Aposole 15:2-32

²Dopa lao mana lamaiyoo kateaminosa Polo Banapasapame etete imbu kayapala dupa-pipa pii yanda pyoloo piami-pyaa. Dopa piaminopa masoo miniamino dupame Polo Banapasa-pipa dee nyakamanya akali mendatupapi yapao nyepala Jetusaleme yuu dokonya aposelepi isingi akalipi dupa-pipa pii lao tolasala pena leami-pyaa.

³Sosa dokome akali dupa pena lateaminopa Pinisiapa Samatiapa yuu dolaponya-kaita peami-pyaa. Pao pituu Goteme endakali tata waka dupanya mona dopa pyoo kapilyakamaiyana lao pii doko lamaiyoaka peami-pyaa. Pii dokome masoo miningi kaiminingi dupanya mona etete yaepasakamaiyami-pyaa.

⁴Dupa Jetusaleme yuu dokonya pao pyakamateaminopa Jetusaleme tange sosa dokopi, aposele dupapi, isingi akali dupapi dupame akali epeamino dupa taeme ipamini lamo lao lanyiami-pyaa. Dopa peteaminopa Polo Banapasapame Goteme nalimba-pipa awapa kalai dupa pitaka piana lao panao lamaiyambi-pyaa.

⁵Dopa lao lamaiyambiaka doko, Patasi dupanya masoo miningi akali mendapuame sakatao lao pituu, “Nyakamame akali dupanya elya pingi kambu kepatakamaitala, Moseseme mana setapae nyiamo dupa watao minina lao lamaipengena,” leami-pyaa.

⁶Dopa leaminosa aposele dupapi isingi akali dupapi dutupame pii dokonya lao wasalanya limbiami-pyaa.

⁷Limbatala pii longo lao yanda pyoloo pyoo peteaminopa, Pitame toya katapala pii mende dupa kandao lao pituu, “Kaimia paluma, wamba Goteme naima-kisa kalai mokosoo pituu, endakali tata waka dupame Wai Pii Epe doko sepala masoo minina lao nambame lamaitinopa lao baame namba yapao nyiamo doko nyakamame masilyamino.

⁸Mona kandenge Gote dokome endakali tata waka dupa lanyetona lao masiamo doko laitaka pyaanya Oli Sipitisa doko naima diamoliaka pyoo dupa maiya.

⁹Goteme naima-kisa mana waka mende minatala, tata waka dupa-kisa mana waka mendeaka pyoo minala naya. Masoo miniamino ongonya baame dupanya koo dupa kunanya nepakamaiya.

¹⁰Dopana, aipuma nyakamame indupa Gote minao makande pyaanya kenda pipae naimanya yumbange dupapi naimapimi kapa pao nasiamano doko masoo miningi endakali dupa-ketae setamana lao masilyamipi?

¹¹Dopaka doko, naimame dapa lao masoo minilyamano: Kamongo Jisasanya mona epe palenge dokome naima pyoo nyepea. Endakali tata waka dupa dopaka peteana,” lea-pyaa.

¹²Pitame dopa lateamopa endakali longo limbiamino dupame pii mende naleami-pyaa. Banapasa Polopame nalimba-kisa endakali tata waka dupanya kainanya Goteme kongalipi kalai paka pipaepi dupa piana lao leambino doko dupame soo peteami-pyaa.

¹³Dokopa Jemesame lao pituu, “Kaimia paluma, nambame pii mende lelyona salapape.

¹⁴Goteme wambao endakali tata waka dupa-kisa ipupala dupa baanya joo katatamina lao lanyiamo doko Saimoneme panao nyakama langitalamo.

¹⁵Potopesa dupame pii mendai dokoaka lao pepa piamino doko dapa lao pyapae mee silyamo:

¹⁶‘ “Maitakao namba pilyetala Dapitinya andalakembatae silyamo doko dee pito. Anda dokonya koyatamo dupa nambame dee wasoo pinya katato.

¹⁷Dopana, nambanya latae endakali tata waka dupa pitakame namba kutatami.” Wamba waka pitona lao panasetala pilyamo Kamongo dokomeaka dopa lelyamona,’ lao pepa pyapae silyamo.

¹⁹“Tenge dokonya minao tata waka dupame Gote lao mona kapilyilyamino endakali dupa kenda pisala nayamana lao nambame masilyo.

²⁰Dopa napinya, dupame sambo gote lao kundi maitae nee dupapi, mena yakapi mange minao kaimindokao kumasetae dupapi, taiyoko pyapae dupapi dupanya nala nayao kepo kolenge mana dupa watao napayalapape lao pepa pyasakamaimana.

²¹Doko, wamba waka akali dupame yuu taono dupa pitakanya Sambasa dii lao Jutamanya losuu anda dupanya Mosesenya pii doko itaki pyao lamaiyamino doko lamaiyoaka kalyaminona,” Jemesame dopa lea-pyaa.

²²Dokopa aposelepi, isingi akalipi, sosanya endakali dupa pitakapimi nyakamanya akali mendapua yapao nyepala Polopa Banapasapa-pipa Andioko yuu taono dokonya pena leami-pyaa. Dupame Sailasapa Jutasa baa kenge mende Basapasa lenge dokopa dolapo pena leami-pyaa. Dolapo masoo miningi kaiminingi dupanya andake joo kateambi-pyaa.

²³Dolapo-kisa dupame dapa lao u pepa mende pyapala pyasiami-pyaa. “Naima aposelepi isingi akalipi masoo miningi kaiminingi dupame nyakama tata waka masoo miningi kaiminingi Andioko yuu dokopi, Sitia yuu dokopi, Silisia yuu dokopi yuu dutupanya kalyamino dupa nyakama auu pyoo kalyepape lelyamano.

²⁴Naimanya akali mendapuame nyakamanya masingi sakatasakao dupanya pii dokome nyakamanya mona koo palisekelyamino leamino pii doko sepeama. Dopaka doko, naimame dopa pina naleama.

²⁵Dopana, indupa naimame mona mendai paliuu akali mendalapo yapao nyepala, naimanya auu kaenge Polo Banapasa-pipa awapa nyakama kalyamino ongonya epekena lelyamano.

²⁶Polo Banapasapa dolapome naimanya Kamongo Jisasa Kataisanya kenge doko lao minalyoo katao kumingi doko paka nakaengemba.

²⁷Dopana, naimame Jutasa Sailasapa dolapo epekena latala dolapome pii datupaka nyakama langina lelyamano:

²⁸Naimapi Oli Sipitisa dokopimi nyakama-kisa kenda pipae mende setala nayamana lao masilyamano. Nyakamame mana datupa iki dapa pyoo minalapape:

²⁹sambo gote dupa kundi maitae dupapi, taiyoko pyapae dupapi, mena yakapi mange minao kaimindokao kumasetae dupapi dupa nala nayalapape. Kepo kolala nayalapapeaka. Mana koo dupa nepatala wakale katatamino kandao doko, nyakama auu pyoo katatami. Pii utupaka iki lelyamanona,” lao pepa pyasakamaiyami-pyaa.

³⁰Dopa lao pepa pyapala minao pena lateaminopa akali dolapome Andioko yuu dokonya pyakanatala sosanya endakali dupa limbina latala pepa doko dupa maiyambi-pyaa.

³¹Maitiambinopa Andioko tange dupame pii auu pipae siamo dupa itaki pyao kandatala mona yaepeami-pyaa.

³²Jutasa Sailasapa dolapo potopesa joo kateambiaka-pyaa. Dolapome pii longo lao lamaiyoo masoo miningi kaiminingi dupanya mona minao sakatasetakamaitala pupu lasiambi-pyaa.