Aposole 7:23-50

²³“Moseseme ee kana kingi ita kitomende katapala baa tata Isataele dupa kanja patoo lao masetala kanja pea-pyaa.

²⁴Peamopa Isipe tange mendeme Isataele mende-kisa makongeamo doko kandatala baame Isataele doko nisoo Isipe tange makongeamo doko pyao kumasia-pyaa.

²⁵Moseseme baa tata dupame namba-kisa Goteme nyakama nisetana lao masilyamino lao masiamoaka doko, dupame dopa lao masala nayami-pyaa.

²⁶Taita dopa pyoo Moseseme Isataele mendalapo pyao piambino kandatala, baame akali dolaponya mona auu pisakamaiyanya pii epe lamaiyoo, ‘Nyalambo kaiminingi dolapo, aipuma mende koyasa koyasa pilyambipi?’ lea-pyaa.

²⁷Dopa leamopa akali baanya kaiminingi pimaiyamo dokome Mosese soo nepatala lao pituu, ‘Apimi emba naimanya isingi akalipi pii tolasingi akalipi joo kata lapyape?

²⁸Kuaka embame akali Isipe tange mende pyao kumasipinoli pyoo namba pyao kumasipuli lao masilipi?’ lea-pyaa.

²⁹Moseseme pii doko sepala baa paka pea-pyaa. Pupala yuu Mitiane dokonya tisa nao katao wane ane lapoma mandea-pyaa.

³⁰“Ee kana kingi ita kitomende pateamopa Moseseme Sainai manda endakali napalenge yuu dokonya katao itate mende ikililyambu mauu mendenya teamo dokonya enjele mende ita yuli kainanya kateamo kandea-pyaa.

³¹Moseseme doko kandatala mona andea-pyaa. Mona andao pituu tengesa kanja peamopa, Kamongome baa lamaiyoo, ‘Namba embanya yumbange dupanya Gote doko kalyo. Apotakamepi, Aisakepi, Jekopepi dutupanya Gote doko kalyona,’ lea-pyaa. Moseseme pii doko soo walu lao paka kayapala angi doko kandapenge nanjia-pyaa.

³³Dopa piamopa Kamongome baa lamaiyoo, ‘Yuu emba kalyeno dutupa etete epe. Tenge dokonya embanya moko pee pingi dolapo lyoka.

³⁴Isipe tange dupame nambanya endakali Isipe kalyamino dupa minao koyasilyamino doko kandatelyo. Dupame tanda nao ee lelyamino doko sepelyo. Sepala namba tangeme mokao nyala ipatelyo. Indupa emba Isipe paalena ipu,’ Kamongo dokome dopa lea-pyaa.

³⁵“Dupame Mosese daa latala, ‘Apimi emba naimanya isingi akalipi pii tolasingi akalipi joo kata lapyape?’ leami-pyaa. Dopaka doko, akali doko isingi akalipi pyoo nyingi akalipi lapota joo Goteme katena lea-pyaa. Goteme baanya enjele ikililyambu mauunya kateamo doko-kisa Mosese Isipe pena lea-pyaa.

³⁶Baa Isipe kateamo gii dokopapi, solowata pete Kate Pyapae singi dokonya epeamino dokopapi, dee endakali napalenge yuu dokonya ee kana kingi ita kitomende dupa payawaka kateamino gii dokopapi dupanya baame kongalipi kalai paka pipaepi dupa pyoo Isipe yuu doko yakinatala dokaita laminao pea-pyaa.

³⁷Akali Mosese dokomeaka Isataele dupa kandao, ‘Namba pyakalya leamoli pyoo Goteme nyakamanya potopesa mende nyakama tata dupanya kaina dokonya pyakalyina lakatana,’ lea-pyaa.

³⁸Isataele dupa kambu pyao endakali napalenge yuu dokonya kateamino dokopa Mosese awapaka katea-pyaa. Baa enjele Sainai manda ongonya wamba pii lamaiyamo doko-pipa awapa katao dee naimanya yumbange dupa-pipa awapa kateaka-pyaa. Baame pii lapae lete katenge doko dupa maiyanya nyia-pyaa.

³⁹“Dopa piamoaka doko, naimanya yumbange dupame Moseseme pii leamo dupa nasemana lao masiami-pyaa. Dopa lao masetala Mosese yakinatala moname Isipe yuu dokonya pilyiami-pyaa.

⁴⁰Dupame Etone lamaiyoo, ‘Naimanya kaita laitaka pyoo wambata gote mendapua embame wasaka. Naima Isipe yakinatala kamanda laminao epeamo akali Mosese doko aipa piape lao naimame masala naelyamanona,’ leami-pyaa.

⁴¹Gii dokopa dokaitame pulumakao ŋaŋa jepae mende wasepala nyakamanya sambo gote wasepae doko tama pyoo oapi dupa kundi maiyami-pyaa. Nyakamame nyakama tangenya kingimi wasepae doko lao masoo mona yaepao kateami-pyaa.

⁴²Dopa piaminopa Goteme dupa maita maitala niki kanapi buipi dopale kaiti-kisa katenge dupa tama pima pena kaya-pyaa. Ongonya potopesa dupanya pii pepa pyapae dokonya dapa lao pyapae silyamo: ‘Nyakama Isataele dupame endakali napalenge yuu dokonya ee kana kingi ita kitomende dupanya payao kateamino dokopa nyakama pulumakao sipisipipi dupa namba lao kundi dyoo tama piamipi?

⁴³Nyakamame sambo gote Moloko lao tama pingi sele anda dokopa sambo gote Lepane makande pyoo bui wasepae dokopa dolapo tama pitamana lao wasepala soo payami daape. Dokonya nambame nyakama yuu Bapilone omotena-kaita waka kalyepale lao watao nepatona,’ lapae silyamo.

⁴⁴“Naimanya yumbange dupame endakali napalenge yuu dokonya katao Gote kalyamona lao panasingi sele anda doko dupanya katakamaiya-pyaa. Goteme Mosese kandao sele anda dopa pyoo pina lao makande maitiamopa Moseseme makande kandeamo dopaka pyoo piami-pyaa.

⁴⁵Maitapyao naimanya yumbange dupame sele anda doko nyakamanya takange dupa-kisa nyepala nyoo minao Jasua-pipa tata waka dupanya yuusa epeami-pyaa. Goteme yuu dupanya tange dupa watao nepata-nepata piamopa yuu doko nyoaka peami-pyaa. Dopa pyoo sele anda doko soo peamino doko pao Dapiti kateamo gii doko kandao nyiami-pyaa.

⁴⁶Goteme Dapiti auu kayamopa baame Jekopenya Gote doko katenge panda mende wasakamaitoo lao masetala Gote-kisa tee lea-pyaa.

⁴⁷Dopaka doko, Solomoneme Gotenya anda mende pyakamaiya-pyaa.

⁴⁸Pyakamaiyamoaka doko, Gote etete ketae waka katenge doko endakali kingimi anda petae dupanya nakatenge. Potopesa mendenya pii dokome Kamongome dapa leana lapae silyamo:

⁴⁹‘Kaiti doko nambanya isoo petenge toko dokona, isa yuu doko nambanya moko pundipundi singina nyakamame anda aipale mende nambanya pyakatamipi? Namba panda andusa imambu nyotoope?

⁵⁰Nambanya kingimi dupa pitaka wasala nayope?’ lea-pyaa.