Aposel 10:34-48

³⁴Ano Pita asehek anya, “Kabwai, na dah jo ndranyolom handru ta Kindrei badeh, baseken ndramak rayah le bwe.

³⁵Arile, iy badeh, aseken lau mari badu kon munyak tinan labai, buku ndramak ari ari anoh iy, ma amekes kandriyen mwasin le.

³⁶Ya idah badeh, ado tanan sahou mene Kindrei tiye i tiri lau badu Isra-el, ta iri katiye sahou mwasin ta amekes mondrei i san ta Jises Krais, iy le ari, Laban ta lau mari.

³⁷Ado badeh, ndratanan sasah mene asahan bolo Judiya in hamon ta Jon ta alomwa atiye sahou ta iri lau kanyuwi iri. Lakou doh asahan udu Galili bwena.

³⁸Ma ado ndratanan i san mene Kindrei atehei nyosowan ta Malawin Ndrabun hawe boto-on ili ta Jises badu Nasaret. Ma hawe iy edek ili eme ta amekes lahou mwasin hawe amekes iri lau mene are le bahandra boto-on ta balik. Tasah, Kindrei badeh, udu hawen.

³⁹“Aso dah badeh, anyolom na mada aso amwenen, ta lakou mari iy amekes udu kon munyak tinan tiri Juwis ma hawe Jerusalem. Iri badeh, adai iy ma atahi iy imek i bada kei tondreh.

⁴⁰Arile, Kindrei suri iy ta imek tan udu hamon ta len taloh ma leheyani iy i mada iri lau solo-an anyolom iy.

⁴¹Iri lau mari badeh, banyolom iy bwe, arile Kindrei lebelei le aso lau le mene anyolom iy, ma aimon nyamon ma a-un gwa hawen, udu hamon ta iy amak eme loken ta imek.

⁴²Iy badeh, batanau boto-on labai ta aso katiye sahou kili tiri lau mari ma katiye, iy le badeh, Kindrei atehei lahou i tan ta aleben sahou tiri lau ndramak bwena, ma hawe iri lau ma mulin kahis.

⁴³Iri propet badeh, tiye nyalan ale, buku none are lau atehei budon handru in tan badeh, karei ma lomondra ndra-in tan kameh, iy maniy i san ta nyaran.”

⁴⁴Pita asehek sahou doh kahis le badeh, Malawin Ndrabun eme bwele-e iri lau mari nane anuhun sahou dah.

⁴⁵Eme ma iri Juwis ta asan ku-i iri, atehei budon tiri in ta Jises, ado hawe Pita badeh, boho iri asak ta Malawin Ndrabun amou laleyah i tiri lau badu leheleh ale.

⁴⁶Tasah, oro anuhun iri badeh, asehek boho kon rakon labai ja, ma atudun Kindrei. Ano Pita anya,

⁴⁷“Are lau handru winiyan tawi oro lau doh, ta salomwa oro na gwa? Oro badeh, ndrakohok Malawin Ndrabun i le buku aso mene.”

⁴⁸Ya, eme iy tiye ta kalomwa oro na boto-on ta nyara Jises Krais. Ano oro tiye Pita udu hawe oro len sabe op.