HECHOS 25:8-23

⁸Nu ra Pablo bi ma nanguesɛ bʉya: ―Nte dá øt'ä ngue hingui ho nangue man t'ɛ̨dihe dyʉ judíohe, xínga gue'a ra dąniją, xínga gue'a rán t'ɛ̨di ra hmuts'ʉt'abi bʉ Roma, bi 'yɛ̨n'a ra Pablo.

⁹Nu ra Festo nde da 'yøt'a dí numanho ʉ yʉ judío, janangue'a bi 'yän'na ra Pablo: ―Ha guí nde gui mba bʉ Jerusalén, guepʉ ba øt'a ran juąnbi bʉ, nangue 'bɛ'a í yąp'a yʉ judío.

¹⁰Nu ra Pablo bi dądi: ―Hin'na, guecua rán säui da t'ørcä ran juąnbi ua, nguetho bi 'da'a ran t'ɛ̨di ra hmuts'ʉt'abi 'bʉpʉ Roma gue gui 'yørcä ran juąnbi ua. Nɛ nte mán ts'o xtá ørpa yʉ judío, gue gui sixcä bʉ. Nu'i guí pądi xʉn ho ngue te dá øt'ä.

¹¹Pɛ nu'bʉ xtá øt'ä n'da ran ts'o gue i man nin t'ɛ̨di gui hyogui, jatho ga tu 'bʉ, hin ga 'dagui nangue man dąte. Pɛ nu'bʉ him majuąni 'bɛ'a ní yącpä ʉ, njo'o n'da i ja rán t'ɛ̨di di dägä bʉ ja yʉ́ 'yɛ ʉ. Nugä dí ä'a ran t'ɛ̨di gui thocä bʉ 'bʉh ra hmuts'ʉt'abi bʉ Roma, bi 'yɛ̨n'a ra Pablo.

¹²Nu'bʉ min yąhʉ yʉ́m fäts'ihʉ a ra Festo, bi xi'a ra Pablo: ―Nu'bʉ guí ɛ̨na ga dä ahe bʉ Roma, da zä 'bʉ, bi 'yɛ̨mbi.

¹³Nu'bʉ mi tho'i 'da yʉ pa, n'da rá ts'ʉt'abi yʉ judío, ra Agripa na, nɛ'a rán ju, Berenice, bi zøm bʉ Cesarea di zɛngua a ra ts'ʉt'abi Festo.

¹⁴Nɛ nu'bʉ mi 'bʉpʉ 'da yʉ pa, nu ra Festo bi xi'a ra Agripa nangue ra Pablo, bi 'yɛ̨mbi: ―O bʉ n'da ran 'yohʉ, i ofädi, ngue bi zocua ra Félix, í Pablo a.

¹⁵Nɛ nu'bʉ má mbagä bʉ Jerusalén, nu yʉ hmumbäją nɛ yʉ dąc'yɛi ngue yʉ judío bi xicä nangue ra Pablo. Nu'ʉ mi äp ran ʉnbi nangue'a.

¹⁶Nɛ nugä dá xi'ʉ: “Pɛ nugähe dyʉ romanogähe hingui sä ga hohe n'da 'bʉ hinda nadí juąnbähe ʉ, nɛ dim 'bäpʉ ja yʉ́ hmi to'o di yąpi, din yąsɛ.” Ngubʉ dá xifi.

¹⁷Nɛ nu'bʉ mi zøcua yʉn yąpate, nu'bʉ mi hyats'i, 'bex dá mba bʉ ja man juąnbate nɛ dá manda da ts'ixpʉ a ra Pablo.

¹⁸Nu'bʉ mí 'bähmbe bʉ ʉ yʉn yąpate, pɛ xínga n'dare bi ma gue yʉ ts'oqui tengu mím bɛ̨ngä ngue xtá ma.

¹⁹Pɛ hønt'a n'da ram hma madín junthʉ nangue 'bɛ'a mi ɛ̨c'yɛi zɛhɛ ʉ yʉ judío. Nɛ nangue n'da ran 'yohʉ í Jesús nín junt'ʉ, ngue bi du, pɛ nu ra Pablo nts'ɛdi bi ma ngue i 'bʉi, bi 'yɛ̨na.

²⁰Nu ra Festo bi thoqui bi ma: ―Nɛ nugä hin dí pącä ga øt'ä ran juąnbi nangue 'bɛ'a ɛ̨c'yɛi yʉ judío. Janangue'a dá än'na ra Pablo 'bʉ nde da mba bʉ Jerusalén, da mba ma juąnbi bʉ.

²¹Pɛ nu ra Pablo bi 'yäc ran t'ɛ̨di, nde ga dä bʉ 'bʉh ra hmuts'ʉt'abi Augusto bʉ Roma. Dá manda bʉya da 'bädi asta gue'bʉ bi zä ga pɛhndä bʉ 'bʉh ra hmuts'ʉt'abi, ɛ̨n'a ra Festo.

²²Nu ra ts'ʉt'abi Agripa bʉya, bi xi'a ra Festo: ―Nugä dín nde ga øde 'bɛ'a da man'a ran 'yohʉ. Bi dą'a ra Festo bʉya: ―Nixudi da zä gui 'yøde.

²³Man'da pa bʉya bi mba bʉ ja rá ngu ran juąnbate ra Agripa nɛ ra Berenice. Nɛ bi mba bʉ mbo gätho ja yʉ́ ts'ɛdi, min 'yohʉ yʉ hmudofʉi nɛ yʉ ngʉrpi bʉ ja ra hnini Cesarea. Nɛ bi ts'ini xʉn ho nguetho i ja yʉ́ts'ɛdi. Nɛ nu'a ra Festo bi manda da ts'ixpʉ ra Pablo.