Aposel 1:16-26

¹⁶Uqa maaden, “O cotiel, je oso eu Anutna jaqec je weledecna nijia. Wele bahic Kis Gun odocob Dewid uqa je oso Judasnu maden. Judas uqa Jisasna cad jic dado madimei uqa age ebenegana Jisas mudigian eunu je maden. Odocob je i wele aig qon.

¹⁷Ge, Judas uqa egena eundec oso eunu uqa egena cabina cabi oso muguh mein,” aden.

¹⁸“Judas uqana cabi oc me qeenu meen qaig on eu maha oso fajen. Euna uqa toni qocob cal men. Uqa big fugudocob big anag maliogca cunug basecdon.

¹⁹Odocob dana cajaca cunug Jerusalem bilein eu dah mimeig age agena jena maha eu ‘Akeldama’ ein. Uqana gug eu odi ‘Golac Maha,’” aden.

²⁰“Ge, Buk Songna je oso age jaqein eu odi madena: ‘Uqana bilec gauc nijiale. Dana oso euna qee biliaun,’ ena. Odocob je oso ha edi madena: ‘Uqana cabi cudun eu oso oiale,’ ena,” aden.

²¹“Eunu egenadec dana oso uqa Jisas Tibud cal mecnadec ceseli cajen eu fen uqa ege gami gabandoc bilom dana i uqa nesili ehudecnu. Uqa saen cunug Jisas Tibud ege gami cobom,

²²saen hahawan Jon uqa wa joadecnu je maaaden li deel Jisas uqa egecadec ehudi sao jobonna ehi ten eu gadac. Odocob dana i uqa egeca gami Jisas cal mecnadec ceseli cajennu je qasali maadec cabi oqale,” aden.

²³Eunu age dana lecis ijanala madein, Josef uqa Basabas doloig, uqa ijan oso ha Jastas doloig, Mataiasca.

²⁴Odimeig age inondu madoin, “O Tibud, hina cunug agena cisdoc dogona eunu dana lecis i alenadec in eu uqa aposel cabi cudun Judas uqa cuculi uqana gucna nuen eu ugiannu hina nesili ehudem ege ihacgaga,” doin.

²⁶Odimeig age ijanala meen lecis jaqimeig hal oso tacimeig lahidocobil meen oso toni non. Mataias ijan calen. Uqa ageca gabanadeceb uqa aposel bilec 11-pela odi age gami bilein.