Aposol nup meme 22:12-20

¹²“Miaŋgöreŋ azi kun qetŋi Ananaias malök. Yaŋön Anutu göda qeba Mosesgöreŋ Köna keu törörök wuataŋgöba malök. Miaŋgöra Juda ambazip Damaskus malgeri, yeŋön körek gödaŋi ölöpŋi ak waŋgiba malget.

¹³Yaŋön nöŋgöreŋ kaba kösutne kinda nöŋgöra kewö jiyök, ‘Sol alani, jegi mönö kunbuk tohoyök.’ Mewö jiiga aua nalö miaŋgöreŋök jeni tohoiga uba ehal.

¹⁴Ekiga Ananaiasnöŋ jiyök, ‘Göŋön ahakmeme diŋdiŋi solanŋaŋgö Toŋa eknöŋga keu jitŋan jii könömŋi mötnöŋ. Nanine ambösakonini yeŋgöreŋ Anutu yaŋön gi möwölöhöm gihiiga yaŋgö jitsihitŋi möt kutuman.

¹⁵Gi wani yuai eka mötzani, mönö mi naŋgöba jiba yaŋgö jitŋe memeŋi aka gölmeŋi gölmeŋi ambazip jeŋine dangunu ewö kinda malman.

¹⁶Mewögöra gi wuanöŋgöra mambötzan? Mönö wahöta yaŋgö qetŋi qeta köuluköba jinöŋga o melun mem gihiinga siŋgisöndoki saŋgoŋniga solanima.’ Ananaiasnöŋ mewö jiyök.”

¹⁷“Damaskus siti mosöta Jerusalem sitinöŋ liliŋgöba jöwöwöl jikenöŋ köuluköbiga Kembugö alburupŋan (aŋsumbemŋan) nuŋgui kinda imut kun ehal.

¹⁸Imut miaŋgöreŋ Jisös ekiga nöŋgöreŋ kaba kewö jiba jii möral, ‘Gi kantri kiaŋgöreŋ nöŋgö könani aka Buŋa keuni mi kude jiba malman. Mi naŋgöba jinöŋga nesampurek aka andö qeme. Miaŋgöra Jerusalem siti ki mönö ösumok mosöta anman.’

¹⁹“Mewö jiiga jial, ‘Kembu, yeŋön könaŋamni mötze. Nöŋön mutuk liliköba ambazip gi möt narim gihizei, mi köuluk miriŋi miriŋi miaŋgöreŋ öŋgöba miwikŋaim eŋgiba jöhöba ihilek wahiŋambuknöŋ tauköm eŋgiba tosatŋi kösö mire al eŋgiba malal.

²⁰Göhöreŋ nupbauk azi Stiwenöŋ könagi naŋgöba jiiga qeget sepŋi mokoi eri nöŋön nalö miaŋgöreŋ mewöyök kösutŋine kinda imbi köla malukuŋini galöm memba kinbiga qeget kömuyök.’