Hechos 2:23-43

²³Jatian, ja jonira jaskáti Diossen shinanni iketian, maton yatanxon retea iki, jakonma jonibo korosen amataanan.

²⁴Ikaxbi Diossenra xabáaka iki, ja mawainoa jiriataanan. Ja mawakanra jawekeskaxonbi jaaresti atipanyamaa iki.

²⁵Jesús jaskáti yoiira inike apo David, neskati: ‘Jatíbitianra ja Ibo en ebé oinna iki, já nokon mekayao ikenra, ea jawenbi pakémayamai.

²⁶Jakopíra nokon shinan meran raroi, ea bewai. Jaki koshiaxa ea janoxiki.

²⁷Jainoax keyónon ixonra, ja mai kini meranbi nokon yora imayamanoxiki. Jawekeskaxonbira, ja min yonotinin yora min payómayamanoxiki.

²⁸Min keena keskatishaman jatira, min ea onanmaa iki. Ebebi ixonra min ea raromanoxiki’, iki inike.

²⁹Nokon kaibobo, enpari mato ikonshaman yoibanon; ja non papashoko David mawáketianra, miinkana iki. Jatian jain miinkani kinira non jatíxonbi onanke.

³⁰Ja David iká iki *profeta. Janra onanna iká iki, westíora jawen chiní rarebo apo imanoxon Diossen akonkin yoia.

³¹Jaskara onanaxa David iká iki, ja Cristo máwataxbi jiriti yoii, jawen kayara jain akana kininkobi banémayamanoxiki, itan jawen yoraribira jainbi payómayamanoxiki iki.

³²Ja nato Jesúsbira aká iki Diossen jirimakin. Jara non jatíxonbi onanke.

³³Jaskáaxonra naikan boxon, jawen mekayao Diossen yakámaa iki. Jainxonra noa meninoxon yoini, jawen Papán Shinan bia iki. Bixonra, ja Shinanribi noa menike. Ja riki ja maton oinna itan maton ninkati iitai.

³⁴Nai bochikira David kaama iki, ikaxbira neskati yoyo ika iki: ‘Ja Ibonra nokon Ibo yoia iki. Nokon mekayao yakáwe,

³⁵Ja min rawibo, en mia jan penítiaxonai kaman’, iki.

³⁶Rama jatíxonbi onankanwe, Israel jonibo. Nato Jesús maton korosen axon reteyantanara, Diossen jatíbinin Ibo, itan *Cristo imaa iki”, akin.

³⁷Jaskáakin jato aká ninkatax, akonbireskin masá shinanni onískana iki. Jaskáxon Pedro betan ja wetsa Diossen joi yoiti raana joniboribi yokákana iki: —Kaibobo, ¿Ramaki noa jawekeskatiki? —akin.

³⁸Jatian Pedron jato yoia iki: —Maton jakonma shinanbo akonkin jenetaanan, Criston janenko bautizameekanwe, maton ocha akábo moa Diossen mato shinanxonyamanon, jatianra jawen Shinan mato jan meniti iki.

³⁹Ja jato meninoxon yoiara matona iki, maton bakebaona, itan jatíbi ja ochokeax beabaonbi biti iki. Onantiakin yoia, jatíbi ja Diossen kenaabaon biti —akin jato aká iki.

⁴⁰Meskó keskáakinbo esekin, Pedron jato neskáa iki: —¡Ja nato jakonma jonibo masá tenematibo xarameax, mato kishpinmeekanwe! —akin.

⁴¹Jaskáakin jato joi yoia ikonhaxa, jawen janenko nashikana iki. Ja netebaonra joi akaibo kimisha warankabobira kaikana iki.

⁴²Jaskataxa, ja raana jonibaon jato esé onanmaa keskatibo jaai jenéyamakana iki. Ja rarebobires keska shinanmeekin, tsinkíxonbo Criston yora shinankin jawékiakatikanai, itan orankinribi jeneyamakatikanai.

⁴³Ja raanabaon, ratéti jawékibo, itan ja oinxon onanti jawékibo akanaitian oinnax, jatikaxbi ratékana iki.