Aposotolo Adi Hewau 23:10-26

¹⁰Isi se haiawayagara ariri, iala tanuagana i matausi i ene ata Paulo se tabeutusi ne, to iala tataodi i hetaladuidi se dobi se adidiri ia se girihaiyama numa lailai alona eai.

¹¹Maionana eai Guiau abo i toro ia gegesina eai, i ene, “Paulo e, u nuaadidiri; Ierusalema eai wa u ribahemasarahaguo, Roma eai hinage doha, abo u wasawasaegu.”

¹²Mara‐ie‐tom, Iudea tataodi headi se oioiriba, aigora se oiribaei, si ene, aiai taba nige se ai, eo goila taba nige se nom, i lau e Paulo se unuiyao.

¹³Wau tauoioiriba wa, tataodi tatao‐labui‐se‐mate eo tabena.

¹⁴Isi abo se laoma kohena saesaedi eo babadadi aridi eai, si ene, “Ai aigora gogo, ai ene taba nige aiai ai aiita i lau e Paulo ai unuhemate.

¹⁵Omi, sunederi maemiu, iala tanuagana au heriba maraitom abo Paulo i hetamariuioiawa, doha bena riba esau au hesio komakomani: ia i hanahanauma abo ai nonoha ai unuhemate.”

¹⁶Paulo se wesewesei ribana ena goroa i ataieyao, i lau numa lailai alona eai Paulo i heriba.

¹⁷Paulo senturion esau i eogai, i ene, “Teina hewari ta u woealaei iala tanuagana arinai: riba esau abo enana i riba.”

¹⁸Arinai abo ia i laei iala tanuagana arinai, i ene, “Paulo, tau‐auauna wa, i eogaigu, i awanorigu bena teina hewari ta ea leama arim eai, riba esau bena i heriheribam.”

¹⁹Iala tanuagana ia i abinimaei, i woeaudoiei, i hesiomodigau, i ene, “Saha bena u heribagu?”

²⁰Ia i ene, “Iudea tataodi se riba gogo se henua oa maraitom Paulo u woeadobei sunederi aridi eai, edi borabora bena riba esau abo se hesio komakomani ia arinai.

²¹Isi awadi tabu u abi: doha tatao tauwesena tatao‐labui‐se‐mate eo tabena ia se wesewesei, isi hinage se oiribao, eo se aigorao si ene aiai taba nige se ai, eo goila taba nige se nom i lau e Paulo se unui; isi se wesenonoha, em lauheari mo se bagibagiei.”

²²Iala tanuagana hewari wa i duiei i ene, “Wau riba wa, tabu tau esau i nuatui u heribagu wa.”

²³Senturion labui i eogaidi, i ene, “Tauiala tataodi handere labui au abinonohaidi, eo hosi taugeruidi tatao‐haiona‐se‐mate‐saudoudoi, eo tau‐abialahia handere labui, maiona mahana haiona abo se dalahai se lau Kaisarea.

²⁴Hosi hinage au abidi Paulo ena abageru, ia au laei komakomani gavana Peliki arinai.

²⁵Ena leta ie uri i ene ina doha:

²⁶“Eau Kalaodia Lusia ea uriyawa oa gavana Peliki, taulailai, eauedo.