Menge Ininang 25:8-23

⁸Pegtaba i Pablo, minikagi sikandin, “Wedad salà ko pengkey diyà te punù egtoloen day Judiyo, aw pengkey diyà te dakel simbahan day, aw pengkey diyà te gobirno.”

⁹Meneng ibeg i Festo, meluba se menge Judiyo kandin, aw yan mig-insà sikandin ki Pablo, kagi din, “Meibeg ka lay domoton te Jerusalem amon osayan ta doton?”

¹⁰Timaba si Pablo, kagi din, “Seini den se oseyanan te gobirno. Keilangan osayan a dini, so netegahan no den te wedad palos salà ko diyà te menge Judiyo neopal kanak.

¹¹Simpana benal doen salà ko, eked a kulu te ipelumun a aw imetayan a niyo. Meneng aw kenà benal se inikagi dan, eked a begayi diyà te belad dan. Yan memoyò a den te si Cesar se meg-osay kanak.”

¹²Penga te pegpebelaw-belaway i Festo aw menge doma teleglawong, minikagi sikandin, “So pinemoyò no den te si Cesar se meg-osay kamno, yan ipeibing ta doton kandin.”

¹³Pegkenamay-namay, dimateng se selotan te menge Judiyo si Agripas aw etebay din si Bernice. Miglegeana dan ki Festo kidoen te Sesarya.

¹⁴Dalem te peg-ogpà dan doton, mig-indan si Festo diyà ki Agripas tepad ki Pablo. Minikagi si Festo, “Doen dini sebad otaw si Pablo kineleboso i Felis, meneng wedà din pelowai.

¹⁵Pegdoton ko te Jerusalem, doen medita pengolo aw obanen te simbahan te Judiyo neopal ki Pablo. Nemoyò dan te ipelumun ko sikandin aw imetayan.

¹⁶Meneng minikagi a kandan te eked kepakay diyà te gobirno kidoen te Roma aw ipelumun se sakop te Roma singed aw onà sikandin megkità te menge otaw migdimanda tepad kandin, amon meketaba te kagi dan.

¹⁷Pegdateng day dini, wedà a peg-alà-alà, so keeldawan niyan, impeangay ko sikandin amon osayan ko.

¹⁸Pegdimanda dan tepad kandin, eden ko aw ontò medaet se salà din ipetaga-taga dan kanak.

¹⁹Meneng kenà, so ibeg dan olò megdindil tepad te ketanem dan aw tepad te sebad otaw nematay si Jesus, meneng minikagi si Pablo te neantay lekat te nematay.

²⁰So wedà ko ketegahi aw eden se osayen ko tepad kenyan, mig-insà a ki Pablo aw meibeg sikandin domoton te Jerusalem amon osayan ko kidoen.

²¹Meneng nemoyò sikandin te si Cesar se meg-osay kandin. Yan impekeleboso ko pa sikandin dalem te eked pa sikandin keibing doton ki Cesar.”

²²Minikagi si Agripas, “Ibeg ko menenalan a kandin.” Minikagi si Festo, “Kealdaw menenalan ka kandin.”

²³Keeldawan niyan, ontò sinagman si Agripas aw si Bernice te pegdoton dan te oseyanan sipat menge kapitan te sondalo aw menge dakel otaw te Sesarya. Impeangay i Festo si Pablo.