Aposolo 25:8-23

⁸Koto lemekepate Poloma꞉ ipika꞉ kone alota꞉ I̱ma꞉ta꞉ Diu wanda꞉halina꞉ Lo Pimanu pa꞉ta꞉ make mo tembolo da pa꞉ta꞉ pi wilimi ekimanu pa꞉ta꞉ make mo Loma꞉ kapomani hali Sisa pa꞉ta꞉ make hau ma꞉nda꞉ na polome laa leekeme.

⁹Pesitasima꞉ mo Diu haliweki ta꞉na꞉ma꞉ homa꞉ tiaaluekema꞉ Polo pa꞉ta꞉ lota꞉ pitolo hata꞉ alota꞉ Do hande samani piteleme pita꞉ I̱ma꞉ naka꞉ pi yokaaluta꞉ oli Diutuseleme da nane peaano poluekema꞉ hone witelepe laa lota꞉ piekeme.

¹⁰Koto leeke Poloma꞉ alota꞉ Sisama꞉ pi yokaalu peao hala꞉ da pa꞉ta꞉ta꞉ do halota꞉ laata꞉ do da pa꞉ta꞉ kone pea꞉peke ya꞉la꞉me. Do Diu haliweki pa꞉ta꞉ I̱ma꞉ hau ma꞉nda꞉ na poloeki make naka꞉ kone handeleme.

¹¹I̱ma꞉ pi ula꞉eki ota꞉ yamba꞉la꞉ mea꞉peke yenkita꞉ homolo poloeki mea꞉peke yea꞉ka꞉na꞉ta꞉ kota꞉ I̱ na pindipa polueke. Koto pa꞉la꞉pate pa yayapikieki laa I̱ samani pitolo lemeka꞉na꞉ta꞉ kota꞉ hali ma꞉nda꞉ma꞉ mo haliweki pa꞉ta꞉ I̱ mea hala꞉peke na ya꞉la꞉me. Sisama꞉ kone yaka pi yokaalu peaena꞉ honke alome laa leekeme.

¹²Koto leeketa꞉ Pesitasima꞉ ipika꞉ pota꞉ epeaaseme haliweki ame̱le̱ pi pi amba꞉la laa Poloma꞉ pi hombo peaaso alota꞉ Nakana꞉ma꞉ta꞉ Sisama꞉ naka꞉ pi yokaalu peaena꞉ honke le ekina꞉ kota꞉ Sisa pa꞉ta꞉ pelipikie laa leekeme.

¹³Mandane pulamanu hao mo kini hali ma꞉nda꞉ Akatipata꞉ Benisi yaapo Pesitasi pa꞉ta꞉ kiki haluekema꞉ mo Sesatia da pa꞉ta꞉ epepekeme.

¹⁴Koto pa꞉ta꞉ hoto mandane ekimanu a꞉pa haena꞉ta꞉ Pesitasima꞉ Poloma꞉ pa꞉la꞉ ekimanu kini hali pa꞉ta꞉ la halolo alota꞉ Do pa꞉ta꞉ hala꞉ hali homeketa꞉ Pilikisima꞉ dipula mea pitao peekeme.

¹⁵I̱ta꞉ Diutuseleme da nane poa꞉ pita꞉ta꞉ mo yeni peao haleme teke haliweki make tondiki haliweki make paeyao Diu haliwekima꞉ ipiki pa꞉ta꞉ samani peaata꞉ I̱ pa꞉ta꞉ honke alo alota꞉ Do halita꞉ hoke hau pa꞉la꞉ halie lae la honke lememe.

¹⁶Koto lemepate I̱ma꞉ iki pa꞉ta꞉ alota꞉ Loma꞉ haliweki nika꞉ hauta꞉ hali ma꞉nda꞉ pa hameke kone ka꞉nda꞉ma꞉ homaapeke na ya꞉la꞉me. Haliwekima꞉ hali ma꞉nda꞉ pa꞉ta꞉ hokeeki pia꞉me laa samani pimika꞉na꞉ta꞉ kota꞉ mo halima꞉ta꞉ mo ipiki samani pilimi haliwekina꞉ leke minekena꞉ hata꞉ ipika꞉ pa꞉la꞉eki alo hata꞉ mo haliwekina꞉eki hombo peaapeke ya꞉la꞉me.

¹⁷Mo haliwekita꞉ do pa꞉ta꞉ epemeketa꞉ kota꞉ I̱ma꞉ handa꞉ pelia na hake da kelepea꞉eke kone mo pi yokaalu pu haloma꞉ da tukiki pa꞉ta꞉ pua pita꞉ mo hali hatuku epena꞉ loa꞉me.

¹⁸Mo ipiki samani pimi haliwekima꞉ tiao hata꞉ ipiki pa꞉ta꞉ samani piteleme pimanu lemepate pa I̱ma꞉ hone ua꞉ tupa꞉ ota꞉ hoke hau pa꞉la꞉eki ma꞉nda꞉ ipiki pa꞉ta꞉ na lememe.

¹⁹Ikana꞉ma꞉ ipiki samani pitolo leme ekita꞉ ika꞉ yeni pu haleme hauna꞉ make pa amba꞉ homeeke hali Yesu pa꞉ta꞉ make samani pitolo lememe. Koto hali Yesuta꞉ Poloma꞉ alota꞉ koto hali ame paa tiao hala꞉me lea꞉me.

²⁰Kutu piki haumanu handa꞉ wia꞉peke pota꞉ weiluekema꞉ I̱ma꞉ pomoma꞉ homolo hata꞉ Polo pa꞉ta꞉ lota꞉ pitolo alota꞉ koto hande neke samani pitolo leme pina꞉ pi yokaalu peaano mo Diutuseleme da pa꞉ta꞉ poluekema꞉ hone witelepe la lota꞉ pua꞉pate

²¹Poloma꞉ Sisama꞉ ipika꞉ pi yokaalu peaena꞉ honke laata꞉ ipikita꞉ dipula da pa꞉ta꞉ handeteke haena꞉ Sisama꞉ ipika꞉ pi tikitiki yao laowaena꞉ honke lea꞉me. Koto leeke handa I̱ma꞉ta꞉ dipula pa pitina꞉ laa Sisa pa꞉ta꞉ tapaalueke laa loa꞉me leekeme.

²²Akatipama꞉ Pesitasi pa꞉ta꞉ alota꞉ Do halina꞉ pi I̱ma꞉ kone opuluekema꞉ hone witolome leekeme. Pesitasima꞉ alota꞉ Belia opuelena꞉e leekeme.

²³Koto laa da ka꞉la꞉paasota꞉ Akatipa Benisi yaapo au au wotu laa a꞉pata꞉ mo mombolo haeme da pa꞉ta꞉ta꞉ mo ami a꞉nda꞉ tumiki haliweki ame̱le̱ make mo daoni pa꞉ta꞉ haeme you haliweki ame̱le̱ make paeyaota꞉ honda꞉ pamba epememe. Pesitasima꞉ pi leeke handa Polo hatuku epena꞉ lememe.