Aposotolo Adi Hewau 5:10-35

¹⁰Ma esega abo i guri dobi Petero aena eai, ie tubahai: hewari wa se laoma, se ita i mateo, to se bahelaei, monena hasarina eai se tore.

¹¹Ekalesia gamagaridi, eo isi gamagaridi hinage teina wasa ta se ataiei, se matausi ariri.

¹²Heiheinoi gamagamagaridi, eo noo gamagamagaridi aposotolo nimadi eai se ginauridi tatao boeadi eai: (isi gamagaridi nuadi esega mo, se oigogo Solomona ena dobila eai.

¹³Isi headi, hari tatao, se matausi, arinai nige se patulau aridi eai: tatao mo isi se ribatausaedi.

¹⁴Tauataiena se patulau Guiau arinai, moutuadi tatao eo sisine).

¹⁵Arinai tauasiasiebo tataodi abo se woeaidi eanua dobiladi eai: eo hatahata eo aba‐eno potadi eai se heotadi; Petero i laulauhasaridi eai ia tautauna bena se ailoguloguei.

¹⁶Eanuadi ne Ierusalema se hetaiiri moutuana se oigogoma, tauasiasiebo tataodi se ledima, eo isi earua biibii tauluidi se heouyalayalaedi: isi gamagaridi, esau eo esau, abo se hemauridi.

¹⁷Abotai abo kohena lailai i toro, isi gamagaridi maenayao hinage (isi ede Sadukea peledi), se aiaromagigiri‐aririedi.

¹⁸Apostolo se toaidi numa tutugudu eai, se toredi.

¹⁹Guiau ena aneru esau maiona boeana eai, numa tutugudu dobiladi i soedi, i woeahaidi murimuri eai, i ene,

²⁰“Au lau, au toro numa uura alona eai, teina mauri ta ribadi gamagaridi au ribaedi.”

²¹Teina riba ta se ataiei, mara‐ie‐tom se lau numa uura alona eai, arinai se lauheata. Kohena lailai i lagema ma ana sasaguyao sunederi se heoigogoidima, eo Isaraela nanatunayao edi babadayao gamagaridi, headi se hetamaridi se lau numa masigiri eai, aposotolo bena se woeahaidima.

²²Tatao wa se hetorodi wa se lau nige se lobaidi numa tutugudu eai, abo se uio se heribadi,

²³si ene, “Numa masigiri ai ita se gudu komakomanini, tauitaitawata hinage dobila gegesidi eai se totoro: na aie soe, nige tau esau aie ita alona eai.”

²⁴Kohena lailai eo numa uura kapenana eo kohena lailaidi headi teina riba ta se ataiedi, se nuatudadaasa, si ene, “Wasa ta nuana abo ie tubu.”

²⁵Esau abo i lagema, i heribadi, i ene, “Tatao au tutuguduidi wa isi ede numa uura alona eai se totoro, tatao se lauheatadi.”

²⁶Kapenana eo tauitaitawata se lau aposotolo se woeakomakomanidima: na eanua tataodi se matausiedi si ene ata tatao se lauwe’uidi.

²⁷Se woeanonohaidima, abo se hebawadi sunederi nuanuadi eai: kohena lailai i oimuridi,

²⁸i ene, “Lahinai ai heribakomakomanimiuo, e nige’e? ai ene, Tabu ia esana eai au lauheata? Emi riba Ierusalema i lau girihaiyao, teina tau ta osinana giruna bena au hegeumai wa?”

²⁹Petero eo aposotolo gamagaridi arinadi se heuio si ene, “Eaubada taba ai awaabiei, na tatao mo nige ai nuatuidi.

³⁰Ita tamadayao edi Eaubada Iesu i hetorouioi, iaede au unui wa, eo au heabasi oeagi ewana eai.

³¹Eaubada nima‐tutuna eai ia i hedebasaei abo i hemala Wasawasa, eo i hemala Tauhemauri, Isaraela bena abo i henuabuidi, baaeadi abo i henuatugabaedi.

³²Teina ginauridi ai tauribahemasarahadi ede: Earua Tabuna hinage ia ede Eaubada i mosei tauawaabiena aridi eai.”

³³Teina riba ta se ataiei, atedi se taigari, se oioiriba bena abo se unuidi.

³⁴Na tau esau i toro sunederi eai, ia Parisea tauna esana ede Gamaliela, laugagaeo taulaulauheataina, tatao gamagaridi ia se heaheasisiei, i lauhesomdi i ene aposotolo au hebawasuaradi sora.

³⁵Abo ie ribalau aridi eai, i ene, “Isaraela tataomiu e, au komakomanimiu nei tatao ne aridi eai.