Aposol 13:9-40

⁹Hu'neanagi Solina, mago agi'a Poli'e, Ruotge Avamumo'a agu'afi avinetegeno avua kefatago huno negeno,

¹⁰anage hu'ne, kagripina havige avu'avamo'ene havizahu zamo'a avite'ne, Sata mofavre mani'nenka, fatgo avu'avamofona ha' arenentane, kagra fatgo osu avu'avara netrenka, Anumzamofo fatgo avu'avara osugahampi?

¹¹Menina ko, Anumzamofo azamo'a ha' reganteankino kavurgamo'a asu hanigenka, osi'a knafina kavua onkegahane! higeno ame huno avumo'a su higeno azante azerino vanohu vaheku hakre'ne.

¹²Anante kamani (Gavana) kva ne'mo anazama agrite fore hiaza negeno, amentinti hu'ne. Na'ankure agra tusi'za huno Ramofonkema rempima humia zankura antri hu'ne.

¹³Anante Poli'ene agrane vu'naza vahe'mo'za Pafosi kuma atre'za hagerimpi vu'za Pega kumate Pamfalia kaziga ehnati'naze. Hianangi Joni'a anante ome zanatreno ete Jerusale kumate vu'ne.

¹⁴Pega kumara atreke, zanagra Pisidi Antioku ehanatike, mni fruhu knazupa osi mono nompi (sinagog) marerike umani'na'e.

¹⁵Kasegene kasnampa vahe kema hampri vagarete'za osi mono nompi kva vahe'mo'za ke atrezmante'za anage hu'naze, tafuheta mago'a tazeri hanaveti ke eri'nenutma amane hugahaze.

¹⁶Hazageno Poli'a anante otino azanu avame huno anage hu'ne, Israel vahe'motmane megi'a vahe'ma Anumzamofonku koroma nehaza'motma antahiho.

¹⁷Ama'i Israeli vahe'mofo Anumzamo'a, tagri tagehe'ina huhampri zamanteno, ru vahe kumapima umani'nageno zamazeri knare zantfa Isipi kumapina nehuno hihamu'areti anampintira zamare megi atre'ne.

¹⁸40ti'a naza kafufi ka'ma mopafi zamareno ome zamantege'za mani'naze.

¹⁹7ni'a ranra kumatamimpi mani'naza Kenani vahe zamahe hana huteno, Anumzamo'a ana mopafi vahe'amo'za manisagu mopa erizamige'za zamagra mopa erise'za mani'naze.

²⁰Anazama fore'ma hu'neana 450'a zgegfu nazampi fore hu'ne. Anama huteno'a henka kva vahe azeri otigeno kva krizmantege'za mani'za e'za kasnampa ne' Samueli'gnare ehnati'naze.

²¹Anante kini ne' tamisane hu'za antahigageno, Anumzamo'a Kisi nemofo Benzameni naga nofipinti ne' Soli zamigeno, 40ti'a zgegfufi kini manino kva huzmante'ne.

²²Anumzamo'a kini Solina azeri netreno, Deviti azeri otigeno kini manino kva huzmante'ne. Agra anage huno Devitinkura hu'ne, Nagra kogeno Jesi nemofo Deviti'a, Nagri'ma nagu'afima navenesia'zana agra nevaririno, maka'zama huo hanuazana hugahie. (Sam-Zga 89:20, 1 Sam 13:14)

²³Ama ana ne'mofo negehompinti, Israeli vahe'mota tahoke'ma heno tazahu nera Jisasina huvempa hu'nea kante anteno tami'ne.

²⁴Jisasi'ma hakare'a Israeli vahe zamufi eama osu'negeno, Joni'a huama huno mono tina fretma tmagu'a rukrehe hiho huno maka Israeli vahe'mota tasami'ne.

²⁵Hu'neanagi Joni'ma huhamprinte'nea eri'zama'a eri vga reteno'a, mago'ene anage hu'ne, Iza'e hutma nagrikura nentahize? Nagra ana nera omni'noe. Hu'neanagi antahiho, mago'mo'a namage ne-e. Nagra knarera osu'noankina agia anontema anaki'nea nofira katu ofegahue huno hu'ne.

²⁶Nafuhetma Abrahamu agigo azankomofo nagare, amama Anumzanku koro nehu'za tamagrane mani'naza megi'a vahe'motma kumipinti tazahu kea tagrite atregeno e'ne.

²⁷Na'ankure Jerusale mani'naza vahe'mo'zane, kva vahe'zmimo'zanena Agra taza hu'nere hu'za ke'za antahi'za osu'naze. Kasnampa vahe'mo'za Agriku hu'za kre'naza kea maka mni fruhu (sabat) mono knare'ma hampri'za nentahi'za, antahiso'e osu'za ahenaku huhaviza hunte'naza kemo'a, avufa'a fore hu'ne.

²⁸Ahe fri agafagura ke'za erifore osu'za, zamagra Paerotinte vu'za, antahige'za ahe frio hu'za hu'naze.

²⁹Agriku'ma hu'zama avon tafepi krente'naza maka nanekea huvgarete'za, keka zafareti erifenka atre'za eri'za vu'za kerifi ome ante'naze.

³⁰Hu'neanagi Anumzamo'a fri kragefe'nefinti azeri otigeno,

³¹Galiliti amage' ante'za Jerusalem mareri'za e'naza vahe'taminte rama'a zupa efore hu'ne. E'ima ke'naza nagamo'za vahepina huama hu'za menina zamasmi'gahaze.

³²Hanki neragehokizmima huvempa huzmante'nea knare musenke tagrama neramasmunana,

³³ama ana huvempa kea, Anumzamo'a tagrite eri knare huranteno Agra'a mofavre'aza huneranteno, Jisasinena azeri oti'ne, ko'ma tare zgame avon tafepi krente'nea kante, Kagra mofavreni'a menina mani'nanke'na, Nagra negafa'na manigahue huno huama hu'ne. (Sam-Zga 2:7)

³⁴Hu'neanagi e'ima hunte'nere, Anumzamo'a tamage huno Jisasina azeri oti'neakino mago'anena frino onkasritfa hu'ne, Anumzamo'a anage huno hu'ne, Nagra agru huno ruotge hu'nea huvempa asomu ke Devitima ami'noana, menina tamagrira tamigahue, (Aisa 55:3)

³⁵E'ina hu'negu mago'ene zgame avon tafepina anage huno kre'ne, Kagra atresankeno ruotge hu'nemo'a onkasrigahie. (Sam-Zga 16:10)

³⁶Deviti'a, agrama manino e'nea knafina Anumzamo'ma erigahane huno hunte'nea eri'zana eri vagareteno, frige'za negehoma asentenafi ome asentageno avufamo'a kasri'ne.

³⁷Hu'neanagi Jisasina fri'nefinti Anumzamo azeri otigeno onkasri'ne.

³⁸E'ina hu'negu nenafutma antahita keta hiho, ama ana ne'pinti kumi tamia eri atresia ke huama hu'na neramasmune.

³⁹Ama ana nete'ma zamentinti hanu'za fatgo vahe manigahaze. Mosese kasegemo'a tamazeri fatgo osugahie.

⁴⁰Ana hu'negu tamagra kava hu'nenkeno, kasnampa vahe'mo'za hu'naza nanekemo'a tmagritera fore osino.