Aposol Gawoŋ Meme 10:34-48

³⁴Korniliusnoŋ kaeŋ jero Piitonoŋ kanaiŋ kokaeŋ jero, “Ahaa! Anutunoŋ ejemba tosaaŋa mende iŋiisosorooŋ tosaaŋa mende sureeŋ oŋomakejato, so motooŋgonoŋ gosiŋ nonomakeja. Iwaa jaanoŋ moŋnoŋ aŋgonjorayawo mende kolooja. Niinoŋ ii keteda koi oŋanoŋ moma kotojeŋ.

³⁵“Kaeŋ qaagoto, ejemba tuuŋa tuuŋa kuuya noŋoo batunananoŋ daeŋ yoŋoonoŋga moŋnoŋ Anutu waeya meŋ mepeseeŋ kaiyakayanoŋ kana dindiŋa otaaji, iinoŋ mono Anutuwaa jaanoŋ sokonja.

³⁶Jiisas Kraistnoŋ ejemba kuuya ananaa Poŋnana kolooŋ luae qeŋ nonomakeji, Anutunoŋ Buŋa qaaya ii Israel kanageso nonoonoŋ ano karo. Buŋa iikanoŋ karo nono iikawaa Oligaa Buŋaya jeŋ asariŋ laligojoŋ.

³⁷Jonoŋ ejemba uugia kuuŋ kokaeŋ jero, ‘Oŋo mono uugia meleeŋgi niinoŋ oomulu meŋ oŋomaŋa.’ Kaeŋ jero kawaa gematanoŋ qaa ii Galili prowinsnoŋ kanaiŋ jegi seiŋ kema Judia prowinsnoŋ keuma kuuya sokono. Oŋo ii modaboroju.

³⁸“Anutunoŋ Uŋa Toroya Nazaret eja Jiisaswaa uutanoŋ maaro ku-usuŋ buŋa qeŋ aoŋ gomaŋ so liligoŋ laligoroti, ii iwo nano kema ejemba kiaŋkomuŋ oŋono. Kileŋaa Toyanoŋ ejemba esuŋanoŋ somoŋgoŋ horoŋ oŋono kemegiti, iinoŋ ii kuuya meŋ qeaŋgoŋ oŋondabororo.

³⁹Iwoi ii Juuda nonoo gomanoŋ ano Jerusalem sitinoŋ ama meŋ laligoro gere batuyanoŋ mondoŋ qegi komuro. Nono ii kuuya iima naŋgoŋ jeŋ daŋgunuya kolooŋ nanjoŋ.

⁴⁰Komuŋ ero somaŋa karooŋ kolooro Anutunoŋ meŋ gbiliro waaro. Waama indiŋa mamaga ejemba asugiŋ oŋono.

⁴¹“Iinoŋ ejemba tuuŋ kuuya yoŋoojoŋ mende asugiroto, Anutunoŋ waladeeŋ nono meweeŋgoŋ nonono Jiisasnoŋ koomu-noŋga waama laligoroti, kambaŋ iikanoŋ iwo qaa amiŋ moma nembanene aŋgoŋ neŋ laligoniŋi, mono nonoojoŋ asugiro nono iikawaa qaaya naŋgoŋ jeŋ namakejoŋ.

⁴²Kaeŋ naniŋ Jiisasnoŋ kokaeŋ jeŋ kotoŋ nonono, ‘Anutunoŋ kuuŋ nono niinoŋ ejemba laligojuti ano komugiti, iyoŋoo jenteego Togiaga koloojeŋ. Kawaajoŋ oŋonoŋ mono noo kaniana ii ejemba tuuŋ so yoŋoonoŋ naŋgoŋ jeŋ asariŋ laligowu.’

⁴³Ejemba daeŋ yoŋonoŋ Jiisas moma laariŋ muŋ qata qamakejuti, Anutunoŋ mono qa ii moma yoŋoo siŋgisoŋgogia mesaoŋ soŋgbamakeja. Iwaa kania kaeŋ eji, ii gejatootoo ejemba kuuya yoŋonoŋ naŋgoŋ jeŋ asariŋ oogita eja.” Kiaŋ

⁴⁴Piitonoŋ qaa kaeŋ jeŋgadeeŋ nano Uŋa Toroyanoŋ ejemba geja ama mogiti, iyoŋoo uugianoŋ kemero.

⁴⁵Anutunoŋ Uŋa Toroya kaleŋa ii waba ejemba yoŋoo uugianoŋ kaaŋagadeeŋ maaro kemeroti, ii Piitowaa alaurutanoŋ iima aarugi. Juuda ejemba selegianoŋ Anutuwaa aiwese meŋ kotogi uugia meleema Jiisas moma laariŋ Piito otaaŋ kaŋ ragiti, iyoŋonoŋ mono aaruŋ kokaembaajoŋ waliŋgogi:

⁴⁶Yoŋonoŋ kantri tosaaŋa yoŋoo qaagia morota morota kanaiŋ jeŋ Anutu mepeseegi. Kawaajoŋ waliŋgogi Piitonoŋ kokaeŋ qisiŋ oŋoma jero,

⁴⁷“Yoŋonoŋ Uŋa Toroya ii nononoŋ aniŋ kaaŋa aŋgoŋ koma buŋa qeŋ aojuti, ii mojoŋ. Kawaajoŋ ii saanoŋ oomulu meŋ oŋoniŋ sokombaa. Ii aniŋ moronoŋ qotogoŋ nononaga?”

⁴⁸Kaeŋ jeŋ jeŋ kotoŋ oŋono Piitowaa alaurutanoŋ nama Jiisas Kraistwaa qatanoŋ Kornilius sumaŋuruta oomulu meŋ oŋoŋgi. Oomulu meŋ oŋoŋgi Piito aŋgoŋ koma mugi toroqeŋ weeŋ tosaaŋa yoŋowo laligoro. Kiaŋ.