29“O Kembu, nini gi welen qem gihiinga merak galöm meme keu neŋgizei, gi mönö mi eka naŋgöm neŋginöŋga ölöp göhö Buŋa keugi suahö ewö awösamkakak kinda jiba malbin.
30Göŋön mönö börögi surunöŋga kawöl ambazip mi Nahöngi Töröŋi Jisösgö qet ösumŋe ölöwakŋe aka aŋgöletot aiwesök murutŋi murutŋi asuhumakŋe. Keu mi ölŋa.”
31Mewö köulukögetka miri tokoba tatkeri, gölme mi memenjaliba utuköiga Uŋa Töröŋan körek pakpak uruŋini kokolak qeiga anda suahö ewö awösamkakak kinda Anutugö Buŋa keu jiba malget. Mewö.
32Urumeleŋ kambu ketaŋi yeŋön urumohot aka mötmöt mohot aka malget. Yuai pakpak ahöm eŋgiyöhi, mi göhöreŋök me nöŋgöreŋök, mewö qahö jigetmö, yuai pakpakŋini mi mutulaŋgöba mohot aiga malget.
33Mewö malgetka Anutugö ösumŋan eŋgualöŋniga köhöigetka aposol yeŋön jitŋini memba dangunu ewö kinda Kembu Jisösnöŋ kömupnöhök guliba wahöröhi, keu mi naŋgöba jiba malget. Mewö malgetka Anutunöŋ kalem möriamŋi ketaŋi mokom eŋgiiga ambazipnöŋ göda qem eŋgiget.
34Mewö malgetka miaŋgö dop sutŋine kunŋan yuai kungöra qahö mözöröŋgöba osiba malök. Körek pakpak nene nupŋi nupŋi aka miriŋi miriŋi mieŋgö toŋi akeri, yeŋön mi bohonŋi memegöra alget. Mewö algetka söŋgöröŋi moneŋ kaiga mi memba kaget.
Aposol nup meme 4
Aposol nup meme 4:29-34