yesu. Teina unai Yaubada yona hededehesunuma ye hemamohoiyei.

²⁴Sola nige Yesu ye laoma na Yowane Babatiso ye lauguguya Isalaela tamowaidiyao udiyedi bena se nuwabui yo se babatiso.

²⁵Na huyana Yowane yona paisowa yona paisowa bena ye gehe kabo ye wane, ‘Yomi nuwatu bena yau kaiteya? Yau nige tamowaina kwa nayanayaiꞌusei wa. Na iya meta muliguyena kabo ye laoma, na yau nige gonowagu taba kana buti mainadi ya yailidi.’

²⁶Kagu kahao, komiu Abelahama natunao yo hinage komiu dagela tamowaidiyao Yaubada unai tautabaꞌohu, bena kwa lapulapui, kabihemauli wasana ta meta ye laoma kalidawai.

²⁷Tamowai maudoidi Yelusalema unai taumiya yo yodi tauwoyawoya nige se nuwatulobai meta Yesu ede Yaubada yona kaisunuwa tamowaina, na iyamo peloweta yodi hedehedede Sabati kesega kesega udiyedi se hasihasilidi wa se hemamohoiyedi na iya se hegilu yo se hekamkamna.

²⁸Nige kana mata hesau se lobai kabo unai se unui, na iyamo se kaibwada Pilato unai taba Yesu ye talamgabaei na ye boita.

²⁹Yesu hedehededena maudoidi peloweta se kulidi wa se hemamohoihegehedi, kabo sataulo unai se haigabaei na se tole bwayabwayaena.

³⁰Na boita unai Yaubada Yesu ye hetoloꞌuyoi

³¹na mayadai 40 solasoladi ne unai ye tautaumasalaha kaiteyadi iya maiyanao Galili unai tausaema Yelusalema wa udiyedi. Unai siya tauhemamohoina ede kada boda Isalaela udiyedi.

³²Na kai yoma laoma inai meta wasa namwanamwana ta ka leyawa kalimiuyena: Yaubada yona hededehesunuma kama kulutubu udiyedi wa

³³ye hemamohoiyei kadi isimulita kita kalidaena meta Yesu ye hetoloꞌuyoi boita unai. Doha Same helabuina unai se kuli, ‘Kowa natugu, mayadai ta unai ya hemala tamam.’

³⁴Yaubada yona hededehesunuma meta boita unai kabo ye toloꞌuyo nige gonowana ye pwasa bwayabwayaena. Hedehedede ta buka tabuna unai ye hededeyako, ye wane, ‘Yogu henamwa tabudiyao yo mamohoidiyao ya hededehesunumadi Dawida unai wa kabo ya lediwa kalimiuyena.’

³⁵Na Same hesau unai ye hemasalaha ye wane, ‘Nige gonowana yom tamowai tabuna ye pwasa bwayabwayaena.’

³⁶Teina ta meta nige Dawida hedehededena, matawuwuna ede Dawida yona huyaena Yaubada yona nuwatu maudoina ye ginauli ye gehe kabo ye boita, na kana kulutubu bwayabwayadi unai se tole na tauna wa ye pwasa.

³⁷Na tamowai Yaubada ye hetoloꞌuyoi boita unai wa, iya tauna nige ye pwasa.

³⁸Unai, kagu kahao, ya henuwa bena kabina kwa kata meta Yesu debanaena ede ka wasaduwaiyei kalimiuyena meta Yaubada yababa ye nuwatugabaedi.

³⁹Mose yona laugagayo nige gonowana yoda yababa ye haigabaedi. Na kaiteyadi se kawamamohoi iya unai meta ye dudulai na nige kabahegiluna hesau.

⁴⁰Unai, bena kwa kitakitanamwanamwa saha peloweta se hedehededei wa tabu se tubu kalimiuyena:

⁴¹‘Komiu tautalatalawasi, kwa kitanamwanamwa, kabo kwa siliyata na kwa boita, matawuwuna yomi huyaena kabo ya hekamkamnagomiu, na taba tamowai hesau yogu nuwatu ta ye hededehemasalaha kalimiuyena, meta nige gonowana kwa kawamamohoiyei.’”

⁴²Sunago wa unai Paulo yo Banaba se dahadahalai na tamowai wa se wane, “Ka henuwa bena Sabati hesau taba kwa uyoma hedehedede ta hekadiyo kwa hededeꞌuyoidi.”