Yesu Tɔ̃rɛ̀ 5:10-35

¹⁰Kòò pɑ̃̀nkɛɛ do Piɛri ììkɛ̀ kɛ́kú. Kɛ̀ bɛdɑpɑ̀mbɛ̀ɛ tɑroo kɛ sɔ̃́ nhò ku, kɛ̀ bɛ̀ɛ ò tùótɛ́ kɛ́kɔtɛ kɛ́kũnnɛ́ kɛ́pɛ́ɛ́nnɛ̀ o dɔù.

¹¹Kɛ̀ kufɔ̃wɑɑ́ mpĩ́ Kirisi kɔbɛ nɛ̀ bɛ̀ɛ̀ kó dimɑ̀ɑ̀ tì kèè.

¹²Yesu kɔbɛ do wɛ̃ḿmu mɛyɛ̀mmɛ̀ mɛmɑ́ɑ̀, kɛ tiku Sɑdomɔɔ fiiku miɛkɛ, kɛ̀ Yesu tɔ̃rɛ̀ dɔ̀ɔ̀ri tidiɛtì pɛ́u.

¹³Bɑ́ bɛtɔbɛ̀ í ndɑ̀ɑ́tí kɛ bo bɛ̀ wɛ̃ńnɛ́nɛ̀ kɛ̀ bɛnìtìbɛ̀ mbɛ̀ sɑ̃ntí.

¹⁴Bɛ̀ɛ̀ tɑ̃́ ti Yiɛ̀ nYesu bɛnitidɑɑbɛ̀ nɛ̀ bɛnitipòbɛ̀ kɛ̀ bɛ̀ nyɛ́útí kɛ sṹũnko.

¹⁵Kɛ bɛnìtìbɛ̀ ntɔuní bɛmuɔmbɛ nɛ̀ bɛ mìɛ̀tì nɛ̀ bɛ tɛ̃ĩ̀ kɛ dɔùnko kucɛ nùù, kɛ̀ Piɛri bo mpɛ̃nkɛ́ kòo fènkù dɑ́tínnɛ́ bɛ miɛkɛ òmɔù.

¹⁶Kɛ̀ Sedisɑdɛmmu kó sihɛkɛsí kɔbɛ ntɔuní bɛmuɔmbɛ nɛ̀ yɛbɔkɛ̀ tɑ bɛ̀, bɛmɔu kɛ̀ bɛ̀ɛ miɛtɛ́.

¹⁷Ikuɔ́ nìùtì diɛwè nɛ̀ o kɔbɛ Sɑdusĩɛ̃bɛ kɛ̀ bɛ̀ɛ ítɛ́ nɛ̀ kɛmiɛkɛ,

¹⁸kɛ́pĩ́ nYesu tɔ̃rɛ̀ kɛ́kpetínnɛ́ dikpetíntou.

¹⁹Kɛyènkɛ̀ mɔ̀nnì kɛ̀ Kuyie ntɔ̃nnìi kɔtɛní kɛ́kpetɛ́ dikpetíntou kó yɛcɑ̀kɛ̀ kɛ́ bɛ̀ dènnɛ, kɛ́ bɛ̀ nɑ̀kɛ́ kɛ dɔ̀:

²⁰Kɔtɛnɛ̀ Kuyie ncĩ́ɛ̃̀tɛ̀ kɛ́nnɑ́ɑ́ mbɛnìtìbɛ̀ mufòmmu kó tinɑ́ɑǹtì.

²¹Kɛ̀ bɛ̀ɛ yie nkɛ́kɔtɛ dikṹnweńnì sɛ̀ì Kuyie ncĩ́ɛ̃̀tɛ̀, kɛ nnɑ́ɑ́ nKuyie nnɑ́ɑǹtì. Kɛ̀ ikuɔ́ nìùtì diɛwè nɛ̀ o kɔbɛ kɛ̀ bɛ̀ɛ yú bɛbeémbɛ̀ nɛ̀ Sifubɛ kó bɛkótíbɛ̀ kɛ́tɔ̃ nkɛ̀ bɛ̀ bo yúní Yesu tɔ̃rɛ̀ dikpetíntou.

²²Kɛ̀ tihɑ̃ɑ̃pɔ̀ntìi kɔtɛ kɛ́ bɛ̀ mɔ̀ńtɛ́, kɛ́wɛ̃tɛní kɛ́ bɛ̀ nɑ̀kɛ́ kɛ dɔ̀:

²³Ti sɔ̃́ ndikpetíntou kpetímu tɑ́u kɛ̀ tihɑ̃ɑ̃pɔ̀ntì bɑ̀ɑ, kɛ̀ ti kpetɛ́ kɛ tɑ ti mɛ nyí yɑ̀ òmɔù.

²⁴Kɛ̀ dɛ̀ɛ di tihɑ̃ɑ̃pɔ̀ntì tìì bɑ̀ɑ Kuyie ncĩ́ɛ̃̀tɛ̀ kóo kótì nɛ̀ ikuɔ́ nìùtì diɛwè kɛ̀ bɛ̀ɛ mɔ́ntɛ́ dɛ kó tinɑ́ɑǹtì tu mù.

²⁵Dɛ mɔ̀nnì kòò mɔùu kɔtɛní kɛ́ bɛ̀ nɑ̀kɛ́ kɛ dɔ̀: Di mɛ nkpetínnɛ́ bɛ̀ɛ̀ nìtìbɛ̀ bo Kuyie ncĩ́ɛ̃̀tɛ̀ kɛ nɑ́ɑ́ nKuyie nnɑ́ɑǹtì.

²⁶Kɛ̀ tihɑ̃ɑ̃pɔ̀ntì kóo kótìi nɛinɛ̀ o tɔ̃mbɛ̀ kɛ̀ bɛ̀ɛ bɛ̀ pĩ̀ńní mɛyɔɔ̀mmɛ̀ kɛ yɛ̃́ bɛ̀ do démɛ̀ bɛnìtìbɛ̀ yɑ̀ɑ̀ bo bɛ̀ bùɔ́tímɛ̀ yɛtɑ̃́rɛ̀ kɛ́kuɔ.

²⁷Kɛ̀ bɛ̀ɛ bɛ̀ kɔ̀tɛnɛ̀ bɛbeémbɛ̀ borɛ̀ kɛ̀ ikuɔ́ nìùtì diɛwèe bɛ bekɛ kɛ dɔ̀:

²⁸Ti di nɑ̀kɛ́mu kɛ tú: Di bɑ́ nnɑ́ɑ́ nhonìtì yie nkpɛ́í. Dɛ̀ dòmmɛ kɛ̀ di pitɛ́ dɛ kó tinɑ́ɑǹtì Sedisɑdɛmmu omɔu miɛkɛ, kɛ dɔ́ dɛ̀ ndò tíì te kɛ̀ bɛ̀ ò kùɔ?

²⁹Piɛri nɛ̀ Yesu tɔ̃rɛ̀ tɛyɛ̀ kɛ̀ bɛ̀ɛ bɛ̀ tɛ̃̀ńnɛ́ kɛ dɔ̀: Ti dò nkɛ́yie Kuyie nkpɛti nti kɛ̀ dɛ̀ɛ pɛ̃ɛ̃tɛ́ bɛnìtìbɛ̀ kpɛti.

³⁰Kuyie nti yɛmbɛ̀ do tũ nkù kuù te kɛ̀ Yesu yɑ̃̀ńtɛ́ wenwe, di bɑɑkɛ́ wè kudɑpɑ̃ɑ̃tí koò kùɔ.

³¹Kuyie nwe ndɛ́úkùnnɛ koò dɔ̀ɔ̀ okpɑ̀ɑ̀tì, Odɛɛtíwè, kɛ̀ Isidɑyɛɛribɛ bo ceetɛ kɛ̀ Kuyie mbɛ̀ cĩ̀ɛ̃́ mbɛ yɛi.

³²Ti ti nyɛ̃́ kɛ̀ Muyɑɑ́nsɑ̀ɑ̀mù tì yɛ̃́ mummu Kuyie duɔ́ mmù bɛ̀ɛ̀ yie nku nɑ́ɑǹtì.

³³Bɛbeémbɛ̀ tì kèè dìì mɔ̀nnì kɛ̀ bɛ miɛkɛɛ pɛikɛ, kɛ̀ bɛ̀ ndɔ́ kɛ́kuɔ Yesu tɔ̃rɛ̀.

³⁴Kɛ̀ Fɑdisĩɛ̃ mɔù dɛ̀ bo kòo yètìrì tu Kɑmɑdiyɛɛri kòo yɛ̃́ Kuyie nkuɔ́ mɛsɑ̀ɑ̀ nkɛ̀ bɛnìtìbɛ̀ ò dé, kòo ítɛ́ kɛ́duɔ́ nkɛ̀ bɛ̀ɛ mu ndennɛ Yesu tɔ̃rɛ̀.

³⁵Kòo bɛ́i nkɛ dɔ̀: Isidɑyɛɛribɛ, dɔɔ̀nɛ̀ mɛyɔɔ̀mmɛ̀ bɛnìtìbɛ̀ biɛ.