Aposole 23:10-26

¹⁰Dokopa tata dolapome pii yanda pyoloo piambino doko andake jetala Polo minao kumasetamili jiamosa yanda singi amii isingi mupa dokome paka kaya-pyaa. Dopa petala yanda singi dupame Polo lanyepala laminao nyakamanya andaka pena lea-pyaa.

¹¹Maitakao kuka dokonya Kamongo dokome Polo paleamo dokonya ipao katapala lao pituu, “Emba kyoto joo katape. Jetusaleme yuu dakenya nambanya lao lao panao kateeno mendai dopaka pyoo Loma yuu dokonya lao panapengena,” lea-pyaa.

¹²Yuu yongateamopa Juta dupa limbatala pii mende lao yaki piamino doko etete lalu lao lelyamanona lao lao pituu, “Naima neepi endakipi nala nayao katao pao Polo pyao kumasetama gii dokonya tuu latama,” leami-pyaa.

¹³Pii lao yaki piamino akali dupa kingi ita kitomende-kisa dee mendatupa apata-pyaa.

¹⁴Dupame pitisa mupa dupapi isingi akalipi dupa kateamisa pupala lao pituu, “Naimame pii lao yaki petala lalu lao latelyamanona lao, ‘Neepi endakipi etete kuki mende nala nayao katao pao Polo pyao kumasetama gii dokonya tuu latama,’ lalamano.

¹⁵Dopana, indupa nyakamapi kanjole dupapimi amii isingi mupa dokonya pii pyasakamaiyoo, baame Polo laminao nyakama pititamisa epena laapape. Nyakamame sambo waa katao lao pituu, ‘Naimame Polonya pii dokonya tenge dupa deaka sokondape pimana lao masilyamanona,’ laapape. Baa nyakama pititamisa ipao lai petala nayatamopa pyao kumasemana depa latae katamanana,” leami-pyaa.

¹⁶Dopaka doko, Polo pimalengenya ikiningi dokome Polo kaitinisa isetala pyao kumasetamana leamino pii doko sepala baame yanda singi amii dupanya anda dokonya pupala Polo lamaiya-pyaa.

¹⁷Lamaitiamopa Polome yanda singi amii isingi mende epena latala, “Wane dakeme yanda singi amii isingi mupa doko pii mende lamainalena, embame baa lamina,” lea-pyaa.

¹⁸Dopa latemopa amii isingi dokome wane doko laminao yanda singi amii isingi mupa doko peteasa pupala baa lamaiyoo, “Akali anjetae katenge Polo dokome namba ipu latala wane dakeme emba pii mende langina lamina lapyanya, laminao epelyona langyapomona,” lea-pyaa.

¹⁹Dopa lateamopa yanda singi amii isingi mupa dokome wane doko kii minao umbisale pupala nyalambo iki katao, “Embame namba aki pii mende langitipi?” lao pisia-pyaa.

²⁰Dopa lao pisiamopa wane dokome lao pituu, “Juta dupame sambo waa katao pii lao kambutala, ‘Naimame Polonya pii tenge mendapua sokondape pyoo setama lao masilyamanona, embame baa laminao naima kanjole dupa-kisa ipupi lamana,’ lalamino.

²¹Dopaka doko, embame dupanya pii doko sakamaiya nayape. Doko, dupanya akali kingi ita kitomendenya ulutename Polo pyao kumasetami gii dokonya tuu lao neepi endakipi nala nayao katatamana lao pii lalu lao lelyamanona lalamino. Indupa dupame dopa pimana lao depa latala embame kanjole dupanya pii doko ŋee laale lao masilyaminona,” lea-pyaa.

²²Dopa leamopa yanda singi amii isingi mupa dokome wane doko lamaiyoo, “Embane pii namba langyeno dutupa endakali mende lamaiya nayape,” daa latala pena lea-pyaa.

²³Dokopa yanda singi amii isingi mupa dokome yanda singi amii isingi lapoma epena latala dolapo lamaiyoo, “Nyalambome yanda singi amii andate lapomapi, dee mena osa maitanya petenge akali kingi ita kalangepi, dee yandate miningi akali andate lapoma dupapi dutupa-pipa Polo Sisatia yuu dokonya kuka kiloko mange mendai wakyoo latamopa penalena depa lena lamaiyepape.

²⁴Akali Polo doko pitipenge mena osa mendapua depa latakamaitala baa kapomane andake Pilikisa kalyamo dokonya auu pyoo laminao pupalena,” lea-pyaa.

²⁵Dopa latala baame pepa mende dapa lao pia-pyaa:

²⁶“Namba Kolotiasa Lisiasame pepa dake kapomane andake akali epe Pilikisa embanya pyao peekelyo. Emba auu pyoo katape.