Aposel 1:18-26

¹⁸Ba alla iwa Judas ge une ke yei al ge, una ku iwo une top toi mal ge, une ipo makimb ta top to i, makimb al ge, une po kulngamb yage makimb al toika, yene kumbe al billa djika, yene elle ge porapora, tulup to er orko wo makimb al moi.

¹⁹Iwa Judas embe yei ge, Jerusalem una porapora ge pille, Judas makimb top to i al ge, una kandjiye gun ta yei dumo Akeldama we dji. Kandjiye ge Jerusalem una kandjine dji al ge meyam dumo yero we dji.

²⁰Buk Song Baibel al paro ge kandja embe dje bolo wori pai, Yene numbiye gullye ge wapra yendaka, una ta namoye. Une kogoye ge una djell ta wo i kogoye yenda we dji

²¹Baibel kandja embe dje bolo pagi pille, nono Iwa Kerman Jisas boll aike wanpin una mormon ge, iwa taimanta dje i nono una 11 pela mormon al pakna worbon. Asa Jon Jisas nu pagle awi ege ge ye pa pika, are God Jisas dje i er pla kupill al pi ge, iwa ta nono dje imbon iwa ge, une wal porapora yei kani mal embe dje imbon. No una 11 pela mormon al ge une wo nono boll aike moyaka, Jisas golo aglo erwo gun pi mal, no kandja djimbon mal ge, iwa ge para wo no boll molo kandja djinda we dji.

²³Pita kandja embe djika, iwa soka mopill ge una djimaka soka aglo mopill. Ta Josep kandjiye ta Barsabas, kandjiye ta Jastus we dji. Alla, iwa ta une agi ge kandjiye Matias we dji.

²⁴Iwa soka ge mopillka, kambono kamang ye awo embe dji, Iwa Kerman, una porapora nomane paro mal ge ni kankerden. Judas kogo yenda mal kere er po dumo moya al ge une pi pora dji, ni djimbenka no kanbon, iwa soka mormell ge ta wo aposel mal moya. Embe molo, Judas kogo yei mal ge wo yenda we dji.

²⁶Kambono kandja embe dje kere, ku ta i tukiye gakle mal embe yewormaka, yage toi ge iwa Matias dji mal ge pai. Paika, kambono une dje i pakna wormaka, aposel 11 pela moi al ge une para pakna moi.