Aposolo 26

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

¹Agalipaa Polofe mage huno hapaiye “Kagaya kekaa huo.” huno higeno Poloa ayana haya huno kaiyeke hutea kenonaa mage huno humaine.

²Agalipaga, ala sauve kanomogae, menia kagai kaule hufalote huna Yuta vayamoyama kaiyeke hunatenaya kemo anonaa hisua yafena muse nehue.

³Yuta vayamogatama nehuna kavaene ke nevauna aepaa kagaya ago age-mainanafene huna tusia muse nehue. Naa humainanafe musekaa nehugi kagaitema hisua kehena kasalola okahaenageka ako huka maineka havio.

⁴Nafanema mainolegati Silisia mainoanagina haenagaa Yelusalemuma elavi-mainoana ani nofi veamoya kama vai-neayoa yana Yuta veamoya nage-mainae.

⁵Nayona nagaya Falasia vayamogami kahegi kema akave malogeya nage-mainaya yafema kahapaisugeyahena ani kea kahapaigahae.

⁶Kahapaigahagi nayoma taginagomogamifema Anumaya Kotia “Nago yana hulamategahue.” huno hulokiya vai-malenea kelema nametiti hua yateti menia kaiyekea hunatagena heti-mainoe.

⁷Anima hulokiya vai-malenea kelefena mukia tuelufua (12) Yuta nofi veamoya amametitia nateene kegeene ani yama hulatesiafene huya Anumaya Koti agia ayeme ayeme nevae. Nevagena Agalipaga, ala sauve kanomogae, nagaya ania huna nametiti hua yateti Yuta vayamoya kaiyekea maiya hunenatae.

⁸Naa higetama nagaya “Anumaya Kotia fali-mainaya veala ali hetimatene.” hunama hua kehena “Havige nehie.” hutama nehae?

⁹Nayona nagaya “Nasaleti Yisasi agia alina mopafi atalesugeno lavisie.” huna alu kava alu kavala humatenoe.

¹⁰Mono note kava vayamoya “Naama huo.” huya hunatagena Yelusalemu maineya Yisasina amakua amitafa humainaya veamogamina amavalena nofi mo humatenogeya kaiyekema humataya yupa “Hamaegeya faliho.” huna humainoane.

¹¹Yisasi veamogamina “Kalaisifena kamuge hatagetama vaimateho.” huna nehuna kasagoya mono nopi kayona mo neamamina nahai-vaina Yuta veane omainaya vayamogami kumapina moli-haviya huneamatoane.

¹²Ani kava hisuafe ala mono note kava vayamoya hunatagena Tamasigusi ugahe umainoe.

¹³Ala Sauve kanomogae, yagemoa amunokano higena katega nehaugeno ikapinagati tusia vasa yamoa, yagemona agaseno ala yakefa, huno aivasa higena age-mainogeya nagaima navagi hageta hauna vayaene aivasa lahau-maine.

¹⁴Higeta lagaya mopafi asaga hu-lavita tagoya aye-maineta havugeno Yuta vayamogami kefiti mage hie “Sologae Sologae naa higeka nagaila ali haviya nehane? Aniama hanana avela hanegeno kagaikaa kagata neaiye.” huno humaine.

¹⁵Higena mage huna hue “Ala kanomogae kagaya lagae?” huna hugeno mage hie “Nagaya Yisasinae ali-haviya maikama hunatana kanomonagi hetio. Kagaila hugatesugeka nagai aliyana alika nagaima nagana yafeene haenagama kavelisua yafeene hamapaisanafene huna kagaitela evayi nehue.

¹⁷Nehuafe Yuta veane omainaya veamogamitega hugategahugi haenagama ali haviya hugatesaya Yuta vayapitiene Yuta veane omainaya vayamogami amayapitiene kavalena kaugafa aligatigahue.

¹⁸Yuta veane omainaya veamogamina asuma humainea amaulaga alika kaligali humatesanageya haniki-mainea yapima mainaya yana neataleya amakua aiyahae huya vasa yapi maisaya yafe hunegatoe. Satani kava yagai-mainea yapina neataleya amakua aiyahae huya Anumaya Koti kava yagai-mainea yapi maisaya yafe hunegatoe. Nagaife haviya amakupi maleya amametiti hisagena kefo yaamia aigeamatena atalematetena alu aotage anaganiene amavalena amatesugeya maisae huna hunegatoe.” huno humaine.

¹⁹Agalipaga, ala Sauve kanomogae ani kema higena ikate age-mainoa yafenagina akave malenoe.

²⁰Hagotena Tamasigusi utena anileti Yelusalemua uayamona anileti mukia Yutia kotega ute ete huna Yuta veane omainaya veateene mage huna hamapai-mainoe “Kefo yatamia neataletama tamakua aiyahae hutama Anumaya Kotitega etama kanale auava yana hisageya tamakuama aiyahae hisaya yana agesae.” huna hamapai-mainoe.

²¹Mani kema hamapai-mainoa keleti ala mono nopi mainogeya Yuta vayamoya natafa huya nahaesagena falisua kavala hunatenae.

²²Hunatenagi Anumaya Kotia mukia yupa naya higena menia hetina mainena ala kava vayaene osi vayaenena tamahanepauve. Moseseene Anumaya Koti aune vayaene “Naa yana maa yana falote hugahie.” huya humainaya keage hamapai-mainoe.

²³Mage huya humainayane “Anumaya Kotima taugafa aligatigahema hutenea kanomoa augafa agata aisigeno faligahie. Fali-mainesifiti mukia veala amakaseno uhagote-lamateno hetiteno hale yamaa hanesia kea Yuta veanene Yuta veane omainaya veanene hamapaigahie.” huya humainayane huno humaine.

²⁴Poloa na ke higeno Fesatusia ala kefiti mage huno hie “Pologae aifonafo ke maika nehanagi alu avo alu avoma maika nehapalina yayagamo aifonafo kavala hugatene.” huno humaine.

²⁵Higeno Poloa mage huno hie “Fesatusigae, ala kava kanomogae, aifonafo kea nohugi kelamage nehue.

²⁶Nehugi nagayama hua kemoa ala Sauve kanomoga Agalipagae havilinanagena hufalote huna nehue. Nagaya havuana mukia ani kavala falakiya ohunagi ani kavala ago age-mainane.

²⁷Ala Sauve kanomoga, Agalipagae, kagaya Anumaya Koti amaune vayamogami kea ago havika kagupi maleka kametiti nehano? E, kagupina ago alika malana yana nagaya ago havilinoe.” huno hapaiye.

²⁸Higeno Agalipaa mage huno hie “Menima hana keleti aupaa nagaya Yisasife havina nagupi malegahue huka nehano?” huno humaine.

²⁹Higeno Poloa mage huno hie “Aupa kana kanoafi ayaaya kana mainesanano nagaya hua augafa kava huka Yisasife havika kagupi malesanafe Anumayamotega ke huna havi-negoe. Kagaifekeya mani kea nohugi mukia ma kanalema maineya nagai kema nehaviya veanenefe nagaya mainoa augafa kava huya maisae huna Anumayamotega havinegogi nofipi maisaya yafena nonahaiye.” huno humaine.

³⁰Higeya ala Sauve kanoa Agalipaene nago kava kanoa Fesatusiene Penaisiene amakaienema mainaya veanemoya hetiya alule umaineya kea kea mohu mehu huteya mage hae “Mani kanomoa nofila huteteya haesageno falisia augafa kefo kavala ohune.” huya humainae.

³²Hayanagi Agalipaa Fesatusina mage huno hapaiye “Mani kanoa, Poloe, ‘Sisaa kaiyekenia havisie.’ hunoma ohuneleasina ‘Nofipitila atalegeno vino.’ huna huleasine.” huno humaine.