Aposotolo Adi Hewau 8:3-32

³Na Saulo, ia ekalesia i hebaaea, i awasae numa gamagamagari alodi eai, tatao eo sisine i abigogoidi numa masigiri eai i toredi.

⁴Arinai isi se tatagorigori wa, se hailauidi se lau dimo gamagamagari riba se lauguguiai.

⁵Pilipo hinage abo ie dobi Samaria eai, Keriso ribana aridi eai i guguiaidi.

⁶Tatao nuadi esega mo, riba wa Pilipo i ribaei se ataieididini, ena riba se ataiei eo ena laulau gigibori i hemasarahadi se itadi.

⁷Paana ede earua biibiidi tatao headi se luidi se eabalailai, isi abo se lulage murimuri eai, gamagaridi hinage se palisi, eo tatao laulaudaedi hinage i hemauridi.

⁸Kode lailai ie tubu nei eanua ne arinai.

⁹Na tau esau esana Simona nabada wa nei eanua eai ne i tabutabusima, Samaria tataodi i aiaigoridi, ia hinage i ene iabom i sae ariri.

¹⁰Isi gamagamagaridi ena riba se ataiei, tatao gaibu eo tatao headi saesaeariridi si ene, “Tau ta Eaubada ena gigibori lailai ie abi.”

¹¹Isi ia se lauwatai paana ede nabada i aiaigoridi ena tabutabusima eai.

¹²Isi abo se ataiei, Pilipo ia wasa lolo Eaubada ena basileia ribadi i guguiaidi, eo Iesu Keriso esana eai, isi abo se hebapatisoidi tatao eo sisine.

¹³Simona hinage abo i ataiei: ia hinage se hebapatisoi, i miahai Pilipo arinai, ena laulau‐gigiboridi eo heiheinoidi i itadi i nooaririedi.

¹⁴Na aposotolo tataodi Ierusalema eai wasana abo se ataiei, Eaubada ena riba Samaria tataodi se abiyao, Petero eo Ioane se hetamaridi aridi eai.

¹⁵Isi abo se dobi se lage eanua eai, enadi se lau‐uura, isi bena abo Earua Tabuna se abi.

¹⁶(Nei huiana ne nige sora i dobi esau potana eai, Guiau Iesu esana eai mo se hebapatiso nonohaidi).

¹⁷Isi abo nimadi se toresaei isi potadi eai, Earua Tabuna isi abo se abi.

¹⁸Na, Simona i itayao aposotolo tataodi nimadi se toresaei arinai Earua Tabuna se moselaei, ia moni bena i mosedi.

¹⁹I ene, “Teina gigibori ta au leama enagu, eau hinage ea aabi, nimagu ea toresaei tataoa potadi eai, isi Earua Tabuna abo se abi.”

²⁰Na, Petero i ribalau ia arinai, i ene, “Meta moni me abo maedam au mate esega, paana u nuatui Eaubada ena ainauia bena u unemoniei.

²¹Teina ginauri ta, taba nige tupona begana u abi, paana Eaubada matana eai nuam nige i dudurai;

²²teina em baaea ta arinai nuam u bui, u uura Eaubada arinai, bena em nuatu wa abo se nuatugabaei.

²³Paana ea itam oa baaea apeapesuiana, eo laulau baaea augogona hinage.”

²⁴Simona arinana i heuio, i ene, “Enagu u lau uura Guiau arinai, wau ginauri u ribaedi wa, abo nige se hearogu.”

²⁵Na, taudi labui Guiau ena riba se hemasarahayao, eo se lauguguiayao, abo se uio Ierusalema eai, evanelia se guguiai Samaria eanua gamagamagari gougoudi eai.

²⁶Guiau ena aneru i ribalau Pilipo arinai, i ene, “U torohai, u lau tupo eawana eai, u lau e Ierusalema u laugabaei Gasa dobilana me barabara mo.”

²⁷Ia abo i torohai, ie lau: tau esau, Aitiope tauna, ia eunauka, tau wa ie sae ariri, ia Kanaki Aitiope edi wasawasa‐sine ana sagu, ena une gamagamagari ia tauitawataidi, ia i laoma Ierusalema eai tabaohu hesabana.

²⁸Ia i uio, kariota alona eai i geru Isaia peroveta ena uriuri i hasihasiri.

²⁹Earua Pilipo i heriba, i ene, “U lau arinai, nei kariota ne arinai u awasae.”

³⁰Pilipo i aitautau ia arinai, abo i ataiei peroveta Isaia ena uriuri i hasihasiri, to i hesioi, “Em hasihasiri me nuam eai i masarahao, wa?”

³¹Tau wa abo i ene, “Abo edoha egu ataataiena, nige taulauhasahasaigu ta?” I awanori Pilipo arinai ia bena i awasaema se bawa‐labulabui.

³²Uriuri ena aba‐hasihasirina wa ia ede ina: Ia se woeai doha mamoe se laei se unui, e doha mamoe natuna i monou mo uiana tautomna nimana eai, ia hinage, nige awana i dabari.