Aposolo 11

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

¹Aposolo vayaene Yutia maineya Yisasife haviya amakupi malenaya vayaene nagoa Isaleli vaya omainaya veamoya Anumaya Koti kea haviya amakupi malenae huya haya kea havimainae.

²Havigeno Pitaa Yelusalemu haino mainegeya “Amakoya anoyaa taga hisaya yana tusia tokiya yane.” huya haya Yuta vayamoya Pitafena “Kagaya havi kava nehane.” huya mage huya humainae “Naa higeka amakoya anoya lagama ohunaya vayayagaenena kavela mo nenane.” huya humainae.

⁴Hageno Pitaa aepa heno mukia yama falotema humainea yafena hufalote huno mage huno hie nagaya Yopa kumate mainena nunamuna nehugeno nagu nagesamoa aiyahae higena himonafi agoana nagola tusia kena kana yana aluga aluga atupale nofi aye-maleteya atalageno nagaite mopafi elavigena age-mainoe.

⁶Agoana ani yapina mukia yaga kafa afua osifavea nama vayupala yapavena anifi mainageno elavi-maine.

⁷Elavigena neagogeno nagola age aino mage huno nahapaiye “Pitagae hetika ani memeyana heka no.” huno hie.

⁸Higena mage huna hue “Aao, Alanimogae ma ma yaga kafa kagai kaufina oniyaage humainegena nagaluma humalenana yamofe tamage huna onenoa yayaga hane.” huna hue.

⁹Hugeno nagoene agea aino mage huno humaine “Anumaya Kotia ago alino sese humalenea yafena ‘Oniyaagela humaine.’ huka ohuka afaa alika no.” huno humainea kavefena nagoene “Oniyaage humaineanagina onegahue huka ohuo.”

¹⁰Ani kavala tagufa (3) yupa huteno aupaa ani kenamoa ikapinaga eteno hai-maine.

¹¹Haitegeya ani kana kanoale tagufa (3) vayala tagaya mainona note evayi humainae. Ani vayayaga Sisaliagati nagaitega humategeya emainae.

¹²Emainageno Alu Aotage Avamumoa nagaifena mage huno hie “Tole kagesa ohavika amakaiene tokaeka vuo.” huno higena uanagi manile mainaya sikisia (6) nafunagaya nakaiene umainae. Uteta ani kanomo note uvayi huta nomaafi hai-mainone.

¹³Haunageno agaya mage huno tahapaiye noniafima ensole kanomoma heti-mainegena agoana ensole kanomoa mage huno nahapaiye “Kagaya menia nagoa vayala humategeya Yopa kumateti Saimoni Pitana movaleya eho. Ani kanoma esiana kagaiene mukia anagakaene Yisasia taaugafa aligatisia kea tamahapaigahie.” huno higena havue huno tahapaiye.

¹⁵Tahapaitegena nagaya aepa hena kea nehugeno Alu Aotage Avamumoa hagoteno tagaima hulatenea kava huno elavino amakai amakupina fale-maine.

¹⁶Nefalegeno nagesamoa hao higena Anumayatimoa humainea kele nagesa havimainoe. Ani kea mage huno humaine “Yonia titafateti falemateneanagi haenagaa Alu Aotage Avamuteti falelamatesigeno tamakupina faleno maigahie.” huno humaineane.

¹⁷Tagayama Yisasi Kalaisife havita tagupi maleta tametiti humainona yupa Anumaya Kotia Alu Aotage Avamula tamineanagino ania huno amakaienena Alu Aotage Avamula amamianagina nagaya tana Anumaya Kotima aliyama alia aliyana tilesue? Nagaya maleli-otegahue huno hu-maine.

¹⁸Higeya haviteya kea ohuya maineya Anumaya Koti agia alisaga nehuya mage huya humainae “Tamage Anumaya Kotia Isaleli vea omainaya veanenefe ‘Tamaipa aiyahae hisagena agola maige maige hisaya tamahaimula tamamino.’ huno humaine.” huya nehae.

¹⁹Sitivenina hayageno falitegeya Yisasife haviya amakupi malenaya veamogamina ali-haviya humatageya faleya alu kote kote ute ete humainae. Nagoa veala faleya Fonisia umaigeya nagoa veala faleya Saipalusi umaigeya nagoa veala faleya Atioku kumate umaineya Anumayamo kea Yuta veamogamike hamapai-mainagi alu veamogamina hamaopainae.

²⁰Hamaopaiyanagi amakai amunopitila nagoa vayala Saipalusitiene Sailinitiene euya Atioku maineya Kaliki veamogamina Yisasia Anumayatimofena kanale kea mohamapai-mainae.

²¹Hamanepaigeno Anumayamoa tokiyaaleti amaya higeya kasagoya veamoya amakua aiyahae huya Anumayamo ke haviya amakupi maleya amametitia humainae.

²²Amametitia hageya Yelusalemu maineya Yisasife haviya amakupi malenaya veamoya ani kea haviteya Panapasina hutageno Atioku umaine.

²³Anile umaineno ageana Anumaya Kotia kayone humatea yana ageteno muse huno mage huno hamapaiye “Tamaku tamakesamoa tokiyaage hinagetama efi efi hutama Anumayatimoene tokaetama vaiyatete hiho.” huno hamapaige hamapaige huno maine.

²⁴Anima hamapaiya kanoa Panapasie. Ani kanoa kanale kanogino Yisasi kema havino agupi maleno ametiti higeno Alu Aotage Avamumoa agupina hiya humainea kanogino Yisasifema hamanepaigeya kasagoya veamoya amakua Yisasina amitafa humainae.

²⁵Amitafa hageno Panapasia Solofe atiyegahe Tasusi umaine.

²⁶Uno atiyeno ali-falote huteno Atioku avaleno haigeana nago kafua Yisasi anagaene mo lokaeana maineana kasagoya veamogamina Yisasi kea hamapaiageya Atioku mainaya veamoya hagote kanafi Yisasi anagafe “Kalisiteni veamogatamae.” huya amakia malenae. Tagai kefitila ani amakimoa Kalaisi akave malaya veamogatamae huya humainae.

²⁷Ani kanafina nagoa Anumaya Koti amaune vayala Yelusalemuti ataleya Atiyoku hai-mainae.

²⁸Haigeno amakai amunopitila nago kanomo agia Agapusie heti-mainegeno Alu Aotage Avamumoa hapaigeno aune laga huno mage huno humaine “Tusia kafu hisaya kana mukia mopale evayi hugahie.” huno humainea kemoa ani kafuma efalotema hia kanafina Kolotiusia sauve kano maine.

²⁹Ani aunema Agapusia laga hia kea haviteya Yisasife haviya amakupi malenaya veamoya mage hae “Yutia mainaya tafu-taganagamina amaya hisune. Mukiamogata moneti hanesimogata monea alitalu hisune.” huya huteya alitalu huteya ani monea aliya Yisasi anagamogamite kava vayamogamina amamigahe Panapasigani Sologani hunatageana ani monea aliana umainae.