Aposole 2:23-43

²³Wambao Goteme masokondape pyoo masetala dopa pituna lao pii lao wasepala nyakamanya kingilyaka baa dia. Diamo doko nyakamame mana setapae nepenge akali dupame baa pyao yukuina lao maitala kumasiami.

²⁴Dopa piaminopa Jisasa kumiamoaka doko, Goteme tanda nao kumingi doko nepatala baa sakatasia-pyaa. Kumingi dokome baa etete minapenge nanjia-pyaa.

²⁵Dokonyaka Dapitimi baa kandao dapa lea-pyaa: ‘Kamongo doko koteaka lao nambanya enomba dokonya katenge doko nambame kandeo. Baa nambanya kingi tolae dokonya kalyamona, opale mendeme namba lombasala nayata.

²⁶Tenge ongonya namba mona yaepatala eteke kayao pii leo. Dopana, namba kumingi dokome lete katenge epe ipata doko masoo malisilyamo.

²⁷Embame nambanya imambu doko malu dokonya palena lao kayala nayate. Namba embanya akali epe etete doko tamuatale lao embame kayala nayate.

²⁸Embame namba eteteaka lete katato kaita doko laitaka petee. Emba nambapa awapa katao nambanya mona doko etete yaepasakatena,’ Dapitimi dopa lea-pyaa.

²⁹“Kaimia paluma, naimanya yumbange Dapiti dokonya lao nambame pii yapae napyoo nyakama langilyo. Baa kumiamopa malu piami-pyaa. Baanya malu piamino panda doko kandao kalyamano.

³⁰Baa potopesa dokomena, Goteme baa kandao kiningi etete embanya mandipaenya mandipae mende embanya kiŋi toko dokonya petena latona leamo pii doko masia-pyaa.

³¹Goteme pitamo dupa Dapitimi wambao kandatala baame Kataisa sakatatamo dokonya dapa lea-pyaa: ‘Baa Goteme malu dokonya satale lao yakinala nayatamopa baa tamuala nayatana,’ lea-pyaa.

³²Goteme Jisasa dokoaka sakatasiamopa naima kandeamano dupa pitakame endakali dupa-kisa lao panao kalyamano.

³³Goteme baa kaiti-kisa lanyiamopa Gotenya kingi tolae dokonya kalyamo. Wamba Takangeme maitona leamoli pyoo Oli Sipitisa doko Takange-kisa nyepelyamo. Dopa petala indupa nyakamame soo kandelyamino dupa Goteme pilyamo.

³⁴Dapiti baa kaiti-kisa paa nayawaka pituu pii dake lea-pyaa:

³⁵‘Kamongo Gote dokome nambanya Kamongo doko lamaiyoo, “Emba nambanya kingi tolae-kaita katape. Katatenopa nambame embanya yandapipili dupa embanya moko pundipundi ongonya katena latona,” lea-pyaa.’

³⁶Nyakama Isataele endakali dupa pitakame etete masokondape pyoo masalapape. Nyakamame pyao yukuiyamino akali Jisasa doko Goteme Kamongo Kataisa katena lateana,” Pitame lea-pyaa.

³⁷Pitame pii leamo dokome endakali dupanya mona dokonya yandateme pili piamosa dupame Pitapi aposele dupapi dutupa pisoo pituu, “Kaimia paluma, naima aipa pimape?” leami-pyaa.

³⁸Dopa leaminopa Pitame dutupanya pii yanu pyakamaiyoo, “Nyakama mona kapilyetala nyakama mendai mendai lawanya Goteme koo dupa kunanya nepekena lao Jisasa Kataisanya kenge doko lao kaimbu nyalapape. Dokopa Goteme Oli Sipitisa doko nyakama mee ditona leamo doko dita.

³⁹Goteme ditona lao pii lanya seteamo doko nyakamanyapi, nyakamanya wane dupapi, yuu etete tependa tange dupa pitakapinya lao lanya setea-pyaa. Naimanya Kamongo Gote dokome epena latae endakali dupanya pii lanya setakamaiyana,” Pitame dopa lea-pyaa.

⁴⁰Dopa latala baame pii waipa soo longo leamo dupame endakalinya mona sakatasoo masina lao dapa lamaiya-pyaa: “Nyakama uanga pyoo paenge endakali dupa-pipa koyala nayalapale, Goteme nyakama pyoo nyina lao kalyepapena,” Pitame lea-pyaa.

⁴¹Gii dokopa Pitame pii leamo doko auu kayao siamino endakali dupanya kaimbu pyakamaiyami-pyaa. Kaimbu pyatakamaitala kambuanya nyoo konda piamino endakali dupa taosene tepoma jia-pyaa.

⁴²Dupame aposele dupanya pii sepala mende nisa nisa pyoo katao, betesa konjooawapa nao, loma soo kyoto joo kateami-pyaa.

⁴³Aposele dupa-kisa Goteme kongalipi kalai paka pipaepi longo dupa piamosa kandatala endakali pitakame paka kayao kateami-pyaa.